Nekemia 4

Nekemia oloyo jo ma gitye ki mone ikom tice

1Ikare meno, ka Canbalat owinyo ni wan Lujudaya watye kagero cel me Jerucalem odoco, ci kiniga ki akemo madwong omake matek, ka dok ocako cayowa. 2Ki kiniganeni en ocako nywarowa ki inyim luwote kacel ki inyim mony me Camaria kun waco ni, “Man Lujudaya ma gigoroni gitye katiyo gin ango ka? Gitamo ni gitwero gero taun madit man odoco? Gibityero gitum mo? Gitwero tyeko tic man inino acel keken? Gitwero payo godi me gedo ducu ki ikom godi ma gudure iwi odur yugi ma kiwangoni?” 3Tobia ma dano me Ammon onongo tye ocung kangete, ci owaco ni, “Kit cel ango mono ma gin twero gerone? Kadi too mamwani ka owoto ki iwiye, ci muku cel gotgini reto woko piny!”

4Ci alego ni, “Ai Lubangawa, winy ka gicayowa; wek lok cac ma gicayowa kwede ni odok iwigi, imii kiyak jamigi woko ducu dok kimakgi kitergi i opii i lobo pa lurok. 5Pe iwek balgi mo, dok wii pe omyero owil ikom balgi kadi ki acel, pien guyetowa wan ma watye kagedoni.”

6Kitmeno wan wamede ki gero cel; ci watyeko gero cel woko oyotoyot oo wa malo i nucu me bore mayam con ca. Man otime pien lwak onongo gitye ki cwiny me tic kikome.

7Ento ikare ma Canbalat ki Tobia ki jo Arab, jo Ammon ki jo Acidod guwinyo ni watye kawot anyim ki tic me yubu cel me Jerucalem ki dok ni wacako culu kama twolone woko ducu, ci kiniga omakogi matek. 8Ci gucoke kacel kapiro lok me cito ka lweny ikomwa i Jerucalem, ki kelo anyobanyoba bot dano ma gitye kunu. 9Ento wan wamede ki lego Lubangawa, dok waketo co me kuru piny me gwokowa dyeceng ki dyewor ki ikomgi.

10Ento jo Juda gubedo kawero wer ma waco ni. “Kero kom luywek godi dong otum woko; dok yugi bene dong odure iye lipim; watwero gero cel man dong tin ningning?”

11Lukworwa gutamo ni wan pe wabitwero nenogi dok pe wabitwero ngeyo gin matye katime, nio ka gibio wa botwa kany, ci ginekowa dok gigiko ticwa woko cut. 12Lujudaya ma gibedo ikin lumerokwa gubedo kabino botwa kare ki kare kun gitito botwa tyen ma romo apar kulu yub ma lumerokwa gitye kwede ikomwa; kun gibino ma gia ki i kabedo ducu kama gibedo iye. 13Oyotoyot acako poko jami lweny magi bot lwak, pala lucwan, tongi ki atum, ci aketogi gubedo i kabedo mo ma inge cel kun lubu dogolagi, kama pud odong twolo. 14Ka aneno gin matye katime, ci aa malo awaco bot ludito ma gin lutel wic, ki ludito ma giloyo lwak, ki bot lwak ducu ni, “Pe wubed ki lworo mo ikom lukworwa. Wupo ni Rwot dit dok kilworo; pi eno wun myero wulweny matek pi jo me lobowu, pi lutinowu, pi monwu, ki pi paciwu.”

15Ka lumerokwa guwinyo ni lok me yubgi otyeko winye botwa ci guniang ni Lubanga oturu yubgi woko, ci wan ducu wacako dok cen katic ikom cel, dano acel acel odok i dog tice.

16Cake ikare meno nucu pa lwaka gubedo kagedo, ki nucugi mukene gumako tonggi, kwotgi, ki atumgu, kun gin guruku koti me nyonyo lageng korgi me lweny, kun ludongo pa lwak ducu gucwako jo me ot pa Juda, 17ma onongo gitye kagero cel odoco. Jo ma gin luting yec bene gubedo katic kit man, dano acel acel tingo jami mamite pi gedo ki cinge acel, ki jami lwenye nongo omako icinge tung cel. 18Ka dok dano acel acel ikin jo ma gin lugedo bedo ki pala lucwane ma otweyo woko i pyere kun nongo tye kwede ka gedo. Dano ma en lakut tum onongo bedo mere cok gire kangeta. 19Atito ki rwodi kacel ki ludito ma giloyo lwak i dog tic ni, “Tic dong onya odoko dwong tutwal omiyo kinwa odoko lac ki kinwa bene opoke woko ki ikom cel, ki kin dano bene odoko bor ki lawote. 20Ci i kabedo ma wuwinyo tum okok iye, myero wucoke botwa kunu. Lubangawa bilweny pirwa.”

21Kitmeno, wabedo katic ikom cel nino ducu cake okokgweno nio idyewor ka lakalatwe otuc, ma nongo nucu pa lwakwa mukene gucung ki tonggi icinggi gikuru piny. 22An dok awaco ki lwak ikare meno ni, “Wek dano acel acel ki latice gudony gubut i Jerucalem, ci gubed kakuru piny pirwa idyewor ka dok gutii tic idyeceng.” 23Pe tye dano mo ikinwa, kadi wa an kikoma nyo utmegina nyo lukur piny ma gulubu kora ma olunyu bongine. Dano acel acel obedo ki jami lwenye i cinge.