Jabuli 112

Yomcwiny pa dano ma lworo Rwot

1Wupak Rwot!

Tye ki gum dano ma lworo Rwot,

ma cwinye yom kalubu cike.

2Likwayone gibibedo twoni oteka i lobo ma gibedo iye;

likwayo pa ngat ma cwinye atir kibimiyogi gum.

3Jo me ote gibilony dok gibedo ki lwak jami mapol,

dok kite ma atiri bene bibedo nakanaka.

4En bibedo dero maryeny i colpiny pi jo ma cwinygi atir,

gin jo maber, lukica, dok kitgi atir.

5Dano ma cwinye yom,

mamiyo banya bot luwote, bibedo maber,

en cato cate ki gen.

6Dano ma kite atir pe kibidiro cen;

kibipo pire nakanaka.

7En pe bedo ki lworo kadi ka owinyo lok marac me cwercwiny;

bedo ma cwinye tek kun geno Rwot.

8En bedo ma cwinye opye mot, pe bilworo gin mo,

nio wang ma oneno ka kiloyo lukwore. 91

En poko jami nono bot lucan;

dok kite ma atiri bibedo nakanaka;

en bibedo ki twer dok kibiwore.

10Dano marac ka oneno, ci kiniga mako woko;

bibedo kamwodo lake ma cwinye poto;

gen pa dano marac rwenyo woko matwal.