Ejira 10

Yub me giko nyom ikin lurok ki jo Icrael

1Ikare ma Ejira tye i ot ka lega kun kok, ci poto kwede piny i ngom kun tucu balgi, ci lwak jo Icrael ma co, mon ki lutinogi gucoke kun gikok matek tutwal. 2Cutcut Cekania wod pa Jekiel, ma ikin likwayo pa Elam, owaco bot Ejira ni, “Wangayo wang Lubangawa woko pi nyomo mon ma gin lurok ma gitye i lobo man, ento kadi bed kumeno pud gen tye pi jo Icrael. 3Wan kong dong waketu gicike ki Lubangawa me ryemo mon magi woko ducu kacel ki lutinogi. Wabitiyo gin ma in kacel ki jo mukene ma gilworo Cik pa Lubangawa bitito botwa ni watii; ci wabitiyo gin ducu ma Cik pa Lubanga mito. 4In ia malo, pien man tic ma meri, wan bene wabicung ingeyi; myero ibed tek dok itim kumeno.”

5Ka Ejira oa malo ci omiyo lutela pa ajwaki ki pa Lulevi ki pa jo Icrael ducu gukwongo kwong ni gibitiyo gin ma Cekania dong oloko ni kitii. Kitmeno gucako kwongo kwong. 6Ejira oa woko ki inyim Ot pa Lubanga, odonyo i kicika pa Yekokanan wod pa Eliacib, obutu kunu nino acel, kun pe camo gin mo kadi wa mato pii bene. Dok obedo kakumu pi jo ma gua ki i opii ma gungayo wang Lubanga wokoni.

7Ka dong kitito lok oromo i lobo Juda ki Jerucalem ki bot jo ducu ma ceng gudwogo ki i opii ni gin ducu omyero gucoke i Jerucalem. 8Kiciko ni ka dano mo pe obino ikin nino adeki, ludito ma giloyo lwak ki ludongo guwaco ni jamine ducu omyero kiyak ci kidyer ki Lubanga, ki en kikome bene myero kiryeme woko wek oa ki ikin lwak ma gudwogo ki i opii.

9Cutcut jo Juda ki jo Benjamin ducu gucoke i Jerucalem ikine me nino adek. Inino dwe pyere aryo me dwe me abongwen, lwak ducu gubedo idyekal ma inyim Ot pa Lubanga. Onongo kot obedo kacwer matek; pi lok man ma pire tek ki pi ngico, omiyo kom dano acel acel obedo kamyel amyela. 10Ajwaka Ejira oa malo ci owaco bot lwak ni, “Wun wuturu cik pa Lubanga omiyo wutingo alii wumedo ikom bal alii pa jo Icrael pi nyomo mon ma gin lurok. 11Wutuc balwu kombedi inyim Rwot Lubanga pa kwarowu, kun wutiyo gin ma en mito; dok myero wupoke woko pat ki ikom jo ma gibedo i lobo man, wuryem monwu ma gin luroki bene woko.”

12Lwak ducu gugamo ki dwon malongo ni, “Obed kitmeno, wabitiyo gin ducu ma dong iwaco.” 13Gin gumede guwace ni, “Lwak tye dwong mada dok bene obedo kare ma kot cwer iye madwong; pe watwero cung idyekal ata kit man. Man pe gin ma kitwero tiyo nino acel nyo aryo keken, pien wan watyeko timo bal madit tutwal i lok man. 14Wek ludito ma giloyowa aye gucung pi nying lwak ducu ma gucoke; wek gucik jo ducu ma gibedo i taunwa madito ma gunyomo mon ma gin lurok gubin inino ma kiciko, kacel ki ludongo ma loyogi ki lungolkop ma i taun madito ducu, nio wang ma kikwanyo kiniga pa Lubanga mager ki ikomwa pi lok man.” 15Ngat mo onongo pe okwero yub man, ento kono Yonacan wod pa Acakel ki Jakijeya wod pa Tikva keken aye gukwero, dok Meculam ki Cabetai ma gin Lulevi bene gukonyo korgi iye.

16Jo ma gudwogo ki i opii gutimo kitmeno. Ajwaka Ejira oyero dano, ludito maloyo dog odi pa kwarigi. Dano acel acel ma kiyero en ocoyo nyinge woko piny, kun lubu dog ot pa kwarone. Ikom nino dwe acel me dwe me apar en aye gubedo iye piny kaneno lok meno. 17Inino dwe acel me dwe me acel onongo dong gutyeko yenyo lok ikom co ducu mayam gunyomo mon ma gin lurok.

Co ma onongo gunyomo mon ma gin Lurok

18Magi aye nying co mayam gunyomo mon ma gin lurok ma gitye ikin likwayo pa ajwaki, gin aye Maceya, Eliejer, Jarib, ki Gedalia, ma gitye ikin likwayo pa Yocwa wod pa Jojadak kacel ki utmegine. 19Gin gucike pirgi ken gi me ryemo mon gi woko, ki dok gutyero gitum pi tingo aliigi ma obedo nyok romo ma gukwanyo ki ikom romigi pi tingo aliigi. 20Ikin likwayo pa Imer gin aye Kanani ki Jebadia. 21Ikin likwayo pa Karim: gin aye Maceya, Eliya, Cemaya, Jekiel, ki Ujia. 22Ikin likwayo pa Packur gin aye Elioenai, Maceya, Icmael, Natanel, ki Elaca. 23Jo ma ikin likwayo pa Lulevi: gin aye Jojabad, Cimei, Kelaya ma kilwongo bene ni, Kelita, ki Petakia, Juda, ki Eliejer. 24Ki i dul pa luwer gin aye Eliacib. Ki i dul pa lugwok dogola gin aye Calum, Telem, ki Uri. 25Ki ikom likwayo pa jo Icrael: ki ikin likwayo pa Paroc gin aye Ramia, Ijia, Malkija, Mijamin, Eleajar, Kacabia, ki Benaya. 26Ikin likwayo pa Elam gin aye Matania, Jekaria, Jekiel, Abdi, Jeremot, ki Eliya. 27Ikin likwayo pa Jatu gin aye Elioenai, Eliacib, Matania, Jeremot, Jabad, ki Ajija. 28Ikin likwayo pa Bebai gin aye Yekokanan, Anania, Jabai, ki Atlai. 29Ikin likwayo pa Bani gin aye Meculam, Maluk, Adaya, Jacub, Ceal, ki Jeremot. 30Ikin likwayo pa Pakat-moab gin aye Adna, Celal, Benaya, Maceya, Matania, Bejalel, Binui, ki Manace. 31Ikin likwayo pa Karim gin aye Eliejer, Icija, Malkija, Cemaya, Cimeon, 32Benjamin, Maluk, ki Cemaria. 33Ikin likwayo pa Kacum gin aye Matenai, Matata, Jabad, Elipelet, Jeremai, Manace, ki Cimei. 34Ikin likwayo pa Bani gin aye Madai, Amram, Uel, 35Benaya, Bedeya, Keluki, 36Vania, Meremot, Eliacib, 37Matania, Matenai, ki Jacu. 38Ikin likwayo pa Binui gin aye Cimei, 39Celemia, Natan, Adaya, 40Maknadebai, Cacai, Carai, 41Ajarel, Celemia, Cemaria, 42Calum, Amaria, ki Yucepu. 43Ki ikin likwayo pa Nebo gin aye Jeyel, Matitia, Jabad, Jebina, Jadai, Joel, ki Benaya. 44Jo magi ducu onongo yam gunyomo mon ma gin lurok, ci guryemogi woko kacel ki lutinogi ducu.