Nekemia 5

Diyo lucan

1Lacen jo mapol, co kacel ki mon gi, gucako ngur ikom Lujudaya wadigi. 2Jo mogo guwaco ni, “Wan kacel ki lutino awobewa ki anyirawa dong wadoko dwong; wamito kal me acama wek wabed kwo.” 3Jo mukene bene guwaco ni, “Wan wajengo potiwa, poti olokwa, kacel ki odiwa ducu, wek wanong kal wacam, pien kec tye marac.” 4Dok jo mukene bene guwaco ni, “Wan dong watyeko deno lim me culu mucoro pa rwot kun wajengo potiwa ki poti olokwa pire. 5Wan mono pe wamito jami marom aroma ki jami ma Lujudaya wadiwa gimito? Lutinowa kono pe giber marom ki lutinogi? Ento watye kamiyo lutinowa gibedo opii. Dong watyeko cato anyirawa mukene bene woko me bedo opii. Wan pe watye ki twero mo, pien dong kityeko kwanyo potiwa ki poti olokwa woko ducu ki botwa.”

6Ikare ma an Nekemia awinyo koko meggi kacel ki lok pa lwak kiniga omaka matek, 71abedo kalwodo loke ki icwinya kekena, cutcut acako laro lok ki lutela kacel ki ludito ma giloyo lobo, kun awaco ki gin ni, “Wun wutye kadiyo omegiwu.” Alwongo kacoke madit man me neno lok ikomgi, 8kun awaco botgi ni, “Wabedo kakoko omegiwa ma gin Lujudaya ki lim kit macalo watwero, mayam kicatogi woko bot lurok. Ento wun kombedi wutye kacato omegiwu kikome ni wan Lujudaya wadgi aye dok wa wilgi!” Ludito guling alinga litik, ma pe gitwero nongo lok mo ma myero guwaci. 9Ka dok awaco ki gin ni, “Gin ma wutye katiyoneni pe ber. Pe wutamoni wun omyero wulwor Lubangawa i timwu ducu? Ka pe wulworo Lubangawa, ci miyo lumerokwa gicayowa. 10Ento an kacel ki utmegina ki lutica ducu wamiyo kideno lim ki kal ki botwa. Wan dong waweku tam ducu me limo magobani obedi. 11Tin wudwok potigi odok i cinggi, poti olokgi, poti jeitunigi kacel ki odigi ducu. Dok wungol banya ma gitye kwede botwu macalo me lim ryalgi, kal, kongo bwino, nyo moogu ma wubedo kajogone ki botgini.” 12Ci ludito gugamo ni. “Wan wabitiyo kit ma iwaconi, wabidwoko jami magi ducu botgi, dok pe wabipenyogi ni gucul banyawa.” Alwongo ajwaki, ci amiyo ludito gukwongo kwong ma moko ni gibigwoko cikegi. 13Acako yengo kitambara ki i pyera kun adongo taca ma awaco ni, “Man aye kit ma Lubanga biyengo kwede dano mo ma ikinwu ma pe bicobo kwong man kun gwoko cike. Ci Lubanga biyengo odiwu ki jami ducu ma wutye kwede, biweko wudong nono labongo gin mo.” Jo ducu ma onongo gitye i kacoke gugamo ni, “Amen” dok gupako Rwot. Ci lwak gutiyo kit macalo gucike kwede.

14Pi mwaka apar wiye aryo ma onongo an laloc me lobo Juda, cake i mwaka me pyere aryo nio kwede i mwaka pyere adek wiye aryo me loc pa rwot Aritakcec, pe tye utmegina mo kadi ki an ma ocamo kit cam ma kiyubu ni kimii bota macalo laloc me lobo. 15Luloc mayam gubedo i loc ma gutelo nyima guketo peko madwong ikom lwak pi jogo lim me ryal pyere angwen, ki kongo bwino, ki cam. Luticgi guloko lwak gudoko opiigi, guketo peko madwong bene ikom lwak. Ento an pe atimo kumeno, pien an abedo kalworo dog Rwot Lubanga. 16An aketo kerona ducu kagero cel meno odoco, pe alimo dul lobo mo me bedo mera. Dok lutica ducu gucoke kunu gubedo mere katiyo tic me gedo. 17Dok onongo atye ki jo maromo miya acel ki pyere abic, ma gin Lujudaya ki ludito maloyo lwak, ma wabedo kwedgi dok ma wacamo kwedgi cam kacel iwi mejana, medo ikom jo ma gubino bota ma gua ki ikin lurok ma gurumuwa. 18Nino acel acel onongo aneko twon acel, ki romi mabeco abicel, ki dok kineko gweni mapol pira kitmeno dok pi nino aparapar myero kionya kongo bwino manyen. Ento ikom jami magi ducu ma atiyo pe abedo ki miti mo ni kimiya dul cam mo ma giciko ni laloc myero onong, pien onongo lwak dong gitye ki peko madwong atika ma obwoyo komgi woko. 19Alegi, ai Lubangana, po pi gin ducu ma atiyo pi lwak man, wek anong pwoc pire.