Ejira 7

Ejira ki lwake guo i Jerucalem

1Lacen ki inge lok man, ikare ma onongo Aritakcec rwot me Percia aye loyo lobo, Ejira oa ki i lobo Babilon odok i Jerucalem. Ejira yam obedo wod pa Ceraya, wod pa Ajaria, wod pa Ilkia, 2wod pa Calum, wod pa Jadok, wod pa Akitub, 3wod pa Amaria, wod pa Ajaria, wod pa Merayot, 4wod pa Jerakia, wod pa Uji, wod pa Bukki, 5wod pa Abicua, wod pa Finekaci, wod pa Eleajar, wod pa Aron ma obedo ajwaka madit. 6Ejira yam obedo karan dok laryeko i Cik pa Moses macon Rwot Lubanga pa Icrael omiyo ki Moses. Rwot Aritakcec omiye jami ducu mayam en olego, pien Rwot Lubangane onongo tye kakonye.

7Jo ma gucito kwede i Jerucalem bene i mwaka me abiro me loc pa Aritakcec, obedo ajwaki ki Lulevi, luwer, lugwok dogola, ki lutic i Ot pa Lubanga. 8En oo i Jerucalem i dwe me abic, me mwaka me abiro me loc pa Aritakcec. 9Gua ki i lobo Babilon inino dwe acel me dwe me acel, ci ki kony pa Lubanga guo i Jerucalem inino dwe acel me dwe me abic. 10Ejira yam oketo cwinye kakwano ki niang Cik pa Rwot, kun tiyo, lubu, dok pwonyo cike ki gin ma en ociko ducu bot jo Icrael.

Lok ma rwot Aritakcec ocwalo bot Ejira

11Man aye kopi me waraga ma rwot Aritakcec yam omiyo bot ajwaka Ejira, ma lapwonycik pa Lubanga, dano ma opwonye i tyen lok me Cik pa Rwot ki cik ma Rwot ociko ki jo Icrael. Loke kwane kitman ni:

12“An Aritakcec rwot maloyo luker ducu, amiyo waraga man bot ajwaka Ejira, ma Lapwonycik pa Lubanga me polo. 13An kombedi amiyo twero ni dano mo keken ki ikom jo Icrael nyo ajwakigi nyo Lulevigi ma gitye ite loca ma oye mine kene me cito i Jerucalem, myero ocit kacel kwedi. 14An rwot kacel ki lumiitam ma mera abiro aye wacwali wek icit ipeny lok matye i Juda ki i Jerucalem, me neno kit macalo Cik pa Lubangawu, mayam omiyo i cingini, kitye kalubune kwede. 15Myero iter ryal ki jabu ma an kacel ki lumiitam wamiyo ki yomcwiny me atyera bot Lubanga pa Icrael, ma ode tye i Jerucalem. 16Dok bene myero iter ryal ki jabu ma in icoko ki i lobo Babilon ducu, ki gityer ma ic opwoyo ma jo Icrael kacel ki ajwaki gumiyo, ma gukwongo kwong me miyo gin mo kit macalo cwiny dano acel acel omito pi Ot pa Lubangagi matye i Jerucalem.

17Dong myero igwoke itii ki lim man maber me wilo twoni dyangi, nyogi romi, ki gityer me moko kwon ki kongo bwino, ka icak tyerogi ikom keno tyer ma i Ot pa Lubangawu matye i Jerucalem. 18Dok in ki utmegi wutwero tic ki ryal ki jabu mogo ma odong kit macalo wuneno ni ber, kun wulubu cik pa Lubangawu. 19Dok myero iter lwak jami tic ma kimiyo boti me tic kwedgi i Ot pa Lubanga, kun ibiterogi ducu inyim Lubanga i Jerucalem. 20Ka tye gin mo mukene ma mite pi Ot pa Lubangawu, ma myero in inong, ci itwero wilone ki lim ma gikwanyo ki i ot kano lim pa rwot.”

21“An rwot Aritakcec, amiyo twero bot lukan lim ducu ma gitye i lobo me kupotoceng me Euprate ni, gin ducu ma ajwaka Ejira, ma Lapwonycik pa Lubanga me polo, bimito ki botwu, myero wumii bote oyotoyot ki mitkom, 22ma wele romo kilo alip adek ki miya angwen me ryal, kilo alip apar me ngano, ki kongo bwino lita alip aryo, ki lita alip aryo me moo jeituni, ki kado ma wele pe kinyutu. 23Gin ducu ma Lubanga me polo ociko, wutii kakare kikore i tic ikom Ot pa Lubanga me polo, wek akemo pe omake ikoma ki ikom jo ma bibedo i loc ikare me anyim. 24Dok bene wagengowu ni pe myero wujog lim me mucoro mo ki bot ajwaki, Lulevi, luwer, lugwok dogola, ki lutic ma gitiyo i Ot pa Lubanga, nyo lutic mukene ma gitiyo i Ot pa Lubanga.

25In Ejira, tii ki ryeko ma Lubangani omiyi, ket lungolkop madito ki lungolkop matino wek gubed ka ngolo kop pa lwak ducu ma gibedo i lobo me kupotoceng me Euprate; dok myero gubed jo ma gingeyo Cik pa Lubangawu. Jo ma pe gingeyo cik pa Lubangawu, in ipwonygi wek gunge. 26Kace ngat mo pe bilubu Cik pa Lubangawu kacel ki cik me lobona, myero kimiye pwod magwar, macalo kop me to, nyo kop me ryeme woko ki i loboni, nyo me yako jamine woko, nyo pi tweyo en i buc.”

Ejira opako Lubanga

27Ejira owaco ni, “Kipwo Rwot Lubanga pa kwariwa! En aye ma oketo gin macalo man i cwiny rwot, pi keto deyo ikom Ot pa Rwot Lubanga ma i Jerucalem maberi. 28Dok onyutu bota mar mere ma pe loke inyim rwot kacel ki lumiitame ducu, ki inyim ludito ma gin twoni oteka pa rwot. An abedo ki tekcwiny pien Rwot Lubangana onongo tye ka konya dok abito ludito wi kaka pa jo Icrael ci adok cen kacel kwedgi.”