Jabuli 107:1

BUK ME ABIC

Jab 107—150

Pwoc ki pak pi ber pa Lubanga

11

Wumii pwoc bot Rwot, pien en ber;

mar mere ma pe loke bedo nakanaka!

2Wek jo ma Rwot okokogi guwac kitmeno,

jo ma en okoko ki i can,

3en okwanyogi ki i lobo pa lurok odwokogi cen i lobogi,

ma ocokogi ki tung kunyango ki tung kupotoceng,

ki tung kumalo ki tung kupiny.

4Jo mogo gubedo kalak ata i tim aroo,

pe gunongo yoo ma cito i taun madit kama omyero gubed iye;

5kec ki orwo pii onekogi matek,

omiyo gen gi ducu orweny woko ki i cwinygi.

6Ikare ma gitye ki can gukok bot Rwot,

ci en olarogi ki i can meggi.

7En otelogi ci guwoto i yoo atir,

nio ka guo wa i taun kama omyero gubed iye.

8Myero gin gupwo Rwot pi mar mere ma pe loke,

ki pi tice me aura ma en otiyo pi dano!

9En miyo jo ma orwo nekogi mato pii,

ki jo ma kec nekogi yeng ki jami mabeco.

10Jo mogo gubedo i mutu ki colpiny,

lumabuc ma kitweyo ki nyor ma gitye kawinyo arem madwong,

11pien onongo gujemo ma pe gulubu pwony pa Lubanga,

ma gukwero pwony pa En Mamalo Twal.

12Komgi ool woko pi tic matek ma gubedo katiyone;

ci gupoto piny, ma ngat mo peke ma myero okonygi.

13Ikare ma gitye ki can ci gukok bot Rwot,

ci en olarogi ki i can gi.

14Ci okwanyogi woko ki i mutu ki i colpiny,

ka ocodo nyor ma kitweyogi kwede woko ci olarogi.

15Myero gupwo Rwot pi mar mere ma pe loke,

ki pi tic me aura ma en otiyo pi dano.

16En oturu kika mola woko ducu,

dok ongolo rii nyonyo me cego dogola opoko iye woko i dul aryo.

17Jo mogo komgi obedo lit pi balgi,

gubedo ki can madwong pi gin maracu ma gutimo.

18Cwinygi okwero kit cam ducu,

ma oweko onongo dong gicok to.

19Ci gukok bot Rwot ikare ma gitye ki can,

ci en olarogi ki i can gi.

20En ocwalo lok ma mere ci ocangogi,

ci olarogi ki i to.

21Myero gupwo Rwot pi mar mere ma pe loke,

ki pi tic me aura ma en otiyo pi dano.

22Myero gupwoye kun gityero gityer me pwoc,

dok gutit pi tic ma en otiyo kun giwero wer me yomcwiny!

23Jo mogo gukwang ki mel i dye nam,

gin jo ma giyenyo yo me kwogi i nam madongo.

24Gin guneno gin ma Rwot tiyo,

tice me aura ma en tiyo i cwiny nam.

25En oloko, ci yamo matek okodo,

omiyo pii me nam otwage.

26Omiyo mel gutinge malo ma gicok gudu polo,

ka dok gudwogo piny gumwony woko kamatut ite nam;

tekcwinygi orwenyo woko i can gi meno.

27Gucatu kun gipange apanga macalo lumero kongo,

ma ryeko otum woko liweng ki iwigi.

28Ci gukok bot Rwot ikare ma gitye ki can,

ci en olarogi ki i can gi.

29En ojuku yamo matek ci nam opye mot,

ki biamwonyi me nam ducu oling woko mot.

30Ci cwinygi obedo yom pi piny ma oling woko mot litik;

ci okelogi bene wa iwang wat kama gimito bino iye.

31Myero gupwo Rwot pi mar mere ma pe loke,

ki pi tic me aura ma en otiyo pi dano.

32Myero gudwore i coke pa lwak,

kun kipake bene i gure pa ludito.

33Rwot Lubanga loko kulu ducu doko tim aroo mutwo,

dok en juku wang it woko ducu, ci pii dong pe mol ki iigi,

34en loko lobo ma ceko cam doko lobo ma obedo kadokado ma konye dong peke;

man time pi bal pa jo ma bedo i lobo meno.

35En loko tim aroo mutwo doko kama pii pong iye,

ki kama otwo doko wangit ma pii mol ki iye.

36En miyo jo ma kec nekogi gibedo kunu,

ci gigero taun pi kabedogi.

37Gicoyo kodi i poti,

ki gipito olok, ci camgi cek mabup.

38Ginya gidoko mapol pi gum ma Rwot omiyo botgi;

en pe weko wel dyangigi dok piny.

39Ikare ma kiloyogi ma welgi odok piny kun kileyo wigi dok ki kiunugi,

kiyelogi, ma oweko cwinygi ocwer,

40ci Lubanga culu kwor ikom rwodi ma unugi,

ci miyo gin giwoto i dye tim ata kama yoo mo peke iye.

41Ento en laro jo ma piny obwoyogi ki i can gi,

ci weko welgi nya macalo romi.

42Jo ma cwinygi atir gineno ci gibedo ki yomcwiny;

ento jo maracu ducu en juku lok woko ki idoggi weko giling litik.

43Jo maryek myero gubed kalwodo pi jami magi matut ki i cwinygi,

wek dano gulwod pi mar pa Rwot ma pe loke.