Jabuli 104

Wer me pako Lacwec

1Pak Rwot, in tipuna!

Ai Rwot Lubangana, in idit tutwal!

In iruke ki woro kacel ki deyo;

2iumu komi woko ki dero calo iruku bongo.

Iyaro polo woko macalo kema ma kiyaro,

3dok igero rii me ot ma meri malo iwi pii.

Iloko pol odoko gadigadini,

ingweco ki gadigadini i bwom yamo. 41

Iloko yamo odoko lukwenani,

kun leb mac ma lyel gubedo lutici.

5Iketo lobo ocung matek ikom gutine,

ma pe biyenge wa ki acel.

6Iumu woko ki nam matut calo kiumu ki ginaruka,

ki pii bene omwonyo godi woko ducu.

7Ento ikare ma ijuku pii, ci oringo woko;

ikare ma owinyo dwoni omor kun idange matek,

ci orwenyo woko liweng.

8Omol ki iwi godi okato ocito piny i lung,

ikabedo mayam iyero pire.

9Iketo wang lobo ma pe myero pii ongol okat i ngeye,

wek pe dok oum lobo woko odoco.

10Imiyo wang it nyete mol i lung,

kun pii kulu mol ki ikin godi.

11Lee tim ducu gimato pii meno,

kana me tim bene gimato me neko orwo pii.

12Winyi gigero odigi iwi yadi ma inget kulu,

ci gibedo kakoko i jang yadi.

13Icwalo kot ki i polo cwer piny iwi godi,

lobo opong ki jami mabeco ducu ma in imiyo.

14Imiyo lum lot dongo me cam pa dyangi,

ki ginapita ma myero dano otii kwedgi,

wek dano opur lobo ci onong cam,

15ki kongo bwino ma yomo cwiny dano,

ki moo me wir wek wange obed ma mil amila,

ki dok ocam kwon ma miye teko.

16Yadi pa Rwot limo pii mabup,

gin aye yadi cedar me Lebanon mayam en opitogi.

17Lwak winyi mapol gigero odigi iwi yadi kunu;

winyi aramatala bene gibedo iwi yadi maboco.

18Dyegi me tim gibedo iwi godi mamalo tutwal,

ki okile giringo gikane i got.

19Iketo dwe me poko kare;

ceng ngeyo cawa me potone.

20In aye ma iketo colpiny omiyo dyewor tye;

en aye cawa ma lee ma gibedo i bunga gicako kwede wotgi.

21Lutino labwor gidwaro lee ki koko,

kun giyenyo cam ma Lubanga miyo botgi.

22Ka ceng otuc, gidok woko cen,

ci gibutu i gorogi.

23Ci dano kato woko cito katicgi

ci gitiyo tic nio wa otyeno.

24Ai Rwot, in dong itiyo lwak jami mapol!

Itiyogi ducu ki ryeko,

omiyo lobo opong ki ginacweyani.

25Nam madit malac bene tye,

ma ginacweya ma welgi pe kwane bedo iye,

gin makwo matino ki madito. 262

Mel bene woto ki iye,

dok twol ma min kulu ma icweyoni bene tuku iye.

27Gin ducu gineno wangi,

gimitoni imii botgi cam ikare ma mite kikome.

28Ka imiyogi cam, ci gigamo gicamo woko;

ka iyabo cingi imiyogi cam,

ci giyeng ki jami mabeco mada.

29Ka ikane woko ki botgi, ci gineno can;

ka ikwanyo yamo me yweyoni woko ki botgi ci gito woko,

gidok i apwa.

30Ka iketo yamo me yweyoni i igi ci gibedo kwo;

dok bene imiyo kwo manyen i lobo.

31Deyo pa Rwot myero orii nakanaka!

Rwot myero obed ki yomcwiny pi gin ma en otiyo.

32Rwot neno lobo ci miyo yenge,

en gudu godi ci giduny yito.

33Abiwero wer bot Rwot pi kare me kwona ducu;

abiwero wer me pako Lubangana ka pud akwo.

34Wek lok ma alwodo ki i cwinya oyom cwiny Rwot,

pien en aye mamiyo abedo ki yomcwiny.

35Wek kityek lubalo woko liweng ki i lobo,

dok wek jo maracu bene gurweny woko matwal!

Pak Rwot, in tipuna!

Wupak Rwot!