Jabuli 124

Lubanga laro jone ki i cing lukworgi

1Jo Icrael myero guwac ni,

“Ka kono Rwot pe obedo tung botwa,

2ka kono Rwot pe obedo tung botwa,

ikare ma lukworwa gubino kalweny ikomwa,

3kono gumwonyowa woko makwo,

ikare ma kinigagi olyeti woko marac tutwal ikomwa;

4kono nene lalele omolowa oterowa woko,

kono biamwonyi me pii oumuwa woko lipuk;

5kono omiyo pii otwage i wiwa.”

6Kipwo Rwot,

ma pe omiyowa botgi

macalo ringo ma myero gukil woko ki lakgi!

7Wabwot woko calo winyo

ma obwot ki i owic pa ladwar;

ma tol owic ocod woko,

ci wan wabwot!

8Kony ducu ma wamito a ki bot Rwot,

ma ocweyo polo ki lobo.