Ejira 4

Temo juku tic me Ot pa Lubanga

1Ka lumerok pa jo Juda ki pa jo Benjamin guwinyo ni jo ma gudwogo ki i opii gitye kagero Ot pa Rwot Lubanga pa Icrael, 21ci cut gubino bot Jerubabel ki ludito ma giloyo dog odi pa kwarigi kun giwaco botgi ni, “Wuwek waribe kwedwu i gedo man, pien wan bene waworo Lubangawu macalo wun, dok wan bene wabedo katyero gitum bote cake wa ikare pa Ecar-kadon rwot me Aciria mayam okelowa kany.”

3Ento Jerubabel, ki Yocwa, ki ludito mukene ma giloyo dog odi pa kwarigi ma i Icrael gugamo doggi ni, “Wun pe wutwero ribe kwedwa me gero ot mo pi Lubangawa; wan kenwa watwero gero ot pi Rwot Lubanga pa Icrael, macalo rwot Ciro, rwot me Percia yam ociko ki wan.”

4Ka dok lwak jo mukene ma gitye i lobo kunu gucako balo cwiny jo Juda woko, omiyo gubedo ki lworo me gedo. 5Jo meno gumiyo lim me wilo luloc me Percia cake ikare pa rwot Ciro nio kwede wa ikare pa rwot Dario wek obal ticgi woko. 62

I acaki me loc pa Akacwero, lumone pa jo Juda ki Jerucalem, gucoyo lok me adot ikom jo ma gibedo i Juda ki i Jerucalem.

7Ikare me loc pa Aritakcec, jo magi Biclam ki Mitredat ki Tabcel ki ludito wadgi ducu, gucoyo waraga bot Aritakcec rwot me Percia. Kicoyo ki leb Aramaik kun kigonyo tere ikare ma kikwano. 8Rekum ma en ladit me mony ki Cimcai ma karan gucoyo waraga bot rwot Aritakcec ma tito lok ikom Jerucalem kit man ni:

9“Rekum ma ladit me mony, ki Cimcai ma karan gucoyo waraga man kacel ki ludito wadgi ducu, lungolkop, ki luloc me lobo, ki ludito pa jo Percia ki jo Erek, ki jo Babilon, ki jo Cuca, ma gin aye jo Elam, 10kacel ki lwak rok mukene ducu mayam laker madit me awora Ocnapar okobogi woko omiyo gubedo i taun madito ma i lobo Camaria ki i kabedo mukene mapatpat ma i dul lobo ma kilwongo Kupotoceng me Kulu Euprate.”

11Man aye kopi me waraga ma gucwalo bote, ma loke kwane kit man:

“Bot rwot Aritakcec: wan lutici ma wabedo i lobo me kupotoceng me Kulu Euprate, wacwalo motwa boti.

12Wek rwot onge ni Lujudaya ma gua ki boti gudwogo botwa, kombedi dong gutyeko cito woko i Jerucalem. Gitye kagero taun madit pa jo ma lujemoni odoco, kun gin jo maracu. Kombedi dong gicok katyeko tic ikom cel murumu gang, dok gitye kayubu tegutine. 13Myero in rwot dong inge lok man ni, kace taun madit man kigero odoco, ka kigero cel otum, ci pe dong gibimiyo ajog dok pe gibiculu kit mucoro mo. Dok lim ma gibicwalo bot in rwot bene bijwik woko. 14Kit macalo wan lutic i gang kal pa rwot, pe bedo ber ka waweko kituru tweroni woko ma kun wan waneno anena, ma omiyo wacwalo lok man pi titone boti in rwot, 15wek kong kinen dok kiyeny lok i buk ma kicoyo iye lok mutime ikom kwariwu. Ibinongo ilok ma kicoyo i buk me lok ma otime ma bimiyo iniang atir ni taun madit man kara taun madit me jemo ada, ma miyo can ki arem ikom luker ki luloc me lobo, pi atubegi ma ocake magwa i taun madit meno nia wacon. Meno aye gin ma omiyo yam kimuku taun madit man woko. 16Wamito in rwot inge ni, kace taun madit man kigero odoco, ki cel bene otum, in dong pe ibibedo ki twero mo ikom lobo ma kupotoceng me Euprate.”

17Rwot ocwalo botgi lagam me waraga kit man,

“Bot Rekum ladit me mony ki Cimcai karan, ki lwak ducu ma gin ludito wadiwu ma gibedo i Camaria ki i lobo ducu me kupotoceng me Euprate, amotowu. 18Dong amito wunge ni waraga ma wucwalo botwa kany gikwano ducu maber i nyima. 19Ci dong amiyo twero, ci kikwedo ki kore wa ki i buk, ci kinongo ada ni, Jerucalem nia wa ikare macon, obedo kajemo woko ikom luker ducu, dok ni jemo kacel ki atube obedo katime iye. 20Ki luker matego yam gubedo kaloyo Jerucalem, ma guloyo bene wa ki lobo ducu me kupotoceng me Euparate, ma lwak gubedo kaculu ajog ki mucoro ducu botgi. 21Pieno myero wuket cik wek kijuk jo meno woko, wek taun madit man pe dok kiger odoco, nio wang ma an kikoma aketo cik. 22Wuket cwinywu ikom lok meno, pe wubed ata ma pe wungeyo ticwu. Pe omyero wuwek kitim gin mo ma balo cobo gin ma rwot mito.”

23Ikare ma dong kikwano waraga pa rwot Aritakcec inyim Rekum ki Cimcai ma karan ki bot ludito wadgi ducu, gucako cito oyotoyot bot Lujudaya ma onongo gitye i Jerucalem ci gujukugi woko ki tek wek pe gumede ki roco Jerucalem.

Tic i Ot pa Lubanga ocake odoco

243

Tic ikom Ot pa Lubanga matye i Jerucalem onongo ocung woko nio wa i mwaka me aryo me loc pa Dario rwot me Percia.