Jabuli 101

Cike pa rwot

1Abiwero wer mamako adani ki ngolo kop atir ma meri;

abiwero wer boti, Ai Rwot.

2Abiketo cwinya me lubu yo ma atir ma pe tera i bal.

Ibibino bota awene?

An abibedo gira i oda ma cwinya leng;

3pe abiketo kit mo marac inyima me aluba.

Adag tic pa jo ma giloke ci gibwoto Lubanga woko;

pe abiye ni aribe kwedgi wek kitgi oguda.

4Pe abibedo ki cwiny me ngak woko ki i yo ma atir wa ki acel,

pe abitamo tam mo me timo gin marac.

5Abineko dano ma kwoto lawote woko;

pe abiciro dano ma nyate dok labwami.

6Abineno jo ma bedo i lobo ma gigeno Lubanga ki kica,

wek gubin gubed kacel kweda i gang kala;

ngat ma lubu yo ma atir ma pe tere i bal bitiyo tic bota.

7Lagoba mo pe bibedo i oda;

ngat ma labwolo pe bimede ki tic inyima.

8Nino ki nino abijwero jo maracu woko ducu ki i lobo,

abiryemo lutim maracu woko liweng ki i taun madit pa Rwot.