Esta 2

Esta odoko Daker

1Lacen ki inge lok man, ikare ma kiniga pa rwot Akacwero dong opye, en ocako po pi Vasti ki gin ma ceng otimo, ki gin ma kiciko ikome. 2Ci lutic pa rwot ma gitiyo bote guwaco ni, “Myero kiyeny anyira pi rwot, anyira ma mwonya ma pud gudongo adonga. 3Wek rwot oyer ludito oketgi i dul lobo acel acel ma en loyo, wek gucok anyira magi ducu i ot pa mon i gang kale Cuca, gubed ite loc pa Egai ladit ma kikoloni ma gwoko mon pa rwot. Myero kipok botgi moo ma ngwecgi kur me wiregi, 4ci wek nyako mo ma oye wang rwot odok Daker ma ka Vasti.” Lok man oyomo cwiny rwot, ci otimo kitmeno.

5Ikare meno onongo tye Lajudaya mo ma bedo i gang madit me Cuca ma nyinge Mordekai. Wone obedo Jair, wod pa Cimei ma wod pa Kic me kaka pa jo Benjamin. 61Ikare ma Nebukadnejar rwot me Babilon otero Yekonia rwot me Juda i opii, kun otere ikin lwak jo mukene ma okwanyogi ki i Jerucalem onongo Mordekai obedo ikin jo ma kitero. 7En onongo opito Adaca, ma en aye Esta, nya omin wone, pien onongo pe tye ki wone kadi mine. Nyakoni onongo ber dok mwonya mada; ikare ma wone ki mine guto woko Mordekai oloko en odoko macalo nyare.

8Dong ikare ma rwot oketo cike loke oywek, ma dong kicoko anyira mapol i gang madit me Cuca, kiketogi i cing Egai ma lagwok mon pi rwot, Esta bene kitero i gang kal kunu, ci kikete i cing Egai. 9Ci nyakoni oyomo cwiny Egai tutwal, cwinye opwoye mada, omiyo en omine moo wire mapatpat oyotoyot, kacel ki cam ma oromo pi en, dok oyero angeca abiro ki i gang kal pa rwot pi konyo en, ci omiyo en ki angecane kabedo maber makato i gang kama kigwoko iye mon.

10Esta pe onyutu roke, kadi ki wate mo, pien Mordekai ociko en ni pe onyuti. 11Dong nino ducu Mordekai woto inge cel me gang ma kigwoko iye mon wek enen kit ma Esta tye kwede ki gin ma time ikome.

12Kare ma kiciko pi gwoko mon pi yubu bergi oromo mwaka acel kulu; kun pi dwe abicel giwire ki moo mura, dok pi dwe abicel mukene gitiyo ki moo mapatpat ma ngwecgi kur ki moo ma mon wire kwede. Ka lacen kitero nyako acel acel bot rwot Akacwero ka karene oromo. 13Ka kare pa nyako mo oromo me cito kanene ki rwot, kiye en me tero kit jami ducu ma iye mito ma en a kwede ki kama kigwoko iye mon me cito kwede i gangkal pa rwot. 14En cito otyeno ci dwogo cen odiko cito i kabedo me aryo ma kigwoko iye mon, ma lagwok mon ma nyinge Caacgaj aye loyo. En dano ma kikolo ma gwoko mon angeca pa rwot. Ka nyako dong odwogo ki bot rwot en pe dok dok cen bot rwot, kono ka nyo rwot dong omito en ce olwongo en ki nyinge ci Caacgaj cito kele bot rwot doki.

15Ka nino pa Esta nya pa Abikail omin won Mordekai, ma Mordekai oloko en odoko nyare oromo me cito kaneno rwot, ci en pe ocoke ki gin mo keken kono jami ma en openyo mere ladit Egai ma kikolo ma en aye lagwok mon pa rwot, ci olubu tame. Dano ducu ma guneno Esta gupwoye mada. 16Ikare ma kitero Esta bot rwot Akacwero i gangkal kere i dwe me apar, ma en aye dwe me Tebet,2 i mwaka me abiro me loc pa rwot. 17Ci cwiny rwot ocako maro Esta makato mon mukenenigu ducu. Esta onongo kica ki gum madit mada ki bote, makato anyira mukeneni ducu. Ci dong rwot otugi kwanyo lalukana oruku iwiye, oketo en me bedo Daker ma ka Vasti. 18Ci rwot otedo karama madit mada ki lukerne ki ludito wi tice ducu; man obedo karama me woro Esta, omiyo bene yweyo i dul lobo ducu ma en loyo, dok opoko mot kit macalo lonyo me kere tye kwede.

Mordekai olaro kwo pa rwot

19Ikare ma kicoko anyira kacel tyen me aryone, kimiyo bot Mordekai dit ite loc pa rwot. 20Esta onongo pe otito kit wate nyo roke, kit ma Mordekai onongo ocike kwede; pien Esta onongo winyo Mordekai kit mayam en opite kwede. 21Inino mo onongo Mordekai obedo i dog tic pa rwot, Bigitan ki Terec, jo aryo ma kikologi ma gigwoko dogola pa rwot gubedo ki kiniga, ci guyenyo yo me neko rwot Akacwero woko. 22Mordekai ongeyo lok man ci otito woko ki Esta Daker, ci Esta otito ki rwot kun waco ni Mordekai aye otite. 23Ka kiyenyo tyen lok man ci kinongo ni ada, ci jo aryonu ducu kitugi deyogi adeya ikom yat me deyo dano. Ci rwot ociko ni kicoo lok man woko i buk me lok ma otime ikare me loc pa luker ma giloyo lobo meno.