Nekemia 8

Ejira okwano buk me Cik bot jo Icrael

1Ikare ma dwe me abiro oromo, onongo jo Icrael dong gitye i taun gi. Ci lwak gucoke ki cwiny acel idyekal ma inyim Dogcel me Pii; ci gutito bot Ejira ni okel buk me Cik pa Moses mayam Lubanga omiyo bot jo Icrael. 2Ci Ejira okelo buk me Cik inyim kacoke, matye iye co ki mon ki jo ducu mayam giromo winyone ki niang iye maber. Man obedo inino dwe mukwongo me dwe me abiro. 3Ejira ocako kwanone inyimgi, kun ocung okemo dyekal ma inyim Dogcel me Pii. En ocako kwanone i odiko nio kwede wa dyeceng, ma kwano inyim co ki mon ducu ki jo ma gitwero niang loke man maber, kun dano ducu bene guciko itgi kawinyo lok ma i buk me Cik.

4Ejira ocung iwi abam bao ma kitiyo pi kwano lok meno. Jo magi yam gucung kangete tung lacuc: Matitia, Cema, Anaya, Uria, Ilkia, ki Maceya; ka dok jo magi gucung kangete tung lacam: Pedaya, Micael, Malkija, Kacum, Kacbadana, Jekaria, ki Meculam. 5Ikare ma Ejira ocung malo kamaleng i kabedo me kwano buk, lwak ducu guciko wanggi ikome. Teke en oyabo buk me cako kwanone ci dano ducu gua malo gucung acunga. 6Ejira okwongo ki pako Rwot, Lubanga madit; ci lwak ducu gugamo ni, “Amen, Amen,” kun gitingo cinggi malo; ka dok guryebe piny, ci guworo Rwot ma gukulu wigi piny i ngom.

7Ka dok lwak gucung i kabedogi, ci Lulevi magi: Yecwa, Bani, Cerebia, Jamin, Akub, Cebetai, Kodia, Maceya, Kelita, Ajaria, Jojabad, Kanan, ki Pelaya, gukonyo lwak me niang te Cik maber, kun onongo lwak gucung i kabedogi mot. 8Gukwano lok me cik nia ki i buk me cik, en aye buk me Cik pa Lubanga, dok gugonyo teloke ma atir bot lwak, wek guniang iye maber lok ma kikwano.

9Ka lwak dong guwinyo lok ma kikwano ki i buk me Cik, ci gin gucako koko cut. Ci Nekemia ma onongo en laloc, ki Ejira ma onongo en ajwaka dok bene lapwony Cik pa Lubanga, kacel ki Lulevi ma gupwonyo lwak guwaco bot lwak ni, “Man aye nino maleng bot Rwot Lubangawa; pe wukum dok bene pe wukoki.” 10Dok owaco botgi ni, “Dong wuwot, wucit wucam gin ma moo ki wumat kongo bwino malingo, wucwal cam mogo bot dano mo ma pe ki cam; pien tin aye nino maleng bot Rwotwa; pien yomcwiny pa Rwot en aye tek mewu.” 11Lulevi gujuku dano guling mot, kun giwaco ni “Wubed mot laling, pien man aye nino maleng; pe wubed iye ki cwercwiny.” 12Ci lwak guket gucito i gangigi kacam ki kamat, dok gucwalo cam mogo ma gitye kwede bot luwotgi mukene, pi bedo ki yomcwiny madwong, pien guwinyo lok ma kikwano dok bene kitito botgi ci guniang iye maber.

Karama me nino madito me Bolo

13Ikom nino me aryone ludito ma giloyo dog odi pa kwarigi ma gitye ikin lwak ducu, kacel ki ajwaki ki Lulevi, gucito bot Ejira ma lapwony Cik pa Lubanga pi ngiyo lok ducu matye i buk me Cik. 141

Ci gunongo kama kicoyo i buk me Cik ni, Rwot yam ociko Moses ni jo Icrael omyero gubed i bolo pi kwero nino madito me dwe me abirone, 15dok omyero guywek loke wek gutit i gangigi ducu ki i Jerucalem, kun giwaco ni, “Wucit iwi godi kakelo jang jeituni, ki jeituni ma i tim, ki yadi ma ngwecgi kur, yat otit ki yadi ma potgi oluk wek wayub bolo mapol, kit ma kicoyo i buk me Cik.” 16Lwak ducu gucito kakelo jami ma kitito pireni ci gutiyo bolo mapol me bedogi, kun dano acel acel timo mere, iwi odigi, idyekalgi, ki idyekal me Ot pa Lubanga, ki idyekal ma i Dogcel me Pii, ki idyekal ma i dogcel ma kilwongo ni pa Epraim. 17Ki jo ducu ma con gudwogo ki i opii i rok mukene gutiyo bologi ci gubedo iye; Cake ikare pa Yocwa wod pa Nun nio kwede wa inino meno jo Icrael pe gutiyo kitmeno. Ci gubedo ki yomcwiny madit tutwal. 18Dok nino ki nino kikwano lok matye i buk me Cik pa Lubanga nicake ikom nino mukwongo nio kwede wa inino me agikine. Gukwero nino me coke maleng pi nino abiro; ikom nino me aborone, gubedo ki coke maleng me lorone, ma olubu cik kikome.