Ejira 9

Ejira oniang ikom nyom matye ikin Lurok ki Lujudaya

1Ikare ma nyom ikin Lujudaya ki lurok otyeko time, ludito gubino bota gutita ni, “Jo Icrael, ajwaki, kacel ki Lulevi, pud peya gupoke woko ki ikom jo mukene ma gibedo i lobo meno kun gibedo ken gi. Gin tye katimo tim kipyeda ki jo Kanaan, jo Kit, jo Periji, jo Jebuc, jo Ammon, jo Moab, jo Ejipt, ki jo Amor. 2Co ma gin Lujudaya gitye kanyomo anyira rok wek obed mon gi kikomgi ki mon pa lutinogi; omiyo kwayi jo maleng pa Lubanga dong gurube woko kacel ki jo mukene ma gibedo i lobo man omiyo gudoko keni. Ludito ma gin loyo lwak kacel ki rwodi aye gubedo lubal madongo ilok man.” 3Ka awinyo lok meno, ci ayeco ginarukana woko, ka aputu yer wiya ki dok aputu yer tika bene, acako bedo ma piny orem kweda woko. 4Lacen jo ducu ma komgi omyel ka guwinyo lok pa Lubanga pa Icrael, pi ngayo wang Lubanga ma jo ma gudwogo ki i opii gubedo kwede, ci gucako gure guruma woko dyere ma abedo ma piny orem kweda woko nio wa ikare ma kityero gitum me otyeno. 5Ikare meno ma kityero gitum me otyeno en aye aa woko kwede ki kama onongo abedo karii kec iyeni, ma ginarukana ducu guyec woko, ka arumu conga piny ma atango cinga bot Rwot Lubangana, 6kun awace ni, “Ai Lubanga, lewic maka mada me ilo wiya ka atye inyimi , ai Lubangana, pien bal ma wan watimo odure madit lipim makato wiwa woko, ki alii mewa otore madit lipim malo oo wa i polo. 7Cake ikare pa kwariwa nio wa kombedi wan ki lwaki wabedo katimo lwak bal mapol. Dong pi balwa, omiyo wan ki lukerwa, ki ajwakiwa yam kimiyowa i cing luker ma i lobo pa lurok, kinekowa ki pala lucwan, ki i rok kunu kiyakowa, dok ki timowa ki tim me lewic, macalo watye ikare man. 8Ento pi kare manok keken Rwot Lubangawa, kica omaki ikomwa, ci imiyo jo mukene ki ikinwa gubwot dok gubedo i kabedo malengngi mot maber. Lubangawa iweko wabwot ki i opii dok imiyowa kwo manyen. 9Onongo wan opii, ento in Lubangawa pe yam iwekowa ata ikare ma watye i opii. Ci inyutu mar meri ma pe loke ikomwa inyim luker me Percia, omiyo guwekowa makwo dok guye ni wager Ot pa Lubangawa odoco, ki yubu jami ma obale i obure, gin omiyo kigwokowa bene maber i Judaya ki i Jerucalem.

10Kombedi Ai Lubangawa, wan dok wawaco ango ki inge lok man ma otyeko timeni? Dong wabwoto lubu ciki woko ducu 11mayam iciko dok imiyo owok ki i dog lutici ma lunebi, kun iwaco ni, ‘Lobo ma wubidonyo iye kacamone me bedo mewu matwali, en aye lobo pa jo ma komgi ki keni, pien jo ma gibedo iye gupongo lobo meno woko ki tim me kipyeda nia tungcel nio kwede i agiki lobo tungcel dok gubedo jo ma komgi ki keni. 121Ma omiyo wun pe wumii lutinogi gunyom anyirawu, ki lutinowu bene pe gunyom anyiragi, wun pe myero wuyeny kuc ki lonyogi ma gitye kwede; wek wubed jo matego, ki dok wucam gin maber ma i lobo, ma wubiweko bene bot lutinowu me bedo ginaleyagi matwal.’ 13Kadi bed jami magi ducu opoto ikomwa pi balwa ma watimogi ki pi alii madit ma watingo, wangeyo ni in Lubangawa iketo can ikomwa manok ma pe oporo lwak bal ma watimo, dok ikonyowa omiyo wabwot oweko pud watye makwo. 14Cake ningning ni wan dok pud wabituru ciki aye kun wamede ki nyom ikinwa ki jo ma gitiyo bal kipyedani? Itamoni ka watimo meno, kiniga pe bimaki ikomwa matek nio ka ityekowa ducu, ma dano mo acel ikinwa pe bibwot? 15Ai Rwot Lubanga pa Icrael, in ipore, pien imiyo wabwot ki ilak to. Nen, watucu bal aliiwa boti, pe watye ki kit twero mo me cung inyimi pi bal man.”