Jabuli 108

Lega pi kony ki i cing lukwor

(Jab 57:7-11; 60:5-12)

1Ai Lubanga, cwinya omoko ikomi;

cwinya omoko ikomi ma pe loke!

Abiwero wer kun apaki ki dwon malongo!

In tipuna, coo woko!

2Wun nangana ki opuka bene wucoo woko!

An bene abicoyo rupiny miyo ceng tuc!

3Abimiyo pwoc boti ikin lwak me rok ducu, Ai Rwot;

abiwero wer me paki ikin lurok.

4Mar meri ma pe loke dit, o wa i polo,

dok adani bene dit, o wa i pol.

5Ai Lubanga, nyut diti malo i polo,

dok imii deyoni oryeny iwi lobo ducu!

6Larwa ki teki imii walo lukworwa, dok igam legawa,

wek lwak ma imaro gubwot.

7Lubanga oloko ki i kabedone maleng ni,

“Abipoko Cekem woko kideyo madit me loc,

dok abipoko nota me Cukot woko i dul ki dul bot jona.

8Gilead mera, ki Manace bene mera;

Epraim aye tok nyonyo me wiya,

ki Juda mere odo kera.

9Ento Moab aye becen me lwoka;

ci abibolo war tyena ikom Edom, me nyutu ni en obedo mera;

dok abidange matek pi loyo jo Piliciti.”

10Anga ma bikelo an i gang man ma kirumu ki cel gogo?

Anga ma bitelo wiya tera i Edom?

11In pe mono dong ikwerowa woko, Ai Lubanga?

In pe dong itelo wi monywa me cito kalweny, Ai Lubanga?

12Konywa me lweny ikom lukworwa,

pien kony ma dano miyo pe gin mo!

13Ka Lubanga tye kalweny kacel kwedwa ci wabiloyo;

en aye ma binyono lukworwa diyo woko piny.