Nekemia 2

Nekemia ocito i Jerucalem

1I dwe me Nican, i mwaka me pyere aryo me loc pa rwot Aritakcec, ma onongo rwot tye kacam, akwanyo kongo bwino atero bote. Onongo yam peya abedo ki cwercwiny mo inyime. 2Rwot ocako penya ni, “Pingo wangi nen ki can kun in inen calo komi yot do? Man can mo aye mono tye i cwinyi bo?” Cutcut lworo otugi maka woko matek. 31Ci agamo dog rwot ni, “Rwot Aritakcec obed kwo nakanaka! Wanga pe twero nen ki can ningning, ma kun taun madit kama kiyiko iye kwariwa ducu dong odoko obur, ma dog gangine ducu kiwango woko liweng ki mac?” 4Rwot dok openya ni, “Dong imito gin ango kono?” Cutcut alego Lubanga me polo. 5Ka dong agamo dog rwot ni, “Kace ineno ni ber, ladita rwot, ka itwero ye legana, wek acit i lobo me Juda i gangkal kama kwariwa kiyikogi iyeni, wek acit ayub taun madit meno odoco.” 6Rwot odoka iye ma onongo dakere obedo kangete ni, “Wot meno biteri kare marom mene, dok ibidwogo awene?” Ci atite bene nino ma abia iye kikome; ci rwot oye pi citona kunu.

7Ka dok awaco bot rwot ni, “Kace ineno ni ber, myero kicoo waraga ci imiya ater bot luloc ma i lobo matye Loka Kulu, ma tito botgi ni myero guye akat acit i Juda. 8Dok apenyo rwot bene ni omyero oco waraga omiya ater bot Acap, ma lagwok bunga pa rwot, wek omiya yadi wek kitii ki bao pi yubu dogcel me gogo ma gwoko Ot pa Lubanga, ki pi cel ma orumu taun, ki pi ot ma an abibedo iye.” Ci rwot oye ci omiya gin ducu ma alege pire, pien Lubanga onongo tye kakonya.

9Ci rwot ocwalo an kacel ki ludito me mony ki dul pa wegi aguragura, ci acito i lobo matye Loka Kulu tung kupotoceng, ci amiyo waraga pa rwot bot luloc me lobo. 10Ento Canbalat ma jo Bet-koron, ki Tobia ma en jo Ammon, ka guwinyo lok man, ci gubedo ki keco i cwinygi matek pien gungeyo ni dano mo obino pi konyo kor jo Icrael.

11Ci acito i Jerucalem arii kunu pi nino adek 12ma pe atito bot ngat mo tam ma Lubanga otyeko keto i cwinya, ma myero atii kwede pi Jerucalem. Cutcut i cwiny dyewor aa malo ci wacako wot kacel ki lurema mogo. Pe onongo watye ki lee mo mukene kono kana ma abedo iwiyeni keken. 13Akato acito woko i dyewor kun awok i dogcel me cito i nota nio kwede iwang It pa Too ki i dogcel ma cito wi odur, ci acako ngiyo cel me Jerucalem ducu mayam kimuku opoto woko piny, kacel ki dogcel ducu mayam kiwango woko liweng ki mac. 14Ka dok aloke acito i Dogcel me Wang it ki i Kut pa rwot. Kana ma abedo iwiyeni onongo pe twero nongo yoo mo ma myero ekat ki iye, 15omiyo aa acito kangiyo cel kun awok ki i nota; ka adok cen i taun madit ki i dogcel ma cito i nota, kun adok cen awok ki i yoo ma acito kwede. 16Pe tye ngat mo ikin ludito ma giloyo lwak ma ongeyo kama acito iye ki gin ma abedo katiyone. Onongo peya atito gin mo bot Lujudaya, ajwaki, ludito ma giloyo lwak ducu, kadi ki bot jo mukene ma onongo omyero gutii tic meno.

17Ka dong awaco botgi ni, “Wunen kit ayela ma watye kwede kombedi, kong wunen Jerucalem dong odoko obur, wa dog cele ducu kiwango woko. Wubin wek wacaku gero cel me Jerucalem odoco, wek lewic pe obed kamakowa.” 18Ka dok atito botgi kit macalo Lubanga obedo kweda dok okonya maber, kacel ki lok ducu ma ceng rwot owaco bota. Gin gugamo ni, “Wacaku gerone odoco.” Ci guyube me cako tic cut, guketo cwinygi me tiyo tice maber. 19Ento ka Canbalat ma jo Bet-koron, ki Tobia ma latic pa jo Ammon, ki Gecem ma Laarab guwinyo pi gin ma watye katiyone, ci gucako nywarowa kun gicayowa bene ma giwaco ni, “Man gin ango ma wutye katiyoneni? Wun wumito jemo ikom rwot?” 20Ci adok iye botgi ni, “Lubanga me polo aye bikonyowa, wan lutice, dong wabicako gedo. Ento pe tye dul mo ma kipoko ki wun i Jerucalem, wa nyingwu bene peke i tekwarone.”