Nekemia 1

Nekemia olego pi Jerucalem

1Man lok pa Nekemia wod pa Kakalia:

I dwe me Kiclev, i mwaka me pyere aryo me loc pa rwot Aritakcec, an Nekemia onongo atye i taun madit me Cuca, 2ci Kanani, ma ngat acel ma ikom utmegina, obino bota kacel ki jo mogo ma gua ki i Juda. Ci an apenyogi lok ikom Jerucalem ki ikom jo ma gubwot, mayam kiterogi i opii ci gudok cen kunu. 3Gin guwaca ni, “Jo ma gitye i lobowa kunu ma gubwot mayam kiterogi i opii gitye ki peko madit mada ma jo mukene cayogi bene; ki dogcel me Jerucalem kimuku woko opoto piny, dok dog taun ne bene ducu kiwangogi woko ki mac.”

4Ka awinyo lok meno ducu, ci abedo piny akok matek. Abedo kakumu pi nino mapol; kun arii kec ma pe acamo cam ento abedo kalego Lubanga me polo. 5Alego kun awaco ni, “Ai Rwot Lubanga me polo, in idit, dok wabedo ki lworo inyimi. In Lubanga me ada dok igwoko gicikeni ki mar meri ma pe loke pi jo ma gimari dok ma gilubu cik meri. 6Rwot, nena, dok iwiny legana, ma atye kalegone dyeceng jwi ki dyewor bene pi lutici, lwak me Icrael. Atucu balwa inyimi ni wan jo Icrael watyeko timo bal inyimi. Eyo, an ki jo me dogola pa kwara watimo bal. 7Wan watimo gin marac mada inyimi, pe wabedo katiyo gin ma iciko, pe bene walubu cik meri mayam imiyo botwa kun wok ki bot latici Moses. 81Po ikom lok mayam iciko ki latici Moses, kun iwaco ni, ‘Ka pe wulubu cika; ci abikeyowu woko ata ikin lurok; 92ento ka wuloke wudwogo bota kun wulubu cika, kadi bed kikeyowu kiketowu woko ata nio wa i agiki piny, an abicokowu adwokowu cen wa i kabedo ma dong atyeko yerone pi nyinga wek wuwora iye.’ 10Rwot, jo man gin lutici, dok gin lwaki mayam ilarogi ki tweroni madwong dok ki teki. 11Ai Rwot, kombedi dong in iwiny legana ki lega pa jo mukenegu ducu ma gitye ki cwiny me woro in. Mina gum tin ai Rwot, dok imii kica omak rwot Aritakcec ikoma.”

Ikare meno onongo an abedo ladit maloyo lok ikom kongo bwino ma rwot mato.