Ejira 8

Jo ma gudwogo ki i opii

1Magi aye nying ludito ma giloyo dog odi pa kwarigi, ma gudwogo kacel kweda ki i lobo Babilon, ikare me loc pa rwot Aritakcec, 2ma kicoyo nyinggi i buk me tekwaro:

Gercom, ki ikin likwayo pa Finekaci. Daniel, ki ikin likwayo pa Itamar. Katuc, ki ikin likwayo pa Daudi, 3ma ikin likwayo pa Cekania. Jekaria, ki ikin likwayo pa Paroc, kacel ki jo meggi ma kicoyo nyinggi. Gin ducu romo miya acel ki pyere abic. 4Eliekoenai wod pa Jerakia, ki ikin likwayo pa Pakat-moab, kacel ki jone ma welgi oromo miya aryo. 5Cekania wod pa Jakajiel, ki ikin likwayo pa Jatu, kacel ki jone miya adek. 6Ebed wod pa Yonacan, ki ikin likwayo pa Adin, kacel ki jone pyere abic. 7Jecaya wod pa Atalia, ki ikin likwayo pa Elam, kacel ki jone pyere abiro. 8Jebadia wod pa Mikael, ki ikin likwayo pa Cepatia, kacel ki jone pyere aboro. 9Obadia wod pa Jekiel, ki ikin likwayo pa Joab, kacel ki jone miya aryo ki apar wiye aboro. 10Celomit wod pa Jocipia, ki ikin likwayo pa Bani, kacel ki jone miya acel ki pyere abicel. 11Jekaria, wod pa Bebai, ki ikin likwayo pa Bebai, kacel ki jone pyere aryo wiye aboro. 12Yokanan wod pa Kakatan, ki ikin likwayo pa Ajgad, kacel ki jone miya acel ki apar. 13Elipelet, Jeuel, ki Cemaya, ki ikin likwayo pa Adonikam, jo ma gucito lacen, kacel ki jo meggi pyere abicel. 14Utai ki Jakur, ki ikin likwayo pa Bigvai, kacel ki jo meggi pyere abiro.

Ejira onongo Lulevi pi tic i Ot pa Lubanga

15An, Ejira yam acokogi kacel i dog kulu ma mol dok tung taun me Akava, wagony iye wabedo kunu pi nino adek. Ka abedo kangiyo dano anongo ni ajwaki gitye, ento Lulevi pe gitye kadi ki acel mo. 16Ka dok acwalo kwena me lwongo jo magi, Eliejer, Ariel, Cemaya, Elnatan, Jarib, Elnatan, Natan, Jekaria, ki Meculam, gin aye ludito wi lwakgi dok alwongo Joyarib ki Elnatan mayam gin jo matye ki niang matut, 17ka acwalogi bot Iddo, ma en ladit maloyo kabedo me Kacipia, kun atito botgi lok ducu ma myero gin gucilok bot Iddo ki utmegine ma gin lutic i Ot pa Lubanga ma i kabedo me Kacipia, me cwalo botwa dano ma gibitic i Ot pa Lubangawa. 18Pi Rwot Lubangawa ma onongo tye kakonyowa omiyo gucwalo botwa Cerebia dano ma ngeyo piny, ma en tye ikin likwayo pa Makali ma en lakwar Levi dok lakwar Icrael bene; en obino ki lutinone kacel ki utmegine, gin ducu apar wiye aboro; 19ka dok gucwalo Kacabia ki Jecaya ma gitye ikin likwayo pa Merari, kacel ki utmegigi, ki lutinogi gin ducu pyere aryo. 20Dong medo ikom lutic i Ot pa Lubanga miya aryo ki pyere aryo, ma con Daudi ki luditone guketo pi tic bot Lulevi, gin ducu kicoyo nyinggi woko piny kore ki kore.

Ejira otelo wi lwak ikare me rii kec ki lega

21Ci aciko pi rii kec ki i dog kulu me Akava, wek wamwole kenwa inyim Lubangawa, wek waleg en omii ki wan wawot maber, wan kikomwa, lutinowa, kacel ki jamiwa ducu. 22Kono nene apenyo rwot ni omiya lwak acikari ki wegi aguragura me gwokowa ikom lumerokwa ma i yo, onongo lewic twero maka; pien onongo dong watito bot rwot woko ni, “Lubangawa bibedo ki jo ma giyenye pi konyogi, ki tek me akemone bedo ikom jo ducu ma gibwoto en woko.” 23Warii kec kun walego Lubangawa ni ogwokwa, ci en owinyo legawa bene.

Mot pi Ot pa Lubanga

24Ka dok aketo ludito magi apar wiye aryo me loyo ajwaki: Cerebia, Kacabia, ki jo apar mukene ma gin utmegigi kacel kwedgi. 25Ci apimo botgi ryal ki jabu ki jami me tic, amiyogi gityer me Ot pa Lubangawa ma con rwot ki lumiitame ki luditone ki jo Icrael ducu ma gitye ikare meno gumiyo. 26Apimo ryal maromo kilo alip pyere aryo wiye aryo, ki jami mukene me ryal maromo miya acel, ki jabu maromo kilo alip adek ki miya angwen, 27ki atabo jabu pyere aryo ma acel acel peke romo kilo aboro ki gram miya angwen, ki atabo mola aryo ma kiliyo maber marom ki jami me jabu. 28Awaco botgi ni, “Wun dano maleng inyim Rwot, ki jami ducu bene leng; ryal ki jabu ducu gin aye mot me gityer ma cwiny dano opwoyo me miyone bot Rwot Lubanga pa kwariwu. 29Wugwokgi, wunen gi maber nio ka wupimogi inyim ajwaki madito ki Lulevi kacel ki ludito ma giloyo dog odi pa kwarigi ma i Jerucalem, kun wupimo ki i kicika ma i Ot pa Rwot.” 30Ajwaki ki Lulevi gutingo ryal ki jabu ma gupimo kacel ki jami mukene ducu, guterogi guketo i Ot pa Lubangawa i Jerucalem.

Wot me dok i Jerucalem

31Lacen wacako wot ki i dog kulu Akaya inino me apar wiye aryo me dwe me acel, me cito i Jerucalem; Lubangawa aye obedo kakonyowa, dok ogwokowa ki i cing lumerok ki i cing lulibo ma gubutu kakiyowa i yoo. 32Ka wao i Jerucalem, ci wabedo kunu pi nino adek. 33Inino me angwene, wacito i Ot pa Lubangawa, wacako pimo iye ryal ki jabu ki jami tic ducu wamiyogi i cing ajwaka Meremot, ma wod pa Uria. Onongo en tye kacel ki Eleajar wod pa Finekaci, kacel ki Lulevi ma gitye kwedgi, ma gin aye Jojabad wod pa Yocwa ki Noadia wod pa Binui. 34Kikwano jami woko liweng, dok kipimogi bene ka kicoyo pekgi i buk i cawa meno.

35Ikare meno jo mayam gudwogo ki i opii i rok, gucako tyero gitum awanga bot Lubanga pa Icrael. Gutyero twoni dyangi apar wiye aryo pi jo Icrael ducu, ki nyogi romi pyere abongwen wiye abicel, ki lutino nyogi romi pyere abiro wiye abiro, ki nyogi dyegi apar wiye aryo pi gitum me bal; meno ducu obedo gitum awanga bot Rwot. 36Gin gumiyo cik pa rwot Dario bot rwodi ki bot luloc ma gitye i lobo me kupotoceng me kulu Euprate; ci gin bene gukonyo dano kacel ki Ot pa Lubanga.