Jabuli 103

Mar pa Lubanga

1Pak Rwot, in tipuna;

kwona ducu myero opak

nying Rwot maleng!

2Pak Rwot, in tipuna;

wii pe owil ikom mot ducu mabeco ma en omiyi.

3En weko bala ducu,

en bene ma cango two ducu ki ikoma.

4En laro kwona miyo pe adonyo i bur,

en keto mar mere ma pe loke kacel ki kicane ikoma.

5En miya jami mabeco pi kare me kwona ducu,

kun roco tekona kare ki kare macalo pa ocur.

6Rwot ngolo kop kakare,

dok ngolo kop atir pi jo ma kiunugi.

7En otucu yub ma mere bot Moses,

ci omiyo jo Icrael guneno tic ma mere me aura. 81

Rwot lakica dok maro dano,

kiniga pe make oyot, dok mare madwong pe loke.

9En pe bibedo kajukuwa kun juyuwa kare ducu,

kinigane bene pe ri nakanaka.

10En pe pwodowa kun poro ki bal ma watimo,

dok pe culu kwor ikomwa kun poro kit roc ducu ma watimo.

11Kit macalo polo tye mabor malo iwi lobo,

mar mere ma pe loke bene dit kitmeno bot jo ma lwore.

12Kit macalo tung kunyango bor kwede ki tung kupotoceng,

en kwanyo balwa woko ducu ki ikomwa cwalo kamabor kitmeno.

13Macalo wegi lutino bedo ki kica ikom lutinogi,

Rwot bene kica mako kitmeno ikom jo ma lwore.

14En ngeyo kit gin ma en ocweyowa kwede;

en po ni wan apwa ma mwa.

15Nino me kwo pa dano obedo calo lum;

calo ature matye i poto;

16ma ka yamo okodo ikome ci ner dok two woko liweng,

ci rwenyo woko matwal.

17Ento mar pa Rwot ma pe loke bedo nakanaka

pi jo ma wore,

dok bere bedo nakanaka bot jo me yalwak ducu,

18bot jo ducu ma gigwoko gicikene,

ma gipo pi tiyo gin ma en ociko.

19Rwot ocibo komkere i polo;

en rwot maloyo ducu.

20Wupak Rwot, wun lumalaika matek,

ma wulubu cike,

kun wuwinyo lok ducu ma en waco botwu.

21Wupak Rwot, wun monye ducu me polo,

wun lutice ma wutiyo gin ma en mito!

22Wupak Rwot, wun ginacweya ducu,

i kabedo ducu ma en loyo!

Pak Rwot, in tipuna!