Jabuli 129

Lega ikom lukwor pa jo Icrael

1Jo Icrael myero guwac ni,

“Kiketo can ikoma marac

tutwal nia wa ka tinona.

2Lukwora guketo can ikoma marac tutwal nia wa ka tinona,

ento pe guloya kadi ki acel.

3Gin guketo ret matut i dye ngeya;

macalo wegi kweri dyang ma gipuru potigi kun gigoro tyeng maboco iye.”

4Ento Rwot opore,

en dong ogonya woko ki i opii.

5Wek dano ducu ma dag Cion

kiket lewic i wigi, dok kilogi kiryemgi, kidwokgi bene cen!

6Wek gubed macalo lum ma otwi iwi ot,

ma two woko ma peya odongo ocito malo,

7pe tye dano mo maromo nyaro pongo cinge,

kadi ngat ma tweyo kacel bene pe gwaro pong kore.

8Pe tye ngat mo makato ki kenyo matwero waco ni,

“Gum pa Rwot obed ikomwu!

Walamo gum ikomwu i nying Rwot!”