Ejira 6

Kinongo cik mayam Ciro omiyo pi gedo

1Rwot Dario omiyo twero, ci kiyenyo loke i Babilon ki i ot me kano lok kama kigwoko iye buk me lok mayam kicoyo. 2Ci kinongo buk mayam kicoyo iye lok ma otime i taun madit me Ekbatana ma en aye gang kal me lobo Media, ma kicoyo iye lok magi mayam otime:

3“I mwaka mukwongo me loc pa rwot Ciro, en omiyo twero ni, Ot pa Lubanga ma i Jerucalem, myero kiger odoco, pien obedo kama kityero iye tyer ki gitum awanga. Bore me dok malo myero obed mita pyere aryo wiye abiro ki lace bene mita pyere aryo wiye abiro 4Kore omyero kiged ki godi apaya madongo, latyeng adek ma gurumu ot woko ducu ki bao tyeng acel. Lim me culu pi tic bia ki i kicaa lim me ker. 5Dok bene wuwek jami me jabu ki me ryal me Ot pa Lubanga, mayam Nebukadnejar oyakogi ci okelogi i Babiloni kidwokgi cen ci kiketgi i Ot pa Lubanga matye i Jerucalem, kun jami acel acel kiketo i kabedone kikome; i Ot pa Lubanga.”

6Ci Dario odwoko lok botgi kitman:

“Pi meno in Tatenai, laloc me lobo me kupotoceng me Euprate, ki Cetar-bojenai, ki ludito wadiwu luloc mukene ma gitye i lobo me kupotoceng me Euprate, wunyik woko cen ki i Ot pa Lubanga: 7wuwek tic me Ot pa Lubanga owot anyim kit ma mite. Wuwek laloc pa Lujudaya ki ludongo pa Lujudaya guger Ot pa Lubanga odoco ikom kabedone macon kikome. 8Dok acikowu me konyo ludongo magi pa Lujudaya ki gero Ot pa Lubanga odoco; myero kicul lim ma mite bot jo magi labongo gale, kun kikwanyo lime ki ikom lim me ker ma kijogo, ma oa ki i lobo me kupotoceng me Euprate. 9Kace ajwaki pa Lubanga ma gitye i Jerucalem gimito lutino twoni, ki nyogi romi, nyo romi me gitum awanga me atyera bot Lubanga me polo, nyo ngano, kado, ki kongo bwino, nyo moo, ci omyero wumii gin meno botgi nino ducu ma pe wukeng. 10Wubitimo kit man wek gutyer gityer ma Lubanga me Polo pwoyo, ki lego pi kwo pa rwot ki lutinone. 11Dok amiyo twero ni kace dano mo oturu cik man, ci rii wi ot ma mere kibiwoto woko, kibipayo yaka kicobe kwede. Dok kiwek ode odok odur yugi. 12Ka rwot mo nyo rok mo oete me temo loko cik man, nyo balo Ot pa Lubanga man matye i Jerucalem, ci Lubanga mayam oyero kabedo man ni wek obed kabedo me wore omyero otur twerogi woko. An Dario, amiyo twero ni kiwek tic otiine kakare ki mitkom kun kilubu cik man maber.”

Kikwero Ot pa Lubanga

13Ka rwot Dario ocwalo kwenane, ci Tatenai, ma laloc me dul lobo me kupotoceng me Euprate, ki Cetar-bojenai, ki ludito wadgi, gutiyo tic ki mitkom kit ma rwot Dario ociko. 141Ludongo pa Lujudaya gugedo gedo ma tic bene omede owoto anyim maber, pi lok me cuku cwiny ma lanebi Aggai ki Jekaria wod pa Iddo gutito. Gutyeko tic me gedo kit macalo ceng Lubanga pa Icrael ocikogi kwede ki pi cik pa Ciro, Dario ki pa Aritakcec rwodi me Percia. 15Gutyeko tic me gedo me Ot pa Lubanga man inino dwe adek me dwe me Adar, i mwaka me abicel me loc pa rwot Dario.

16Lacen jo Icrael, ajwaki ki Lulevi, kacel ki jo mukene mayam gudwogo cen ki i opii i rok, gukwero Ot pa Lubanga ki yomcwiny. 17Inino me kwero Ot pa Lubanga kikome gutyero twoni miya acel, ki nyogi romi miya aryo, lutino romi miya angwen, ki nyogi dyegi apar wiye aryo, ma oporo wel kaka pa jo Icrael pi gitum me bal pi jo Icrael ducu. 18Gupoko ajwaki ki Lulevi i dul, pi tic pa Lubanga i Jerucalem, kun kilubu gin ma kicoyo i buk pa Moses.

Karama me Kato

192

Jo ma gudwogo cen ki i opii gukwero Karama me Kato inino dwe apar wiye angwen me dwe mukwongo. 20Onongo ajwaki ducu kacel ki Lulevi dong gutyeko lonye keken gi; gin ducu gudoko leng. Omiyo guneko lutino romi me gitum pi jo ducu mayam gudwogo ma gua ki i opii, ki pi ajwaki luwotgi, ki pirgi ken gi. 21Jo Icrael ma gudwogo ma gua ki i opii i rok aye gubedo kacamone, kacel ki jo ducu ma dong guweko kwo me kafiri ma gupoke woko ki ikin lwak ma gin wegi lobo, gubino kaworo Rwot Lubanga pa Icrael. 22Ka dok gukwero nino madito me Mugati ma Tobi Pe iye ki yomcwiny pi nino abiro; pien Rwot omiyogi yomcwiny, dok oloko cwiny rwot me Aciria ikomgi, wek okonygi ki tic me gero Ot pa Lubanga, Lubanga pa Icrael.