Nekemia 13

Poke ki ikom Lurok

11

Ikare meno kikwano Cik pa Moses bot lwak wek guwiny; ci gunongo i dul mo kama kicoyo ni pe kiye dano mo ma en jo Ammon kadi ki jo Moab me donyo i coke pa lwak ma gin jo pa Lubanga. 22Lok man kicoyo pien onongo jo Ammon ki jo Moab yam gukwero miyo cam ki pii bot jo Icrael ikare ma gia woko ki i Ejipt. Gin guwilo Balaam me ceno jo Icrael, ento Lubangawa oloko cenowani odoko me gum botwa. 3Ikare ma jo Icrael dong guwinyo kikwano cik, ci gucako poko jo ma gin likwayo pa lurok woko ducu ki ikom jo Icrael.

Alokaloka ma Nekemia okelo

4Ikare ma lok man peya otime, onongo ajwaka Eliacib mayam kiketo en me loyo kicika ma i Ot pa Lubanga, omako larem gin ki Tobia. 5En oyubu kicika acel malac pi Tobia, mayam onongo obedo me gwoko jami macalo gityer me moko kwon ki odok luban ma kityero, jami ma kitiyo kwedgi i Ot pa Lubanga, ki dul acel me apar me ngano, kongo bwino ki moo mayam kimiyo bot Lulevi ki luwer ki lugwok dogola pi lubu cik, kacel ki jami me mot pi konyo ajwaki. 6Ikare ma loke time onongo an apeke i Jerucalem, pien i mwaka me pyere adek wiye aryo me loc pa Aritakcec rwot me Babilon onongo acito katito lok man bot rwot. Ikare mo alego rwot ni owek adok cen, 7ci en oye omiyo adok cen i Jerucalem, ci cut anongo ni Eliacib otimo bal me ye ni Tobia obed i kicika acel idyekal ma i Ot pa Lubanga. 8Kiniga omaka matek, ci abolo jami pa Tobia me ot woko ducu ki i kicika meno. 9Dok amiyo cik cut me lonyo kicika ducu; ka dong acako dwoko iye jami ma kitiyo kwedgi i Ot pa Lubanga, kacel ki tyer me moko kwon ki odok luban. 103

Dok bene anongo ni Lulevi kacel ki luwer ma gubedo katic gua woko ki i Jerucalem gudok cen i potigi, pien lwak pe gumiyo dul ma kiciko me amiya bot Lulevi. 11Ci an acako da ikom ludito ma giloyo lwak kun awaco ni, “Pingo wuweko gubwoto Ot pa Lubanga?” Acako coko Lulevi kacel ki luwer adwokogi cen i Ot pa Lubanga ci aketogi i dog ticgi i kabedogi. 124Jo Juda ducu gukelo dul acel me apar me ngano, kongo bwino ki moo i kicika odi me kano jami. 13Ci aketo jo magi me loyo tic ikom kicika odi me kano jami: Celemia ma en ajwaka, Jadok ma lapwony Cik ki Pedaya ma en Lalevi. Dok aketo Kanan wod pa Jakur, ma wod pa Matania, me bedo lakonygi, pien onongo dano ducu gingeyo ni gin jo ma lugen; ticgi obedo me poko jami bot utmegigi.

14Po pira ikom lok man, ai Lubangana, pe ijwa tica mabeco ma dong atyeko tiyone me yubu Ot pa Rwot Lubangana ki pi tice mapol woko. 155

Ikare meno abedo kaneno jo mapol ma i Juda gubedo kabiyo kongo bwino i bur kama kibiyo iye inino me Cabit, kun jo mukene guyweko nyig ngano, kongo bwino, nyig olok, nyig oduru ki kit kwayi yec ducu mapatpat gutweyo iwi kana gutero i Jerucalem, inino me Cabit. Ci an ajukugi bene ni pe gucat cam inino meno. 16Jo mogo ma gua ki i lobo ma orumu lobo Turo onongo bene yam gibedo i Jerucalem, ci gukelo rec ki kwayi jami ducu me acata, ci gucato bot jo Juda ki i Jerucalem inino me Cabit. 17Omiyo akeco matek ikom ludito me Juda kun awaco botgi ni, “Man kit gin marac ango ma wutye katiyoneni, ma wupyedo kwede ceng Cabit? 18Lubangawa mono pe okelo can man ikomwa ki ikom taun man ni pien kwariwa bene yam gutiyo kitmeno? Wun dok wutye kamedo akemo pa Lubanga ni obin ikom jo Icrael pi pyedo ceng Cabit.”

19Ci amiyo cik ni i acaki ceng Cabit ducu, teke piny dong mito yutu, dogcel ducu myero kilor woko, ma pe dok myero kiyabgi nio wang ma nino me Cabit okato. Aketo jona mogo kakuru dog taun me neno ni yec mo pe kikelogi i taun i ceng Cabit. 20Lucat wil ki lucat jami ducu ma kitgi patpat ma gukelo jamigi gubutu inge taun madit me Jerucalem, kicel nyo kiryo. 21Ento ajukugi kun apenyogi ni, “Pingo wun wubutu woko inge taun inyim cel? Ka dok wumede katimo kitmeno ci abilweny kwedwu ki tek.” Nia ikare meno pe dok gudwogo cen i ceng Cabit. 22Amiyo cik bot Lulevi ni myero gulonye keken gi ci gucit kakuru dogcel ducu, me neno ni kigwoko nino me Cabit obedo maleng.

Ai Lubangana, po pira, ki pi lok man bene, dok ilar kwona pi dit me mar meri ma pe loke. 236

Ikarenu bene aneno co mapol ma gin Lujudaya gunyomo anyira Acidod, Ammon ki Moab, gudoko mon gi. 24Omiyo nucu pa lutinogi gubedo kaloko leb pa jo Acidod, ki leb Moab. Ki jo mukene ma dong pe gitwero loko leb Ibru ma en aye leb pa jo Juda. 25Akeco ikomgi omiyo acenogi woko kun apwodo jo mogo ki ikin gi, dok aputu yer wigi woko; ci amiyo gukwongo kwong inying Lubanga, ni pe dok gibimiyo anyiragi bot awobe pa Lurok ni gunyomgi, dok gin bene pe gibikwanyo anyira pa Lurok me anyoma pi awobegi kadi gin bene pe binyome kwedgi. 267Ci awaco botgi ni, “Wun yam pe wuneno ni Solomon yam otimo bal pi lok pa mon ma gin anyira rok? Ikin rok mapol onongo pe tye rwot mo macalo Solomon pien Lubanga omaro Solomon makato omiyo Lubanga oketo en obedo rwot maloyo Icrael; ento kadi bed kumeno mon ma gin anyira rok mukene gumiyo en opoto i bal. 27Wun mono bene wumito ni wan bene walub lanen me gin marac ma wun wutimo, wek pe walub Cik pa Lubangawa, pi nyomo anyira pa lurok me bedo monwa?” 288

Dok dano mo acel ma ikom likwayo pa Yekoyada, wod pa Eliacib ajwaka madit, onongo bene onyomo nya pa Canbalat ma jo Bet-koron, ci aryemo en woko ki bota ni pe obed i Jerucalem.

29Ai Lubangana, in ipo pirgi, pien dong gubalo nyinggi woko me bedo ajwaki, ki dok bene gubalo gicike ma iketo ikin in ki ajwaki kacel ki Lulevi.

30An dong alonyo jo Icrael woko kitmeno ki ikom gin ducu ma obedo pa lurok, ka dok acako moko tic pa ajwaki ki Lulevi, kun dano acel acel ngeyo dog tice ma myero etii. 31Ka dok ayubu kit ma myero kikel iye yen me gityer ikare ma mite kikome, kacel ki gityer me cam me wi mwaka ma okwongo cek.

Po pira ikom lok man, ai Lubangana, wek dong itima maber.