Nekemia 3

Gero cel me Jerucalem odoco

1Eliacib ma ajwaka madit, ki ajwaki ma gin utmegine, gugero Dogcel me Romo. Gukwero wek obed maleng dok guketo kikane. Gugero nio wa i lubele me Miya ki Lubele ma kilwongo ni Kananel.

2Jo Jeriko gugero dul mukene macok kwede ki Jakur wod pa Imri ogero bene dul ma lubu meno.

3Likwayo pa Acena gugero dogcel me Rec; guriyo baone ka guketo kikane, bolti, ki rii me dogola me lorone.

4Dano ma olubugi obedo Meremot wod pa Uria, ma wod pa Kakoj, ma oyubu dul ma ingete.

Dano ma oyubu dul ma ingete obedo Meculam wod pa Berekia ma wod pa Mecejabel.

Dano mukene ma oyubu dul ma ingete obedo Jadok wod pa Baana.

5Jo ma guyubu dul mukene ma ingete malubu gin aye jo Tekoa, ento luditogi me awora pe guye tiyo tic mapek ma jo ma loyogi gumiyogi.

6Ka dok Joyada wod pa Pacea, ki Meculam wod pa Becodeya guyubu Dogcel Macon: guriyo baone ka guketo kikane, ki bolti ki rii me dogola me lorone.

7Jo ma guyubu dul mukene ma ingete obedo Melatia jo Gibeon, ki Jadon jo Meronot kacel ki jo ma i taun gi me Gibeon ki Mijpa, ma gitye ite loc pa laloc me lobo ma Loka Kulu.

8Ujiel wod pa Karaya ma en latet jabu bene oyubu dul mukene ma ingete.

Ngat mukene ma olube obedo Anania ma layub moo ma ngwece kur, en oyubu dul mukene; ci guroco Jerucalem odwogo kakare nio kwede wa ikom Cel Malac.

9Ngat mukene ma olubugi en aye Repaya wod pa Kur, ma en loyo nucu lobo ma orumu Jerucalem, en bene oyubu dul mukene.

10Ngat mukene ma olubu obedo Jedaya wod pa Karumap, en oyubu mere dul ma okemo ode; ki ngat ma olube obedo Katuc wod pa Kacabneya, en oyubu dul mukene.

11Malkija wod pa Karim ki Kacub wod pa Pakat-moab guyubu dul mukene ki cel Gogo me Lubele me Tedo Mugati ducu.

12Ngat mukene ma olubu obedo Calum wod pa Kalokeci, maloyo nucu lobo ma orumu Jerucalem, en oyubu dul mukene (ki anyirane bene gukonye.)

13Kanun ki jo ma gibedo i Janoa guyubu dogcel ma cito i nota. Guroco cel odok kakare ka guketo kikane, ki bolti ki rii me dogola me lorone, ka guyubu cel gogo ma bore romo mita miya angwen ki pyere angwen, nio kwede wa i dogcel ma cito iwi odur.

14Malkija wod pa Recab, ma laloc me lobo ma orumu Beta-kerem, oyubu dogcel ma cito iwi odur; ogero odoco ka oketo kikane, ki bolti ki rii me dogola me lorone ducu.

15Calum wod pa Kolkoje, laloc me lobo Mijpa, oyubu Dogcel me Wang It; ogero odoco dok oumu wiye ka oketo kikane, ki bolti ki rii me dogola me lorone ducu; ka dok en ogero cel orumu Kut Cela macok ki poto pa rwot, nio kwede wa i rwom ma lor piny nia ki i taun madit ma i kal pa Daudi.

16Ngat ma olubu en obedo Nekemia wod pa Ajbuk, ma laloc me nucu lobo Bet-jur; en oyubu kama okeme ki Lyel pa Daudi, macok ki kut ma kikwinyo akwinya ki cing, tung odi pa twoni oteka lweny.

Lulevi ma gubedo katiyo tic ikom cel

17Jo ma olubu en obedo Lulevi magi: Rekum wod pa Bani, ki ngat ma olube obedo Kacabia, ma laloc me nucu lobo ma orumu Keila; guyubu pi nying lobone.

18Lacen utmegigi bene ma guyubu but cel mukene, gin ene: Bavai wod pa Kenadad, ma laloc me nucu lobo ma orumu Keila.

19Ngat ma olubu en obedo Ejer wod pa Yecwa, ma laloc me Mijpa; en oyubu dule me aryone mukene ma okeme ki ot kano jami lweny me mony ma itwok cel.

20Ngat ma olubu en obedo Baruk wod pa Jabai; en oyubu dule mukene nia ki i twoke ma tung dogola me ot pa Eliacib ajwaka madit.

21Ngat ma olubu en obedo Meremot wod pa Uria, ma wod pa Kakoj; oyubu dul ot mukene nia ki idogola me ot pa Eliacib nio wa i agiki ot.

Ajwaki ma gutiyo tic ikom cel

22Jo ma gulube obedo ajwaki ma gibedo i lobo bar, guyubu dul mukene.

23Jo ma olubugi obedo Benjamin ki Kacub; guyubu dul mukemo odigi.

Ngat ma olubugi obedo Ajaria wod pa Maceya, ma wod pa Anania ma oyubu mere ma cok ki ode kikome.

24Ngat ma olubu en obedo Binui wod pa Kenadad; en oyubu dul mukene, nia ki ikom ot pa Ajaria nio kwede i twok cel kama ogoneni.

25Ka Palal wod pa Ujai oyubu gule ma i iye, kacel ki lubele ma okemo ot pa rwot ma idyekal pa lukurpiny.

Ngat ma olubu en obedo Pedaya wod pa Paroc.

26Lutic i Ot pa Lubanga ma gibedo ikom Opel, guyubu dule mukene macok ki Dogcel me Pii tung kunyango me lubele me kuru ot pa Lubanga.

27Jo ma gulubu en obedo jo Tekoa; guyubu dul mukene mukemo lubele madit ma wiye ocudu malo likung nio kwede wa ikom cel macok ki Opel.

28Ajwaki guyubu ka wi Dogcel me Aguragura, kun ngat acel acel yubu ma okemo tung ode kikome.

29Ngat ma olubugi obedo Jadok wod pa Imer ma oyubu mere kama okemo ode kikome.

Ngat ma olubu en obedo Cemaya wod pa Cekania, ma lagwok dogcel ma tung kunyango: en oyubu bene dul mukene.

30Jo ma gulube obedo Anania wod pa Celemia, ki Kanun wod pa Jalap me abicele, guyubu dul mukene.

Ngat ma olubu en obedo Meculam wod pa Berekia ma oyubu kama okemo kicikane.

31Ngat ma olubu en obedo Malkija, ngat acel ikom lutet jabu; en oyubu dul mukene nia ki i ot pa lutic i ot pa Lubanga ki pa lucatwil, ma okemo dogcel me coyo nying jo nio kwede wa i kicika mamalo ma itwoke.

32Ikin kicika mamalo ma itwoke ki Dogcel me Romo, jo ma giliyo jabu, ki lucatwil aye guyubu dul mukene meno.