Nekemia 12

Nying Ajwaki pa Lubanga ki Lulevi

1Magi aye ajwaki pa Lubanga ki Lulevi mayam gua ki i lobo opii ma gudwogo kacel ki Jerubabel wod pa Cealtiel ki Yecwa: Ceraya, Jeremia; Ejira, 2Amaria, Maluk, Katuc, 3Cekania, Rekum, Meremot, 4Iddo, Ginetoi, Abija, 5Mijamin, Maadia, Bilga, 6Cemaya, Joyarib, Jedaya, 7Calu, Amok, Ilkia, Jedaya. Jo magi aye gubedo ludito pa ajwaki ki pa utmegigi ikare pa Yocwa.

8Jo magi aye Lulevi: Yecwa, Binui, Kadmiel, Cerebia, Juda, ki Matania, ma en ki utmegine obedo ngat acel maloyo lok ikom wer me lega me pwoc ma kiwero bot Lubanga.

9Bakbukia, ki Uno ma utmegigi bene gicung tungcel ma gikeme kwedgi ikare me lega.

Likwayo pa Yocwa ma obedo ajwaka madit

10Yocwa onywalo Joyakim, Joyakim onywalo Eliacib, Eliacib onywalo Joyada, 11Joyada onywalo Yonacan; ki Yonacan onywalo Jadua.

Ludito ma giloyo dogola pa ajwaki

12Ikare ma Joyakim obedo ajwaka madit, ajwaki magi aye onongo gin ludito maloyo dogola pa kwarigi: i kaka pa Ceraya, Meraya, i kaka pa Jeremia, Anania; 13i kaka pa Ejira, Meculam, i kaka pa Amaria, Yekokanan; 14i kaka pa Maluki, Yonacan; i kaka pa Cebania, Yucepu; 15i kaka pa Karim, Adna; i kaka pa Merayot, Kelkai; 16i kaka pa Iddo, Jekaria; i kaka pa Gineton, Meculam; 17i kaka pa Abija, Jikri; i kaka pa Miniamin ki, i kaka pa Moadia, Peletai; 18i kaka pa Bilga, Camua; i kaka pa Cemaya, Yekonatan; 19i kaka pa Joyarib, Matenai; i kaka pa Jedaya, Uji; 20i kaka pa Calai, Kalai; i kaka pa Amok, Eber; 21i kaka pa Ilkia, Kacabia; i kaka pa Jedaya, Netanel.

Nying jo me dogola pa ajwaki ki pa Lulevi

22Kicoyo nying ludito ma giloyo jo me dogola pa kwaro pa Lulevi woko ducu kikore, ikare me kwo pa Eliacib, Joyada, Yokanan, ki Jadua. Dok bene kicoyo nying ajwaki ducu nio wa ikare me loc pa rwot Dario me Percia.

23Likwayo pa Levi ma giloyo dogola pa kwarigi kicoyo nyinggi woko i buk me Tekwaro nio wa ikare pa Yokanan wod pa Eliacib.

Poko tic ma myero kitii i Ot pa Lubanga kikore

24Lulevi onongo kiribogi woko gubedo i dul mapatpat ma lulocgi i dog tic obedo Kacabia, Cerebia, ki Yecwa wod pa Kadmiel. Dul me aryo gupako Lubanga ki wer lawangacel kun giloco wer aloca, ma gumiyo pwoc bot Lubanga, kun gulubu cik ma rwot Daudi ma en dano pa Lubanga yam ociko.

25Jo magi aye gubedo lugwok dogola me Ot pa Lubanga, dok bene onongo gikuru ot kano jami matye cok ki dogola me Ot pa Lubanga: Matania, Bakbukia, Obadia, Meculam, Talmon, ki Akub.

26Jo magi gubedo ikare pa Joyakim, wod pa Yecwa ma en wod pa Yekojadak, ki ikare pa Nekemia ma obedo laloc, ki ikare pa Ejira ma en obedo ajwaka dok bene obedo lapwony Cik pa Lubanga.

Nekemia odyero cel me taun madit ma kiyubu

27Ikare me kwero cel me Jerucalem, kikelo Lulevi ducu ki i kabedo ducu mayam gibedo iye, wek dano acel acel okwer nino man ki yomcwiny, ki wer me miyo pwoc, kacel ki wer ma kigoyo iye atego agoyagu, ki nanga ki opukgu. 28Jo me dogola pa luwer gua ki i kabedo ducu ma orumu Jerucalem, ki i taun ducu pa jo Netopa; 29ki jo mukene gua ki i Bet-gilgal ki i lobo ma orumu Geba ki Ajimavet, kama onongo yam dong gugero iye pacogi ma orumu Jerucalem. 30Ajwaki kacel ki Lulevi gulonye keken gi; ka dok gulonyo lwak ki dogcel ducu ki cel me taun meno bene.

31Ci an akelo rwodi me Juda ci aketo gucung malo iwi cel me taun, ka acako ketogi i dul madito aryo guwoto gurumu gang, kun giwero wer me miyo pwoc bot Rwot Lubanga. Jo ma i buca acel guwoto ki iwi cel me taun madit nio kwede wa i Dogcel me wi Odur. 32Kocaya owoto kun lubu ngegi, ka dok nucu pa rwodi me Juda gulube. 33Ajwaki magi ma gubedo kakutu tum aye dok gulubu, Ajaria, Ejira, Meculam, 34Juda, Benjamin, Cemaya, ki Jeremia. 35Ka dok ajwaki gubino gulubugi ma gubedo kakutu tum obedo Jekaria wod pa Yonacan, ma wod pa Cemaya, ma wod pa Matania, ma wod pa Mikaya, ma wod pa Jakur, ma wod pa Acap, 36kacel ki jo magi ma gin jo me kakane ma gulubu en: Cemaya, Ajarel, Milalai, Gilalai, Maai, Netanel, Juda ki Kanani; gubino ma gumako jami me wer pa Daudi ma en dano pa Lubanga. Ejira ma en lapwony Cik pa Lubanga owoto mere anyim obedo katelo wigi. 37Ka guo i Dogcel me Wang It guwoto atir guito ikom rwom ma cito i gang kal pa Daudi, ci gukato ot me kal pa Daudi woko guwok ki malo, ka gudok cen ikom cel macok ki Dogcel me Pii matye tung kunyango me Jerucalem.

38Jo ma i dul mukene ma gubedo kamiyo pwoc bot Lubanga guwoto gudok yo tung lacam, ka dong an, kacel ki nucu pa lwak wacako lubugi. Wawoto ki iwi cel mamalo inyim Lubele me Keno, wao kwede ikom Cel Malac, 39ki kunu wawoto wakato ki iwi Dogcel pa Epraim wawok ki i Dog Gang Macon, ka wao kwede i Dogcel me Rec, ka wawok ki inget Lubele ma kilwongo Kananel ki inget Lubele ma kilwongo Miya, ka wacito wao kwede wa i Dogcel me Romo; ka dong wabino wagiko wotwa cok ki Dogcel pa Lukurpiny. 40Kitmeno lwak ducu ma gitye i dul aryoni ma gubedo kamiyo pwoc bot Lubanga guo i kabedo kama Ot pa Lubanga tye iye, an kacel ki nucu ludito pa lwak onongo watye kacel. 41Ajwaki magi onongo gitye i dul ma mera: Eliakim, Maaceya, Miniamin, Mikaya, Elioenai, Jekaria ki Anania, ma gumako tum; 42ki Maaceya, Cemaya, Eleajar, Uji, Yekokanan, Malkija, Elam ki Ejer. Luwer guwero wer ki dwon gi malongo adada ma Jejrakia aye obedo katelogi ki wer.

43Inino meno kityero gitum mapol, dok lwak bene gubedo ki yomcwiny madwong, pien Lubanga omiyo cwinygi obedo yom tutwal. Mon kacel ki lutino bene cwinygi obedo yom matek ikare meno me kwero cel me taun. Ma omiyo wo me yomcwiny ma jo gubedo kadange kwede i Jerucalem owinye wa i kabedo matye kamabor.

Jami ma kimiyo pi woro Lubanga i Ot pa Lubanga

44Ikom nino meno kiyero jo ma giloyo kicika odi me kano jami, kama kigwoko iye jami ma kimiyo me kony pi Ot pa Lubanga, ngano manyen ki nyig yat mukwongo cek i mwaka acel acel, kacel ki dul acel me apar, kibiketo kit macalo cik mito pi konyo ajwaki ki Lulevi, kun lubu kit wel poti ma i taun matino. Jo Juda cwinygi obedo yom tutwal ikom ajwaki ki Lulevi ma gubedo katic. 451Gin gutiyo gin ma Lubangagi ocikogi, dok bene gutiyo tic me lonyo dano, kit macalo yam luwer ki lugwok dogola gutimo, kit macalo con Daudi ki wode Solomon guciko pire. 46Ikare pa Daudi ki Acap ma onongo en ladit me wer, luwer onongo giwero wer me pak ki me miyo pwoc bot Lubanga. 47Ikare pa Jerubabel ki ikare pa Nekemia jo Icrael ducu gubedo kamiyo jami i kit macalo mot me nino ducu pi konyo luwer me Ot pa Lubanga, ki pi lugwok Ot pa Lubanga. Ci lwak bene gumiyo gityer maleng bot Lulevi, ki Lulevi bene gumiyo dul ma mite bot ajwaki ma gin likwayo pa Aron.