Acoli Bible Revision
Jabuli 136
Wer me miyo pwoc bot Rwot
Wumii pwoc bot Rwot, pien en ber;
mar mere ma pe loke bedo nakanaka.
Wumii pwoc bot Lubanga maloyo lwak lubangagu ducu,
pien mar mere ma pe loke bedo nakanaka.
Wumii pwoc bot Rwot maloyo rwodi ducu,
pien mar mere ma pe loke bedo nakanaka.
En keken aye ma tiyo ginaura madito,
pien mar mere ma pe loke bedo nakanaka. 2
En ocweyo polo ki ryekone,
pien mar mere ma pe loke bedo nakanaka. 3
En bene ma opeto lobo iwi pii matut,
pien mar mere ma pe loke bedo nakanaka. 4
En ma ocweyo ceng ki dwe,
pien mar mere ma pe loke bedo nakanaka.
En ocweyo ceng me loyo dyeceng,
pien mar mere ma pe loke bedo nakanaka.
En ocweyo dwe ki lakalatwe me loyo dyewor,
pien mar mere ma pe loke bedo nakanaka. 5
En oneko lutino kayo pa jo Ejipt ma co woko ducu,
pien mar mere ma pe loke bedo nakanaka. 6
Ci okwanyo jo Icrael okelogi woko ki ikin jo Ejipt,
pien mar mere ma pe loke bedo nakanaka.
En okelogi woko pi twero me bade ki cinge ma oryeyo,
pien mar mere ma pe loke bedo nakanaka. 7
En opoko i Nam Makwar woko ki idyere,
pien mar mere ma pe loke bedo nakanaka.
En omiyo jo Icrael gukato ki idyere wa loka tungcel,
pien mar mere ma pe loke bedo nakanaka.
Ento omiyo Parao kacel ki mony ma mere gumwony guto woko i Nam Makwar,
pien mar mere ma pe loke bedo nakanaka.
En ma otelo lwake i dye tim,
pien mar mere ma pe loke bedo nakanaka.
En oneko luker madito woko ducu,
pien mar mere ma pe loke bedo nakanaka.
En oneko luker ma guywek;
pien mar mere ma pe loke bedo nakanaka. 8
En oneko Cikon, ma rwot pa jo Amor,
pien mar mere ma pe loke bedo nakanaka.
En oneko bene Og, rwot me Bacan,
pien mar mere ma pe loke bedo nakanaka.
En omiyo lobogi woko bot lwake me bedo gipinygi,
pien mar mere ma pe loke bedo nakanaka.
En omiyo lobogi bot lutice jo Icrael wek obed ginaleyagi,
pien mar mere ma pe loke bedo nakanaka.
En opo pirwa ikare ma dong kiloyowa woko marac,
pien mar mere ma pe loke bedo nakanaka.
En olarowa ki i cing lumerokwa,
pien mar mere ma pe loke bedo nakanaka.
En miyo cam bot gin makwo ducu,
pien mar mere ma pe loke bedo nakanaka.
Wumii pwoc bot Lubanga me polo,
pien mar mere ma pe loke bedo nakanaka.
Source notes (8)
- Cross-reference 1 Tek 16:34; 2 Tek 5:13; 7:3; Eji 3:11; Jab 100:5; 106:1; 107:1; 118:1; Jer 33:11
- Cross-reference Aca 1:1
- Cross-reference Aca 1:2
- Cross-reference Aca 1:16
- Cross-reference Nia 12:29
- Cross-reference Nia 1:15
- Cross-reference Nia 14:21-29
- Cross-reference Wel 21:21-30
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.