Marako 15

Yecu ocung inyim Pilato

(Mat 27:1-2; Luk 23:1-5; Jon 18:28-38)

1Ka piny dong oru, oyotoyot ajwaki madito ki ludongo ki Lupwonycik ki jo ma i Otkot ducu, gupiro lok kacel. Ci gutweyo Yecu woko gutere kwede gumiye bot Pilato. 2Pilato ocako penye ni, “In i Rwot pa Lujudaya bo?” Yecu ogamo ni, “Iwaco kakare gire.” 3Ajwaki madito gucako dote ki lwak adot mapol. 4Pilato dok openye ni, “Pe kong idok iye ce? Pe ineno kit lwak lok mapol ma kidoti kwede ni?” 5Yecu dok pe omedo ki dok iye lok mo, omiyo Pilato ouru matek.

Kingolo ki Yecu kop me to

(Mat 27:15-26; Luk 23:13-25; Jon 18:39—19:16)

6Ikare me nino madito onongo Pilato gonyo mabuc mo acel woko ma dano gulege pire. 7Ikare meno onongo tye laco mo ma nyinge Baraba, mayam kitweyo i buc ikin jo mujemo ma guneko dano ikare me jemogi ni. 8Lwak gucako cito bot Pilato, gupenye wek otim kit mayam tiyoni. 9Pilato openyogi ni, “Wumito mono ni agony ki wun Rwot pa Lujudaya?” 10Pilato onongo ongeyo ni ajwaki madito gumiyo Yecu bote pi nyeko. 11Ajwaki madito gupiyo lwak ni twara kigonyigi Baraba. 12Pilato dok openyo lwak ni, “Laco man ma wun wulwongo ni Rwot pa Lujudaya ni dong abitimo ningning?” 13Lwak gucako woo ni, “Gure woko ikom yatariya.” 14Pilato dok openyogi ni, “Pingo kaa, otimo kit gin ango marac?” Ento lwak gumede ki woo ni, “Gure woko ikom yatariya.” 15Pi mito kweyo cwiny lwak, omiyo Pilato oye gonyigi Baraba, ocako pwodo Yecu ki del, ka omiye wek kigure woko ikom yatariya.

Acikari gungalo Yecu

(Mat 27:27-31; Jon 19:2-3)

16Acikari gutero Yecu wa i dye kal pa laloc lobo matye i Jerucalem, ci gulwongo buca monygi ducu gucoke kacel. 17Ka gucako ruku Yecu ki bongo makwar, ka gudolo lalukana okutu, gurwako iwiye, 18kun gimote ni, “Itye ba, Rwot pa Lujudaya!” 19Gucako goyo wiye ki odo gayi, ka gungulu laa bene ikome, kun girumu cong gi me mine woro. 20Ka dong gutyeko ngale, ci gulunyo bongo makwar woko ki ikome, ka dok guruke ki bongine kikome, ci gutere kwede woko ka gure ikom yatariya.

Kiguro Yecu ikom yatariya

(Mat 27:32-44; Luk 23:26-43; Jon 19:17-27)

211

Gucako mako dano mo ma onongo obikato ma oa ki ikin gang ci gudiye katingo yatariya pa Yecu. Dano man nyinge Cimon dano me Cirene, won Alegijanda ki Rupo. 22Gutero Yecu i kabedo ma kilwongo ni Golgota2, ma teloke ni kabedo me cogo wic. 23Gucako miye kongo bwino ma girubu iye yat murra; ento en okwero matone woko. 243 Ka dong gugure ikom yatariya, ci gupoko bongine woko ikin gi, kun gibolo kwir wek kinen bongi mene ma ngat acel acel bitero. 25Kiguru Yecu ikom yatariya i cawa adek me odiko. 26Kicoyo i waraga gin ma nyutu lok ma kidote iye ni, “Rwot pa Lujudaya.” 27Kigure kacel ki luyak mogo aryo, dano acel tung lacuc ki acel tung lacam. [284 Omiyo ginacoya ocobe kakare ni, “Kikwane ikin lubalo.”] 295 Jo mayam gimol gikato ki ka ngete gubedo ka yete, kun giyengo wigi, ma giwaco ni, “Nye, in ma imuku Ot pa Lubanga woko, ci igero pi nino adek kekeni, 30dong ilare keni, a woko ki ikom yatariya!” 31Ki ajwaki madito bene gungale, ma giloko ki luwotgi kacel ki Lupwonycik bene, kun giwaco ni, “Yam bedo ka laro jo mukene, pe twero lare kene. 32Wek tin Kricito, ma Rwot me Icrael, olor piny ki ikom yatariya, wek wanen ka wacak ye.” Wa jo ma kigurogi kacel kwede bene gucaye.

Yecu oto

(Mat 27:45-56; Luk 23:44-49; Jon 19:28-30)

33Ka cawa oromo abicel, piny ocido woko macol i lobo ducu, nio kwede wa i cawa abongwen. 346 Ikom cawa abongwen Yecu odange ki dwon malongo ni, “Eloi, Eloi, lama cabaktani?” Ma teloke ni, “Lubangana, Lubangana, itenya woko pingo?” 35Ka jo ma onongo gucung kunu guwinyo loke, ci guwaco ni, “Winyu ka en lwongo Eliya ca.” 367 Ci dano acel oringo, okwanyo amor, olutu i kongo bwino mawace, orwako iwi tal gayi, omiyo ki Yecu ni omati, kun waco ni, “Weku mono kong wanen ka Eliya bino ka kwanye woko ki ikom yatariya.” 37Yecu dok odange ki dwon malongo, ka oto. 388

Ci bongo kicika ma i Ot pa Lubanga ocako yec woko opoke dul aryo, oyec ki malo, nio kwede wa i tere piny. 39Ladit maloyo acikari, ma onongo ocung cok inyime, ka oneno kit ma Yecu oto kwede, owaco ni, “Adada, dano man onongo Wod pa Lubanga!” 409

Dok onongo tye mon mogo ma gucung ki cen ka nenone; onongo tye Maliam Lamagdala, ki Maliam min Yucepu matidine ki Yoce, ki Calume. 41Gubedo kalubu kor Yecu ki i Galilaya, gubedo ka konye bene, dok onongo tye lwak mon mapol ma gubino kwede wa i Jerucalem.

Kiyiko kom Yecu i lyel

(Mat 27:57-61; Luk 23:50-56; Jon 19:38-42)

42Ikom nino me Yube, en nino ma inyim ceng Cabit, ki i otyenone, 43Yucepu me Arimataya obino; en yam dano madit ma lamemba me Otkot ma kipwoyo bene, en kikome obedo ka kuru ker pa Lubanga. En odiyo cwinye, ci odonyo wa bot Pilato, olego kom Yecu. 44Pilato ouru ka dong otyeko to woko oyot kumeno; ci olwongo ladit maloyo acikari, openye kace dong oto woko. 45Ka ladit maloyo acikari otyeko niango en, ci omiyo kom Yecu bot Yucepu. 46Yucepu owilo bongo cuka matar, maryeny ni dangdang, ci okwanyo kom Yecu woko ki ikom yatariya, oboyo ki cuka meno, ka otero kome opyelo i lyel ma en okwinyo oroko i got, ci ocego wiye woko ki got ma oloro ki dog lyel. 47Maliam Lamagdala ki min Yoce guneno kama kiyiko iye kome.