Jabuli 139

Lubanga tye i kabedo ducu dok ngeyo jami ducu

1Ai Rwot, in dong ingiyo kwona ci ingeya woko!

2Kadi abedo piny nyo kadi aa malo, in ingeyo;

iniang tama woko ki kamabor.

3Ingiyo yona ki kama abutu iye piny,

dok ingeyo kit yo me kwona ducu.

4Ma nongo peya aloko lok mo,

nen, Ai Rwot, nongo in dong ingeyo lok ma abiloko woko ducu.

5In iruma woko tungi ki tungi,

kun igwoka ma iketo cingi ikoma.

6Kit ngec ma itye kwede tye me aura mada ki tung bota;

tye wa malo tutwal makato ngeca woko.

7Abicito kwene wek aa woko ki boti?

Abia ki inyimi aringo acito kwene?

8Kadi ka ait malo i polo,

in bene itye kunu.

Kadi ka abutu piny i lyel,

in pud itye kunu aye!

9Ka atuk acito malo ma awoto macalo rupiny,

nyo abed i kabedo mo i dog nam matye kamabor adada,

10in pud i bibedo kunu ka peyo an,

dok bene ibimaka ki cingi me twer.

11Ka awaco ni, “Wek colpiny ouma woko,

onyo dero me ceng ma oruma odok dyewor,”

12ento colpiny bene pe col ki boti,

ki dyewor bene leng alenga calo dyeceng;

pien ki tung boti colpiny rom ki dyeceng.

13In aye ma iketo dul me koma ducu,

dok icweyo woko kacel ki i i maa.

14Abipaki, pien in aye ma myero kilwori dok itye me aura.

Tici ducu ma itiyo obedo tic me aura! An angeyo man maber tutwal.

15Yam ineno ka kiribo cogo koma ikare ma kicweya i maa,

ma kicweyo koma piny ite lobo kamatut ki diro madwong.

16In i neno koma ki wangi ma pud peya kicweyo otum,

wel ninona ma iciko pira ducu kicoyogi woko i buki

ma peya nino mo acel ikin gi oo.

17Ai Lubanga, niang tami ikoma tek ki tung bota tutwal!

Gin ducu mono gitye adi!

18Ka awaco ni akwan welgi akwana,

gipol ma gikato kweyo woko.

Ka acoo ki iwang nino, nongo pud atye boti.

19Ai Lubanga, onongo amito ni inek jo maracu woko,

wek jo ma oyo remo pa dano gurweny woko ki bota,

20gin jo ma gibedo kaloko lok marac i komini,

ma guile malo kun giloko lok marac ikomi.

21Ai Rwot, an adag jo ma gin dagi,

dok bene iya okwero jo ma gijemo woko ikomi.

22Adaggi adada ki adagadaga ma otum,

anenogi macalo lukwora.

23Ngi kwona, Ai Lubanga, wek inge gin matye i cwinya;

kong itema, wek inge kama tama tye iye.

24Inen ka kit mo marac tye i iya,

ci dong itela i yoni ma bedo nakanaka.