Acoli Bible Revision
Jabuli 110
Rwot ki laker ma en oyero
Rwot owaco bot rwoda ni,
“Bed ingeta tung acuc i kabedo me deyo,
nio ka abimiyo lukwori gidoko kom laten tyeni.”
Rwot bicwalo odoo ker me tweroni ki i Cion.
En bimiyo ibedo kaloc i dye lukwori.
Inino ma ibilweny ikom lukwori,
lwaki gibimine ken gi boti me cito kalweny.
Calo toyo ma luk odiko con,
awobeni bibino boti kitmeno iwi godi maleng. 2
Rwot dong okwongo kwong, pe dok biloko tame,
en owaco ni, “In ibibedo ajwaka nakanaka ikit pa Melkijedek.”
Rwot tye tung lacuci;
inino ma kiniga omake en biloyo luker woko ducu.
En bingolo kop ikom jo me rok ducu,
dok bipongo bar me lweny ki kom jo ma oto;
en biloyo luker ducu ma iwi loboni.
Laker bimato pii ki i ora kulu matye inget yoo,
meno bimiyo en ilo wiye malo pi loc ma en olimo.
Source notes (2)
- Cross-reference Mat 22:44; Mar 12:36; Luk 20:42-43; Tic 2:34-35; 1 Kor 15:25; Epe 1:20-22; Kol 3:1; Ibru 1:13; 8:1; 10:12-13
- Cross-reference Ibru 5:6; 6:20; 7:17; 7:21
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.