Esta 1

Daker Vasti ocayo dog rwot Akacwero

11

Man lok ma otime ikare pa Akacwero mayam loyo piny nia ki i India nio kwede wa i lobo Etiopia, kun loyo dul lobo mapatpat maromo miya acel ki pyere aryo wiye abiro kulu. 2Ikare meno onongo rwot Akacwero bedo iwi kom kere matye i gang kale i Cuca.

3I mwaka me adek me loce en otedo karama mo pi rwodine ki ludito wi tice ducu. Ludito wi mony me Percia ki me Media gubino iye, kacel ki ludito me awora ki lulo dul lobone mapatpat ducu. 4En obedo kanyutu botgi lonyo ki deyo matye ite kere ki dit me loce, ki woro ma lwak omiye, pi lwak nino mapol, nino miya acel ki pyere aboro kulu.

5Ka kare meno dong otum, rwot otedo karama pi jo ducu ma gibedo i gang madit me Cuca, jo madongo ki matino. Obedo kwedgi pi nino abiro idyekal ki i poto me kanamo matye inget ot ma mere. 6Dyekale kideyo ki cuka bongo pamba matare ki bongo ma bulu ma kitweyo ki tol uci camanini ki tol ma lamarlamar ma kirwako i agit me ryal ma ikom wir ma kiyubugi ki got mapwot me wel. Gibedo onongo tye ma kitiyo ki jabu ki ryal. Kama kicibogi iye onongo kipeto iye godi ma kideyo ki kidi matino makwar ki matar, ki gin mukene maryeny ki kidi matino me wel.

7Kikelo ginamata i kikopo me jabu ma kitgi patpat; rwot onongo omiyo kionyo kongo bwino mabup tutwal ma oporo lonyone. 8Kongo bwino bene kimato ma lubu cik, kun pe kidiyo dano mo tektek; pien onongo rwot omiyo cik bot ludito tic ducu ma i gang kale ni dano acel acel omat kit ma cwinye mito. 9Vasti ma en aye Daker otedo bene karama pi mon, ci obedo kwedgi i gangkal pa rwot Akacwero.

10Inino me abiro me karama meno, ka cwiny rwot dong odoko yom ki mat, ci en ociko Meuman, Bijita, Karbona Bigita, Abagita, Jetar ki Karkac, ma gin aye ludito kal abiro ma kikologi ma gitiyo bot rwot Akacwero. 11En ocikogi ni myero gukel Vasti ma Daker mere inyime, kun nongo kirwako lalukanane me ker i wiye, wek onyute bot lwak jo ma rokgi patpat ki bot lutelane kacel ki welene ducu wek gunen kit ma dakone ber kwede, pien mwonya mada me anena. 12Ento ka Vasti owinyo, ci okwero lubu cik pa rwot ma onongo ooro ki ludito kale boteni, ci en pe ocito. Pienno omiyo kiniga omako rwot mada, cwinye owang iye matek.

13Ci rwot ocako lok ki luryeko ma gingeyo lok me kare mapatpat, pien meno obedo kit pa rwot; kare ducu en penyo lok bot jo ma gingeyo cik ki kit me ngolo kop. 14Jo macok kwede gin aye Karcena, Cetar, Adimata, Tarcic, Merec, Marcena ki Memukan, ma gin luker pa jo Percia ki Media ma gitye ki twero me bino bot rwot ikare mo keken, ludito ma gikwongo nyim jo mukene ducu ma i kere pi ditogi. 15Ci en openyogi ni, “Ite cik myero kitim gin ango ikom Daker Vasti, pien pe olubu cik pa rwot Akacwero ma onongo ooro ludito kale bote pi lwonge?”

16Ci Memukan odok iye inyim rwot ki rwodi ni, “Daker Vasti pe otimo bal bot rwot keken, ento bot luker ducu me rok ducu ma i dul lobo ducu ma rwot Akacwero loyoni; 17pien tim man ma Daker otimoni biwinye bot mon ducu, miyo gibicayo coggi ki iwanggi atyer kun giwaco ni, ‘Rwot Akacwero ociko ni kikel Daker bote, ento dakone okwero bino woko.’ 18Wa tin kikome mon madito pa jo Percia ki Media ma gutyeko winyo tim pa Daker gibitito pire bot rwodi ma ite loc pa rwot, ci meno binyayo cac ki kiniga madwong mada. 19Kace ineno ni ber, wek kicwal cik ma iketo pi diti in rwot, dok wek kicoo ikin cik pa jo Percia ki jo Media ma pe dong kitwero lokone ni, Daker Vasti dong pe myero oo inyim rwot Akacwero matwal, dok wek rwot omii dite me bedo Daker bot dako mukene ma dok ber kato en. 20Ka cik ma rwot biketoni kibitito pire romo lobo ducu ma ite kere, kit macalo dite tye kwedeni, ci bimiyo mon ducu woro coggi, kadi ka rwome tye malo onyo piny.”

21Lok meno oyomo cwiny rwot ki lukere ducu, ci rwot otimo kit macalo Memukan owaco. 22Ci en ocwalo waraga i kabedo ducu ma en loyo, kun onongo kicoyo bot jo me dul lobo acel acel ki kit nukuta ma jo kunu gingeyo, ki i leb mapatpat ma oporo rok mapatpat ducu kun waco ni laco acel acel myero obed rwot i ode, dok obed bene ki twero ikom dakone kacel ki lutinone.