Esta 3

Aman opiro lok me neko Lujudaya

1Lacen ki inge meno rwot Akacwero omiyo dit ki Aman wod pa Amedata, ma jo Agag. En omedo rwome ci omiye tic me loyo luker ducu ma ite loce. 2Dong lutic pa rwot ma gitiyo tic ite loce ducu gikule piny ka giworo Aman, pien rwot onongo ociko kumeno. Ento Mordekai pe onongo kule piny pi wore. 3Ci lutic ma gitiyo ite loc pa rwot gupenyo Mordekai ni pingo en turu cik pa rwot. 4Gin gubedo kalok bote nino ki nino ento en pe owinyo, ma omiyo gucako tito bot Aman me neno kace en twero ye ni Mordekai otim kumeno, pien Mordekai onongo otito botgi ni en Lajudaya. 5Ka Aman oneno ni Mordekai pe kule piny pi wore, kiniga ocako make matek mada. 6Ento Aman pe omito ni enek Mordekai kene; macalo dong oniang maber ni Mordekai Lajudaya, omito ni enong yo me neko Lujudaya ducu ma ite loc pa rwot Akacwero.

7I dwe mukwongo, ma en aye dwe me Nican, i mwaka me apar wiye aryo me loc pa rwot Akacwero, en ociko pire ci gucako bolo kwir ma kilwongo ni Pur inyim Aman nino ki nino, ka gibedo kabolone dwe ki dwe, nio ka ogik ikom dwe me apar wiye aryo, ma en aye dwe me Adar inino me apar wiye adeke.

8Ci Aman ocako tito lok man bot rwot Akacwero ni, “Tye rok mo ma guket woko ata ikin rok mukene mapatpat ma i dul lobo ducu ma ite keri. Cikgi pat ki cik pa rok mukeneni ducu, dok pe gigwoko cik ma meri, in rwot; dong kony mo peke boti me weko ni jo meno gubed kwo. 9Ka in rwot i ye, ci omyero iket cik me tyekogi woko, ci abiculu talanta alip apar me ryal bot jo ma giloyo tici, wek guket i ot kano lim pa rwot.”

10Ci rwot owoto agit ki i cinge, omiyo bot Aman ma jo Agag, wod pa Amedata, lamerok pa Lujudaya. 11Ci rwot owaco bot Aman ni, “Lim ducu kibimini, ki rok meno bene, itii kwedgi kit ma ii mito.”

12Kicako lwongo lukaran pa rwot inino dwe apar wiye adek me dwe mukwongo, ci gucako coyo cik kitmacalo Aman ociko ducu bot luloyo madongo pa rwot, ki bot lulo dul lobo mapatpat ducu, ki bot rwodi maloyo rok mapatpat ducu, kun onongo kicoyo bot jo me dul lobo acel acel ki kit nukuta ma jo kunu gingeyo, ki i leb mapatpat ma oporo rok mapatpat ducu. Kicoyo inying rwot Akacwero, ci kimwono kun gidiyo agit pa rwot ikome wek odok cik. 13Kimiyo luter waraga ci guringo ki waraga i dul lobo ducu ma ite loc pa rwot ni myero kinek, kityek dok kijwer Lujudaya woko ducu, jo matino ki madongo, mon wa lutino, inino acel keken, inino dwe apar wiye adek me dwe me apar wiye aryo, ma en aye dwe me Adar, ci kiyak jamigi woko bene. 14Kipoko kopi me waraga meno i dul lobo acel acel me yweko lok man dong obed macalo cik, wek rok ducu gubed ma gutere pi nino meno. 15Luter waraga guringo oyotoyot mada pi cik pa rwot, dok cik meno kimiyo ongene i gang madit me Cuca bene, Aman ki rwot gubedo meggi piny kamat, ento jo matye i gang me Cuca gubedo kacabe meggi acaba.