Nekemia 6

Piro lok ikom Nekemia

1Ka Canbalat, Tobia, Gecem, kacel ki jo ducu ma gin lukworwa guwinyo ni atyeko gero cel woko, dok ni kamo ma omuk ma twolone dong peke, kadi bed ikare meno onongo pud peya aketo rii me dogola me loro dog gang ducu, 2ci Canbalat ki Gecem gucwalo lok bota, kun giwaco ni, “Bin wek wabed kacel i gang mo ma i bar me Ono.” Ento gin onongo gimito tima marac. 3An acwalo kwena botgi kun awaco botgi gin ni, “An atye katiyo tic mo ma pire dit mada, pe atwero bino kunu karwate kwedwu. Pe atwero weko tic man cung nono pi bino me nenowu keken.”

4Gin gubedo kacwala kwena teretere marom kitmeno tyen angwen kulu, dok an bene adwoko botgi lagam lakite acelu. 5Ka dok Canbalat ocwalo latice bota ki waraga i cinge ma pe kimwono doge pi lok lakite acelu pi tyen me abice. 6Lok man kwane kitman ni,

“Gecem otita ni lok tye kawot ikin lwak ma gicok kwedwa ni meno, in kacel ki lwak pa Lujudaya wumito jemo; meno aye gin ma omiyo wutye kagero cel odoconi. Lok man tito bene ni in ikete keni me bedo rwotgi. 7Dok bene en otitiwa ni in dong ityeko keto lunebi me tucu lok atyer i Jerucalem ikomi ni, ‘In dong itye rwot i Juda.’ Loki to dong kibitito wa bot rwot Aritakcec. Pieno ber in kong ibin warib tame wayub loke kacel kwedi.”

8An dok adwoko lok bote, kun awace ni, “Pe tye gin mo macalo meno ma otime, lok meno wun wungwaro ki wiwu.”

9Onongo guteme me buruwa wek wagik tic, kun gitamo ni, “Komwa bidoko nyap i tic, ci gimiyo tic dong pe bitime.” Ento kombedi alegi, Ai Lubanga, dong imiya abed matek.

10Ka acito wa i ot pa Cemaya wod pa Delaya, ma wod pa Meketabel, ma onongo pe twero weko ode, ci cut an acito kalime. En ka oneno an ci owaca ni, “Wek wacit kwedi kacel wa i Kabedo Maleng ma i Ot pa Lubanga, ci walor dogola me Ot pa Lubanga woko; pien koni gin bibino kaneko in woko. I dyewor mo keken gibibino gineki woko.”

11Ci an agamo doge ni, “An pe acal ki ngat ma ringo lawote ci kane wokoni. In itamo ni abitemo laro kwona ki kane i Ot pa Lubanga? Pe abitwero cito kwedi pi tiyone.” 12Ka abedo katamo lok man lacen, ci aniang atir ni Lubanga onongo pe oloko kwede, ento onongo Tobia ki Canbalat aye kara guwile ki lim wek otit lok macalo meno me bito an. 13Guwile ki lim wek obur an abed ki lworo apot i bal, wek kicak balo nyinga kun giyeta kwedegu.

14Ci alego ni, “Ai Lubangana, po ikom Tobia ki Canbalat, pi gin ma gubedo katimone ikoma, ci iket can ikomgi. Dok ipo ikom lanebi ma dako ma nyinge Noadia kacel ki lwak lunebi mukene ducu mayam gutemo buru an ki miya lworo.”

Agiki me tic

15Inge tic pi nino pyere abic wiye aryo tic me gero cel otum woko, inino dwe pyere aryo wiye abic me dwe me Elul.1 16Ikare ma lumerokwa ma gibedo i rok ma orumuwa guwinyo lok man, ci lworo omakogi ma komgi oto woko lirut; pien dano acel acel onongo ngeyo atir ni tic man otiine pi kony pa Lubanga. 17Ento ikare meno ducu ludito pa Lujudaya gubedo kacoyo waraga mogo ma pole kicwalo bot Tobia, ki Tobia bene coyo waraga cwalo botgi. 18Lwak mapol ma i Juda onongo gitye tung bote ma gucike bote ki kwongo kwong, dok en onongo onyomo nyarpa Cekania ma wod pa Ara. Dok wode Yekokanan bene onongo yam onyomo nya pa Meculam wod pa Berekia. 19Jo mogo bene guloko inyima lok kom tic maber ma Tobia yam otiyo, ka dok bene kidwoko bote lok ducu ma an awaco botgi, en Tobia yam omede ki cwalo waraga bota pi miyo lworo opot ikoma.