Ejira 3

Kicako woro Rwot i Jerucalem odoco

1Ka dwe me abiro oromo, onongo dong jo Icrael gubedo mot i taun gi mapatpat, ci lwak gucoke i Jerucalem ki cwiny acel. 21Cutcut Yocwa wod pa Jojadak kacel ki ajwaki luwote, ki Jerubabel wod pa Cealtiel ki lutugi, gucako cano keno tyer pa Lubanga pa Icrael, pi tyero iye gitum awanga, kit macalo yam kicoyo i Cik pa Moses ma dano pa Lubangani. 32 Kadi bed onongo gitye ki lworo pi lwak jo mukene ma gitye i lobo meno, gucano keno tyer kama yam onongo tye iye con. Ci gutyero iye gitum awanga bot Rwot, kun kiwango gitum odiko ki otyeno. 43 Gin bene gukwero nino madito me Bolo, kit ma con kicoyo, kun gityero gitum awanga nino ducu kun wele lubu cik ma mite pi nino acel acel. 54Ka dong inge meno gumede ki tyero gitum awanga me nino ducu, gityer me Por Dwe, me nino madito ma Rwot ociko ducu, ki gityer ma dano acel acel miyo bot Rwot kit ma iye opwoyo. 6Cake ikom nino dwe mukwongo me dwe me abiro en aye gucako tyero iye gitum awanga bot Rwot. Ento guti me te Ot pa Rwot onongo pud peya kiketo.

Kicako gero Ot pa Lubanga odoco

7Lwak gumiyo lim bot lupaa godi ki bot lupac. Dok gumiyo cam ki ginamata, ki moo bot jo Cidon ki jo Turo wek gukel yadi cedar ki i Lebanon kun wok ki i pii naka i dog nam me Jopa, ma lube kitwero ma Ciro rwot me Percia omiyo botgi. 8I mwaka me aryone ma lubu dwogogi i Jerucalem i Ot pa Lubanga, i dwe me aryo, en aye Jerubabel wod pa Cealtiel ki Yocwa wod pa Jojadak gucako kwede tic, kacel ki utmegigi mukene, kacel ki ajwaki pa Lubanga ki Lulevi ki jo ducu mayam gudok i Jerucalem ma gua ki i lobo kama kiterogi iye i opii. Guyero Lulevi, ma mwaka me ditogi romo pyere aryo ki makato pi ketogi me bedo ludito ma giloyo tic ikom Ot pa Rwot. 9Yocwa ki awobene ki lutugi, ki Kadmiel ki awobene ma likwayo pa Juda, gin ducu guloyo lutic ma i Ot pa Lubanga, kacel ki awobe pa Kenadad ki Lulevi, ki lutinogi kacel ki lutugi. 105

Ka dong lugedo guketo guti me te Ot pa Rwot, ajwaki guruku ginaruka me tic meggi gukato kwede anyim ma gumako tumgi; ki Lulevi ma likwayo pa Acap onongo gitye ki atego agoya me pako Rwot, kit mayam Daudi rwot me Icrael ociko. 116Guwero wer kun gileyo aleya, ma gipako Rwot dok gimiyo pwoc bote, kun giwero ni,

“Pien Rwot ber,

mar mere ma pe loke bedo nakanaka

bot jo Icrael.”

Lwak ducu gudange ki woo madwong, ka gipako Rwot, pien dong kiketo guti me te Ot pa Rwot. 12Ento lwak jo mapol ki ikin ajwaki pa Lubanga ki Lulevi ki ludito ma giloyo dog odi pa kwarigi, jo muteggi mayam guneno Ot pa Rwot mukwongo ca, gukok matek ki dwon malongo ikare ma guneno ka kitye kaketo guti me te Ot man, kadi bedi jo mapol onongo gubedo kadange ki yomcwiny. 13Ma omiyo dano onongo pe gitwero poko ikin dwon me yomcwiny ki dwon me koko, pien onongo lwak gubedo kadange matek tutwal, ma dwon gi winye wa ki kamabor.