Jabuli 135

Wer me pako Rwot

1Wupak Rwot!

Wupak nying Rwot, wun lutice ducu,

2wun ma wucung i Ot pa Rwot,

idyekal me Ot pa Lubangawa!

3Wupak Rwot, pien en ber;

wuwer wer me pako nyinge, pien en lakica.

4Rwot oyero Yakobo me bedo mere,

jo Icrael me bedo lwake kikome.

5Angeyo pira kena ni Rwot dit,

dok angeyo ni Rwotwa loyo lubanga mukene ducu.

6Gin mo keken ma Rwot mito en tiyo,

i polo ki iwi lobo,

i nam kadi i pii matut matye piny ite lobo.

7En aye mamiyo pol tinge malo ki i agiki me lobo,

en mamiyo lutkot wil,

en bene ma cwalo yamo ki i odine me kano jami, ci kodo.

8En aye mayam oneko lutino kayo pa jo Ejipt woko,

lutino kayo pa dano ki pa lee.

9En otiyo lwak tango ki ginaura mapol i Ejipt,

kun pwodo Parao ki lutice ducu.

10Dok oneko lwak me rok mapol,

ci oneko luker matego woko liweng;

11Cikon, rwot pa jo Amor,

Og, rwot me Bacan,

ki luker ducu matye i Kanaan.

12En omiyo lobogi woko me bedo gipinygi,

gipiny pa lwake jo Icrael.

13Ai Rwot, nyingi bedo nakanaka,

dok bene kibipo piri ikare pa yalwak ducu.

14Rwot bimiyo jone loyo kop,

kica bimake ikom lutice. 151

Lurok giworo cal lubanga ma kitiyogi ki ryal ki jabu;

man obedo tic ma dano gutiyo ki cinggi.

16Doggi tye, ento pe giloko,

wanggi bene tye, ento pe gitwero neno piny.

17Itgi tye, ento pe gitwero winyo lok,

yamo me yweyo bene peke idoggi.

18Jo ma gutiyo cal lubanga magi,

ki jo ducu ma geno cal lubanga magi

gin bibedo calo cal lubanga magi bene.

19Wun jo Icrael, wupak Rwot!

Wun jo me ot pa Aron wupak Rwot!

20Wun jo me ot pa Levi, wupak Rwot!

Wun bene ma wulworo Rwot, wupake!

21Kipak Rwot ki i Cion,

i kabedone i Jerucalem!

Wupak Rwot!