Jabuli 102

Lega pa bulu matye ki ayelayela

1Ai Rwot, winy legana;

wek kokona owinye boti!

2Pe ikane woko ki bota do,

ikare ma atye ki ayelayela!

Cik iti iwiny loka,

gam doga oyotoyot inino ma akok iye botini!

3Kwona tye karwenyo woko calo yito,

ma cogona ducu wang awanga calo rukmac.

4Cwinya tye katwo woko calo lum mutwo,

miti me cam mo peke i cwinya.

5Acur matek malongo;

ringo koma omoko woko ikom cogona liking.

6Abedo calo tula ma bedo i tim aroo,

calo tula ma bedo iwi obur.

7Abutu ma nino pe mako wanga,

atye calo winyo ma bedo kene iwi ot malo.

8Lukwora giloko lok agec ikoma dyeceng jwi,

jo ma nywara gilwongo nyinga kun giceno ki jo mukene.

9Buru dong oloke odoko cama,

arubu pig wanga ki gin amatana,

10pi lyeto me akemoni ki kinigani;

i ila malo yaka ibola woko cen.

11Kwona obedo calo tipu me otyeno ma rwenyo woko oyotoyot;

atye kaner woko calo lum.

12Ento in ibedo iwi komkeri matwal, Ai Rwot;

yalwak me kare ducu gibipo piri.

13Ibia ci kica bimaki ikom Cion;

kare dong oromo me nyutu beri bote;

kare ma iciko pire dong oromo.

14Pien lutici gimare, kadi bed dong kimuke kirete woko piny,

kica makogi ikome kadi bed dong odoko apwa.

15Rok ducu bilworo Rwot,

luker ducu ma iwi lobo gibilwore pi tekone.

16Rwot bigero Cion odoco;

ci en binyutu dit mere.

17En biwinyo lega pa jo ma piny dong obwoyogi woko adada,

pe bicayo lega me bako dog ma kikelo bote.

18Kicoo lok ma otime pi yalwak me kare ma bibino anyim,

wek jo ma pud peya kinywalogi gupak Rwot kun giwaco ni,

19“Rwot oneno piny ki i kabedone maleng matye malo,

en oneno piny i lobo nia ki i polo,

20me winyo koko pa lumabuc,

wek egony jo ma dong kityeko ngolo kop me to iwigi.”

21Ci dano gibipako nying Rwot i Cion,

gibipake i Jerucalem,

22ikare ma luker ki rok ducu coke kacel,

pi woro Rwot.

23Rwot oturu teka woko ma pud atidi;

ojwiko nino me kwona obedo manok.

24Awaco ni, “Ai Lubangana, pe ikwany

kwona woko ma pud peya atii!

Rwot, in ma ibedo nakanaka ikare pa yalwak ducu.” 251

Ikare macon ma okato angec iketo guti me te lobo,

dok in aye ma itiyo polo ki cingi.

26Gin birweny woko, ento in ibedo meri matwal;

gibitii woko macalo bongo.

In ilokogi macalo ginaruka, ci gitum woko liweng;

27ento in kiti acel, mwaka me kwoni bene pe gik.

28Lutino pa lutici bikwo ite gwoki,

gibibedo ki kuc labongo peko mo;

dok in aye ma ibigwoko likwayogi.