Jabuli 116

Pako Lubanga pi laro dano ki i to

1Amaro Rwot, pien en winyo kokona;

en winyo dwona kacel ki legana me bako dog ma alege kwede.

2Kit macalo en ociko ite me winyo leganani,

pimeno abibedo kakok bote nino ki nino pi kare me kwona ducu.

3To onongo ociko owicce oruma kwede woko dyere,

arem me lyel onongo bene otwene woko ikoma liking;

onongo abedo ki can dok ki remcwiny madwong.

4Cutcut akok bot Rwot ni, “Ai Rwot, alegi, lara do!”

5Rwot lakica dok opore;

Lubangawa latim kica.

6Rwot gwoko jo ma lakonygi peke;

ikare ma kidiya woko piny, en olara.

7In cwinya, ywe mot,

pien Rwot dong otyeko nyutu ber ma mere bene bota.

8Rwot olara ki i to;

en odunyu pig wanga woko,

dok ogwoka omiyo tyena pe ocato.

9Piman, atye kawot inyim Rwot

i lobo pa jo makwo. 101

Amede ki ye en, kadi onongo awaco ni,

“Can dong oketo koma woko,”

11kadi ikare ma onongo abedo ki lworo ma awaco ni,

“Dano ducu pe gene.”

12Abimiyo gin ango bot Rwot

pi gin maber ducu ma en otiyo pira?

13Abitingo kikopo ma nyutu lar mere,

abipwoye kun alwongo nyinge, pien en olara.

14Abicobo kwong mayam akwongo bot Rwot,

inyim lwake ducu kama gucoke iye.

15Ka ngat acel ki ikin jo ma geno Rwot oto

cwero cwiny Rwot mada.

16Ai Rwot, an latici;

an latici, macalo maa bene yam otiyo boti.

In dong ityeko gonyo nyor me to ma kitweya kwede woko.

17Abityero boti gitum me pwoc

dok abilwongo nying Rwot.

18Abicobo kwong mayam akwongo bot Rwot,

inyim lwake ducu kama gucoke iye,

19idyekal me Ot pa Rwot,

i dyeri, in Jerucalem.

Wupak Rwot.