Jabuli 113

Pak pi ber pa Rwot

1Wupak Rwot!

Wun lutic pa Rwot wupake,

wupak nying Rwot!

2Kipak nying Rwot nakanaka

nia tin nio nino ma pe tum!

3Cake kunyango nio kupotoceng

myero kipak nying Rwot!

4Rwot en laloc pa rok ducu,

ki deyone bene tye malo ma okato polo woko.

5Anga macalo Rwot Lubangawa,

ma bedo i kabedone matye malo,

6ma kule neno piny kamabor ki kunu,

ma neno polo ki lobo?

7En ilo lucan malo nia ki i apwa,

dok tingo jo ma piny obwoyogi kwanyogi woko ki iwi odur,

8ci miyo gibedo kacel ki rwodi,

ma gin aye rwodi pa lwake.

9En miyo paco bot dako ma lalur,

dok miyo nongo lutino ci dong bedo ki yomcwiny madwong.

Wupak Rwot!