Ejira 5

1Ikare meno, lunebi magi, Aggai ki Jekaria wod pa Iddo, gutito lok bot Lujudaya ma gitye i Juda ki i Jerucalem, i nying Lubanga pa Icrael ma loyogi. 21Ka Jerubabel wod pa Cealtiel ki Yocwa wod pa Jojadak guwinyo lokgi ci gucako roco Ot pa Lubanga matye i Jerucalem odoco; kun lunebi pa Lubanga aryoni konyogi ki tic.

3Ikare meno kikome en aye Tatenai ma laloc me dul lobo matye kupotoceng me Euprate ki Cetar-bojenai ki ludito wadgi gubino botgi ci guloko kwedgi kit man ni, “Anga ma omiyowu twero me gero Ot pa Lubanga ki me tyeko gedone?” 4Jo man bene openyogi ni, “Lugedo ma gitye kagedoni nyinggi angagi?” 5Ento Lubanga yam tye kaneno ludongo pa Lujudaya, omiyo pe kijuku ticgi nio ka lok ma kicwaloni oo bot Dario, ma kun kikuru lagam me waraga ma kibidwoko pi lok meno.

6Man aye lok ma i waraga ma Tatenai ma en laloc me dul lobo matye kupotoceng me Euprate ki Cetar-bojenai ki ludito wadgi ducu gucoyo ci gucwalo bot Dario.

7Gucwalo lok ma kicoyo kit man ni, “Bot rwot Dario, kuc obed boti.

8Myero in rwot inge ni wan wacito i lobo Juda, wao wa i Ot pa Lubanga madit. Kitye karocone ki godi apaya madongo, kiguro bao bene me umu kom ot nia ki i dye ot piny nio kwede wa i kwori me dan ot ducu; tic man tye kawot mot maber tutwal dok tice ye cing gi maber.

9Wan wapenyo ludongo ma kunu ka waloko botgi kit man ni, ‘Anga ma omiyowu twero me gero Ot pa Lubanga ki me tyeko cel ma orumu ducu?’ 10Ka dok wapenyo wa nyinggi bene, wek watit boti, ka wacoyo nying ludito ma gitelo wigi.

11Gin gugamo dogwa kit man ni, ‘Wan lutic pa Lubanga me polo ki lobo, wan watye kagero Ot pa Lubanga odoco, en Ot mayam gedone otero lwak mwaka mapol mukato angec, ma rwot madit pa jo Icrael con ogero nio wa ityekone. 122Ento ka kwariwa yam gumiyo kiniga omako Lubanga me polo ikomgi, ci omiyogi i cing Nebukadnejar ma Lakaldaya, rwot me Babilon, ma obalo Ot pa Lubanga woko, ka oterogi wa i lobo Babilon. 133Ento i mwaka mukwongo me loc pa Ciro rwot me Babilon, Ciro oketo cik ma miyo twero ni Ot pa Lubanga man myero kiger odoco. 14Dok bene jami me jabu ki me ryal mayam kitiyo kwedgi i Ot pa Lubanga, mayam Nebukadnejar oyako ki i Ot pa Lubanga mayam tye i Jerucalem ci oterogi oketogi i ot pa lubangagu ma i Babilon, jami magi ducu rwot Ciro aceli aye yam okwanyogi woko ki i ot pa lubangagu matye i Babilon, ka omiyogi bot dano ma nyinge Cecbajar, mayam Ciro oketo obedo laloc; 15ka dok ocike ni, kwany jami magi itergi icit iketgi i Ot pa Lubanga matye i Jerucalem, ka dok iwek kiger Ot pa Lubanga odoco i kabedone kikome. 16Ci Cecbajar obino oketo teguti me Ot pa Rwot Lubanga ma i Jerucalem; cake wa ikare ca nio wa koni gubedo kagerone, ma pud bene peya otum.’

17Kace in rwot ineno ni tye atir, wek kong kiyeny loke i ot kano lok ma kicoyo matye i Babilon, wek ginen atir ka yam rwot Ciro oketo cik ma omiyo twero me roco Ot pa Lubanga man matye i Jerucalem. Kong in rwot inen kit ma ingolo kwede loke ci ocwal botwa.”