Jabuli 115

Lubanga me ada

1Deyo obed boti keken, Ai Rwot,

ento pe obed botwa,

pi mar meri ma pe loke kacel ki geneni.

2Pingo lurok myero gupenywa ni,

“Lubangawu tye kwene?”

3Lubangawa tye i polo,

en timo gin ma cwinye mito. 41

Cal lubangagi kiyubu ki ryal dok ki jabu;

meno gin ma dano yubu ki cinggi.

5Doggi tye, ento pe gitwero lok,

wanggi bene tye, ento pe gitwero neno piny.

6Itgi tye, ento pe gitwero winyo lok,

umgi tye, ento pe gitwero ngweyo piny.

7Cinggi tye, ento pe gitwero bongo piny,

tyen gi bene tye ento pe gitwero wot;

pe tye gin mo matwero winye ki i dwon gi.

8Jo ma gitiyo cal lubanga magi girom aroma kwedgi,

ki jo ducu ma geno cal lubanga magi bene gitye kitmeno.

9Wun jo Icrael, wugen Rwot!

En aye ma konyowu dok gwokowu.

10Wun jo me ot pa Aron bene wugen Rwot!

En aye ma konyowu dok gwokowu.

11Wun jo ma wulworo Rwot, wugen Rwot!

En aye ma konyowu dok gwokowu.

12Rwot pud po ikomwa dok bimiyowa gum;

en bimiyo gum bot jo Icrael,

ki bot jo me ot pa Aron ducu. 132

Rwot bimiyo gum bot jo ducu ma gilwore,

jo matino ki bot jo madito maromrom.

14Rwot myero omed lutino botwu,

wun kacel ki likwayowu.

15Rwot myero omii ki wun gum,

en Rwot ma ocweo polo ki lobo!

16Polo obedo polo pa Rwot,

ento en omiyo lobo bot dano ni gubed iye.

17Jo ma oto pe gipako Rwot,

kadi wa jo ma dong gitye piny kama piny oling mot bene pe gipako Rwot.

18Ento wan jo makwo wabimiyo pwocwa bot Rwot

nia tin nio nino ma pe tum.

Wupak Rwot!