Nekemia 10

1Ngat ma okwongo keto cinge obedo Nekemia wod pa Kakalia, ma en laloc me lobo, ka ingeye Jedekia bene oketo cinge. 2Jo ma guketo cinggi bene obedo ajwaki magi: Ceraya, Ajaria, Jeremia, 3Packur, Amaria, Malkija, 4Katuc, Cebania, Maluk, 5Karim, Meremot, Obadia, 6Daniel, Gineton, Baruk, 7Meculam, Abija, Mijamin, 8Maajia, Bilgai, ki Cemaya.

9Lulevi ma guketo cinggi obedo: Yecwa wod pa Ajania, Binui ma ikin likwayo pa Kenadad, Kadmiel; 10ki utmegigi, Cebania, Kodia, Kelita, Pelaya, Kanan, 11Mika, Rekob, Kacabia, 12Jakur, Cerebia, Cebania, 13Kodia, Bani, Beninu.

14Jo magi aye gubedo ludito maloyo lwak: Paroc, Pakat-moab, Elam, Jatu, Bani, 15Buni, Ajgad, Bebai, 16Adoniya, Bigvai, Adin, 17Ater, Kejekia, Ajur, 18Kodia, Kacum, Bejai, 19Karip, Anatot, Nebai, 20Magpiac, Meculam, Kejir, 21Mecejabel, Jadok, Jadua, 22Pelatia, Kanan, Anaya, 23Kocea, Anania, Kacub, 24Kalokeci, Pilka, Cobek, 25Rekum, Kacabna, Maaceya, 26Akia, Kanan, Anan, 27Maluk, Karim, Baana.

Cike ma kimoko

28Wan jo Icrael, ajwaki, Lulevi, lugwok dogola me Ot pa Lubanga, luwer, ki lutic i Ot pa Lubanga ki jo mukene ducu ma onongo wapoke woko kenwa ki ikom jo ma gubedo i lobo meno, wek walubu Cik pa Lubanga, wan kacel ki monwa ki lutinowa awobe ki anyira ducu ma dong gin dito ma giromo niang lok, 29kombedi waribe ki utmegiwa, ki luditowa kun wakwongo kwong ma walame iye kekenwa ni wek can opot ikomwa kace pe wabilubu cik man, kun nongo pe walubu Cik pa Lubanga mayam Moses latic pa Lubanga omiyo botwa. Wakwongo ni wabibedo kun watiyo gin ducu ma Rwot ma en Rwotwa yam ociko, ki dok ni wabigwoko cike ducu ki gin ma en mito ni watii. 301

Wan pe wabimiyo lurok ma gibedo i lobowa me nyomo anyirawa, ki wan bene pe wabinyomo anyiragi bot awobewa. 312

Kace lurok ma gitye i lobo man gukelo jamigi mo nyo kal, nyo kit nyig cam mo me catone botwa inino me Cabit, nyo inino mo maleng, ci wan pe wabiwilo jamigi.

Dok pe wabipuru pur i mwaka me abirone, ikare meno bene wabingolo banya ducu ma myero kicul. 323

Wan waye me miyo dul acel me adek me cekel mwaka ki mwaka pi konyo tic i Ot pa Lubangawa. 33Wabimiyo jami magi pi woro Lubanga; mugati me aketa inyim Rwot, gityer me moko kwon pi nino ducu, ki gityer me gitum awanga me nino ducu, gityer maleng pi nino me Cabit ducu, gityer me nino madito me por dwe, nino madito ma kiciko ducu, jami maleng ducu, ki gitum me bal pi kwanyo bal pa jo Icrael, ki jami ma mite pi tic ducu ma kitiyo i Ot pa Lubanga.

34Wan lwak, kacel ki ajwaki, ki Lulevi, wabibolo kwir mwaka ki mwaka me moko kaka mene ma omyero gukel yen i Ot pa Lubanga me wango gitum awanga ma kityero bot Rwot Lubangawa, kit macalo cik mito, kun kilubu dog odi pa kwarigi, ikare ma kiciko. 354

Wan waye me tero kal manyen ma wakayo, kacel ki nyig yadi ducu mukwongo cek, me bedo gityer i Ot pa Lubanga mwaka ki mwaka. 365

Dok bene ngat acel acel ikinwa bitero latin laco ma en latin me kayone, miyo bot ajwaki ma gin lutic i Ot pa Lubanga, me dyerone bot Lubanga, ki dok bene wabimiyo lutino dyangiwa me kayo ma dyangiwa gunywalo ki lutino kayo romi nyo dyegi ma romiwa nyo dyegiwa ma gunywalo, kit macalo Cik mito. 376

Wabitero moko kwon me kal manyen mukwongo cek wamiyo bot ajwaki, kacel ki jami me kony mewa ma wamiyo, ki gityer mukene ducu macalo me kongo bwino, moo nyig yat jeituni ki kit kwayi nyig yadi ducu mapatpat, mwaka ki mwaka, kun waketo i kicika odi matino me Ot pa Lubanga.

Wabimiyo dul acel me apar me kwayi cam mapatpat ma wapuru bot Lulevi ma gin lujog dul acel me apar ki bot lupur matye i gangiwa. 387 Ajwaki ma gin likwayo pa Aron gubed kacel ki Lulevi ikare ma nongo gigamo dul acel me apar. Lulevi omyero gutyer dul acel me apar me jami ma kijogo i Ot pa Lubanga, i kicika me odi matino, ki i odi me kano jami. 39Jo Icrael kacel ki Lulevi myero gumii kal, kongo bwino, ki moo me nyig jeituni gukel i odi me kano jami, kama gigwoko iye jami ma kitiyo kwedgi i kabedo maleng, kama ajwaki gitye iye i dog tic, lugwok dogola, ki dul pa luwer. Wan pe wabibwoto Ot pa Lubangawa ata.