Jabuli 106

Ber pa Lubanga bot jone

11

Wupak Rwot!

Wumii pwoc bot Rwot, pien en ber;

Mar mere ma pe loke bedo nakanaka!

2Anga matwero tito pi tic madito matek ma Rwot otiyo,

dok anga matwero pako en ma oromo maber?

3Jo ma gitiyo gin matye atir gitye ki yomcwiny,

gin jo ma gitye ki kwo ma opore kare ducu!

4Ai Rwot, po pira ka inyutu kicani bot lwaki;

konya bene, ka ilarogi,

5wek bene anen kit ma lonyo pa joni ma iyero dongo kwede,

ci anywak yomcwiny kacel ki roki,

wek awake kacel ki joni ma gin aye luleyo ma meri.

6Wan kacel ki kwariwa watimo bal;

wan watyeko timo bal, watimo gin maracu adada. 72

Kwariwa, ikare ma gitye i Ejipt,

pe gutamo pi tic meri me aura mayam itiyo botgi,

pe gupo ikom mari madit ma pe loke,

ento gujemo woko ikom en Mamalo Twal i dog Nam Makwar.

8Ento en pud olarogi aye pi nyinge kene,

wek enyut tekone madit. 93

En ojuku Nam Makwar, ci nam otwo woko!

Ci otelo wi jone i dye nam matut calo gitye kawot i dye tim mutwo.

10En olaro jone ki i cing lukworgi,

olarogi ki i twero pa lumerokgi.

11Pii omwonyo lumerokgi woko liweng;

ngat mo acel ki ikin gi pe ma odong. 124

Lacen lwak guye loke;

ci guwero wer bene me pake.

13Ento wigi owil woko oyotoyot ikom tic ma en otiyo,

gubedo katic ma pe kong gikuru tam ma a ki bote. 145

Cwinygi opuke pi camo ringo i dye tim,

gutemo i Lubanga i tim aroo.

15Ci en omiyogi gin ma gupenye pire,

ento ocwalo ikomgi kit two marac ma balo kom dano. 166

Ikare ma nyeko omakogi ikom Moses,

ki ikom Aron ma en ngat maleng ma Rwot oyero,

17ci lobo obar omwonyo Datan woko,

ka oumu lwak pa Abiram woko bene.

18Mac oturu ki lyel iwi lwakgi;

ci leb mac ma lyeli owango jo maracu woko ducu. 197

Gucweyo cal latin twon i Koreb,

ci gubedo ka woro cal twon ma gutiyoni.

20Ma ka woro Lubanga, ma en aye won deyo,

gin oworo cal twon dyang ma mwa ma camo lum.

21Wigi owil woko ikom Lubanga Lalargi,

mayam otiyo gin me aura madito i lobo Ejipt;

22pe gupo pi gin me aura ma en otiyo i lobo pa Kam,

ki gin maracu makelo lworo ma en otiyo i dog Nam Makwar.

23Ma omiyo en owaco ni onongo ebityekogi woko,

ka nene pe Moses, ma en aye dano ma en eyero,

ocung inyime, ikin en ki lwake,

ci eloko akemone woko omiyo pe etyekogi. 248

Gucayo lobo maber ma yomo cwiny danoni woko,

ma pe gubedo ki niye wa ki acel ikom gin ma Lubanga ociko.

25Gubedo i kemagi kun gingur angura,

dok pe guwinyo lok ma Rwot owaco botgi.

26Omiyo en otingo cinge malo okwongo kwong botgi ni,

ebimiyo gito i dye tim, 279

dok ebikeyogi woko ikin rok mapatpat,

kun ekeyogi woko atata i lobo mapol. 2810

Cutcut guribe ki rok mukene ka woro jok Baal i Peor,

dok gucamo gitum ma kityero bot lubangagu ma pe gikwo.

29Gin gumiyo kiniga omako Rwot pi gin ma gutimo,

ci two gemo marac bene opoto ikomgi.

30Ento Finekaci oa malo, omiine pi tyeko lok meno,

ci two gemo otugi gik woko cut.

31Ci gubedo kapo pi lok man ni en dano ma kite atir,

dok gibipo iye bene pi kare pa yalwak ducu. 3211

Ka dok inget pii me Meriba gin omiyo kiniga omako Rwot,

pimeno omiyo Moses oneno can malit pirgi.

33Gumiyo cwiny Moses odoko kec,

oweko oloko lok ma onongo myero pe en oloki. 3412

Pe guneko jo me rok mukene,

kit macalo onongo Rwot ocikogi kwede,

35ento guribe woko ki lurok,

gubedo kalubu yo me woro cal jogi macalo lurok giworo.

36Lwak pa Lubanga gubedo ka woro cal jogi,

ma oloke odoko owic botgi. 3713

Gubedo katyero lutino awobegi ki anyiragi

macalo gitum bot jogi. 3814

Guneko jo mapol ma gin peke ki bal,

ma gin aye lutino awobegi ki anyiragi,

mayam gutyero bot cal jogi me Kanaan macalo gitum;

ci pi remo pa dano ma guoyo omiyo lobo odoko gin me kwer.

39Gudoko jo ma keni pi gin ma gutiyo;

i timgi gudoko jo ma pe gigene pi woro jogi. 4015

Ma omiyo kiniga omako Rwot ikom jone,

omiyo okwero jone woko, ma gin aye gipinyeni.

41Pimeno oweko omiyogi i cing lurok,

oweko lukworgi mayam gidagi aye gubedo kaloyogi.

42Lukworgi ounugi mada,

gudiyogi piny ite locgi.

43Rwot yam olaro jone tyen mapol,

ento gin gubedo kajemo woko ikome i gin ducu ma gutimo;

omiyo gudonyo matut i bal.

44Ento Rwot pud owinyo kokogi aye ikare ma gukok,

dok oniang ada ni gitye ki can.

45En opo pi gicikene pirgi;

pi mar mere ma pe loke omiyo Rwot odwoko cwinye ci oloko tame ikomgi.

46Omiyo jo ducu ma loyogi macalo opii

me bedo ki kica ikomgi. 4716

Larwa, Ai Rwot Lubangawa,

cokwa woko ki ikin lurok,

wek wapwo nyingi maleng, ka wapaki pi deyo.

48Kipwo Rwot Lubanga pa Icrael,

gipake nakanaka!

Jo ducu myero guwac ni, “Amen!”

Wupak Rwot!