Marako 14

Ludito gupiro lok ikom Yecu

(Mat 26:1-5; Luk 22:1-2; Jon 11:45-53)

11

Nino madito me Kato2 ki me Mugati ma Tobi pe iye onongo odong nino aryo, ajwaki madito pa Lubanga ki Lupwonycik guporo lok me mako Yecu ki ryeko ka wek gineke. 2Pien onongo guloko ni, “Pe omyero kimak inino madito, miyo lwak bituge.”

Kiwiro Yecu ki moo i Betania

(Mat 26:6-13; Jon 12:1-8)

33

Ikare ma Yecu tye i ot pa Cimon ladobo, ma en dong tye ka cam, dako mo obino ma kun tye ki adomo moo nard kikome ma wele tek tutwal ni. Ocako turu dog adomo moo ne, ci oonyo iwiye Yecu. 4Ento cwiny jo mogo ocwer, ci gucako lok keken gi ni, “Pingo moo man kibalo abala? 5Pien moo man kono nene kicato woko, kono nene okelo lim makato denari miya adek kulu, ka wek gimi ki lucan.” Ci gucako tuge ikom dako meno matek. 6Yecu ocako waco ni, “Wuweke obed mot, wuyelo dako man pingo? En otiyo gin maber tutwal ikoma. 74 Pien wun wutye kacel ki lucan kare ducu, dok wutwero konyogi ikare ducu ma wumito; ento an pe abibedo kwedwu kare ducu. 8En otiyo gin ma en twero; dok en aye okwongo onyo moo ikoma me yika. 9Adada awaco ki wun ni, i kabedo ducu ma iwi lobo kama kibitito iye lok me Kwena Maber, gin ma dako ni otiyo bene kibitito pire, wek obed me nipo pire.”

Juda oye dobo Yecu

(Mat 26:14-16; Luk 22:3-6)

10Juda Lakeriot, ma en dano acel ma ikin jo apar wiye aryo ni, ocito bot ajwaki madito pa Lubanga pi miyo Yecu i cinggi. 11Ka guwinyo loke oyomo cwinygi, gucako cike me miye lim. Juda cut ocako yenyo kare maber ma eromo miyo ki Yecu i cinggi.

Yecu ocamo cam me Kato ki lupwonyene

(Mat 26:17-25; Luk 22:21-23; Jon 13:1-30)

12Ikom nino mukwongo me nino madito me Mugati ma Tobi pe iye, ma kitumu iye latin romo me Kato, lupwonye gupenye ni, “Imito waciyubi kabedo kwene wek icam iye Karama me Kato?” 13Ci en ooro lupwonyene aryo ki ikin gi kun cikogi ni, “Wucit wa i Jerucalem; ci wubirwate iye ki laco mo ma oyeyo agulu pii, en aye wulub kore. 14Kama en odonyo iye ni, en aye wupeny iye won ot ni, ‘Lapwony owaco ni, ot welo ma mera tye kwene, kama an abicamo iye cam me Kato,5 kacel ki lupwonyena?’ 15Ci en binyutu botwu kicika ot ma malone, ma kipeto, kiyubu maber, ci wuyub ki wan kabedo kunu.” 16Lupwonye gucito, ci gudonyo i Jerucalem, gunongo kit macalo Yecu owaco botgi ni, ci gucako yubo cam me Karama me Kato kunu.

17Ka piny dong oyutu ci obino ki jone apar wiye aryo. 186 Ka gubedo piny ci gucako camo cam, ci Yecu owaco ki gin ni, “Adada awaco ki wun ni, ngat acel ki ikinwu bidoba, en aye dano ma camo kacel kweda.” 19Gin gucako kumu cut, kun dano acel acel penye ni, “An bo?” 20Yecu owaco ki gin ni, “Tye ngat acel ikinwu wun jo apar wiye aryo ni, en aye dano matye ka gweyo dek i atabo acel kweda ni. 21Pien Wod pa dano tye kawot kit man pi cobo kit ma kicoyo ikome ni; ento dano ma dobo Wod pa dano ni bineno can! Onongo bedo ber ka dano meno nene pe kinywalo.”

Cam me otyeno pa Rwotwa

(Mat 26:26-30; Luk 22:14-20; 1 Kor 11:23-26)

22Ka gitye kacamo cam, Yecu omako mugati; ci olego gum ikome, ocako baro iye, omiyo bot lupwonye, kun waco ni, “Wugam man, man aye koma.” 23Dok otingo kikopo, ci opwoyo, ocako miyone botgi, gin gumato. 247 Yecu owaco botgi ni, “Man aye remona me gin cike ma ocwer pi jo mapol. 25Adada awaco bot wun ni, pe dok abimato pig olok, nio wa ikare ma abicako dok matone manyen wa i ker pa Lubanga.” 26Ka dong gutyeko wero wer, ci gucito iwi got Jeituni.

Yecu otito ni Petero bikwere woko

(Mat 26:31-35; Luk 22:31-34; Jon 13:36-38)

278

Yecu owaco botgi ni, “Wun ducu wubitenya woko adong kena, pien yam kicoyo ni, ‘Abigoyo lakwat, ci romi gibiket woko ata.’ 289 Ento lacen ka dong acer woko ci abitelo nyimwu me cito i Galilaya.” 29Petero ogamo ni, “Kadi ka jo mukene ducu gibitenyi woko, ento an pe abitenyi ata.” 30Yecu owaco bot en ni, “Adada awaco ni, tin ki i dyewor, ma nongo twon gweno peya onwoyo koko kiryo, nongo in dong ityeko kwera woko tyen adek kulu.”

31Ento Petero dok ogamo matek tutwal ni, “Twara ma ato kacel kwedi, pe abikweri.” Gin ducu gucako loko kitmeno bene.

Yecu olego Lubanga i poto Gececemane

(Mat 23:36-39; Luk 22:39-46)

32Gucito i kabedo ma nyinge Gececemane,10 ci ociko lupwonyene ni, “Wun kong wubed kany, an kong acit aleg Lubanga.” 33Ci ocako kwanyo Petero ki Yakobo ki Jon ocito kwedgi. Cwinye ocako poto matek ki kumu bene madwong. 34Ocako waco ki gin ni, “An cwinya tye ka wang matek, mito neka woko. Wubed ka kiyo piny kany.” 35Ocito anyim manok, ci ogungu oryebe piny olego ni, “Kace twere, lakit cawa ni dong oa woko ki ikoma.” 36Ci olego ni, “Abba, Wora, jami ducu twere ki boti; kwany kikopo man woko ki ikoma; pe obed kit macalo an amito, ento obed kit ma in i mito.” 37Ka odwogo botgi onongo gunino woko, ci owaco bot Petero ni, “Cimon, inino woko ce? Pe itwero kiyo piny pi cawa acel mo? 38Wukii, wuleg Lubanga, wek pe wudony i abita mo. Cwiny kikome mito loyo abita pa Catan, ento kom aye nyap.” 39Dok odok kalego Lubanga, kun nwoyo lego lega acel meno. 40Ka dok odwogo onongo gunino woko, pien onongo nino dong omako wanggi tutwal; pe dong gungeyo gin ma myero gudoke iye. 41Ka dok odwogo botgi tyen me adeke, ci openyogi ni, “Wun pud wunino ce? Pud wutye kayweyo bo? Dong oromo, ki cawa bene dong oromo; wod pa dano dong gimiyo woko i cing lubalo. 42Dong wua malo, wacitu; nen dano ma doba dong tye cok.”

Kimiyo Yecu i cing lumonene ci gumake

(Mat 26:47-56; Luk 22:47-53; Jon 18:3-12)

43Cutcut ma Yecu pud tye kalok, Juda otugi tuc; en mayam onongo tye ngat acel ikin jo apar wiye aryo ni. En obino ki lwak ma gua ki bot ajwaki madito pa Lubanga ki Lupwonycik ki ludongo, kun gin tye ki pala lucwan ki odo gu. 44Juda ma ladobe ni onongo omiyogi lanyut. En owaco ni, “Dano ma abimoto kun anoto leme, meno aye en kikome; wutugi make woko, wutere kun wugwoke maber.” 45Ka Juda obino ci okemo bot Yecu atir, ocako mote ni, “Lapwony,” ci onoto leme. 46Gin bene gutugi poto ikome, gumake woko cut. 47Dano mo acel ma onongo ocung ka ngete ocako woto pala lucwane, otongo ki opii pa ajwaka madit pa Lubanga, onguno ite woko. 48Yecu owaco botgi ni, “Wubino bota ki pala lucwan ki odo gu me maka, macalo wubino ikom layak mo? 4911 Abedo ka pwony i Ot pa Lubanga jwijwi, ma kun abedo iye kwedwu, ci pe yam wumaka do. Dong wumaka, wek ginacoya ocobe kakare.” 50Gin ducu guringo woko, guweke odong kene.

Awobi ma oringo woko

51Awobi mo ma onongo odwalo cuka bongo keken ikome, olubu kor Yecu; gin gumake bene, 52ento en opuce oweko cukane odong, ci oringo woko munero.

Yecu ocung i Otkot kapido

(Mat 26:57-68; Luk 22:54-55,66-67; Jon 18:13-14,19-24)

53Gutero Yecu bot ajwaka madit pa Lubanga, kun onongo ajwaki madito ki ludongo gu ki Lupwonycik gucoke kacel. 54Petero obedo kalubu kor Yecu ki cencen nio kwede wa idyekal pa ajwaka madit. Obedo ka oyo mac kacel ki lutic.

55Ajwaki madito ki jo ma i Otkot ducu guyenyo lok me caden ma omyero omak kom Yecu ma weko kineke; ento guyenyo kwe pe gunongo mo. 56Lwak lucaden mapol gubedo ka kelo lok goba ikome, ma lokgi ducu pe rwate. 57Jo mukene gua malo, ci gukelo lok goba ikome ni, 5812 “Wan wawinyo ka en loko ni, ‘An atwero muku Ot pa Lubanga ni woko, mayam kigero ki cing ngi, ci dok agero mukene inino adek keken, ma pe gitiyo ki cing.’” 59Kadi bed gukelo lok goba kitmeno, ento lok ma gukelo pe gin rwate.

60Ajwaka madit otire malo ci ocung idyere, ocako penyo Yecu ni, “Lwak adot ma lucaden gudoti kwede ni in igamo ningning?” 61Yecu pe ogamo, oling gire alinga. Ajwaka madit dok openye ni, “In aye Kricito ma Lubanga oyero, Wod pa Lubanga ma kipwoyo ni bo?” 6213 Yecu ogamo ni, “An aye a en; dok bene wubineno ka Wod pa dano obedo ki Won Twer atena iwi kom me deyo ka ngete, tung acuc; ka dok bino ki pol me polo.” 63Ajwaka madit ocako yeco ginarukane woko kekene, kun waco ni, “Pud dok wumito kit caden ango kaa? 6414 Dong wutyeko winyo kit ma en yeto kwede Lubanga. Wutamo iye lok ango dong?” Gin ducu gungolo loke ni, bale rome to. 65Jo mukene gucako ngulu laa ikome, kun giumu wange woko, ka gidonge kwede, ma kun giwaco ni, “In ma lanebi ni, tuc ba!” Lukurpiny gujole kun gipale ki cinggi.

Petero okwero Yecu woko

(Mat 26:69-75; Luk 22:56-62; Jon 18:15-18,25-27)

66Ikare ma onongo Petero tye piny idyekal, ci angeca pa ajwaka madit acel mo obino kenyo. 67Ka oneno Petero ka oyo mac, ka obolo wange ikome ci owace ni, “In bene onongo itye kacel ki Yecu me Najaret.” 68Petero ocako kwero woko, ma kun waco ni, “An pe angeyo, pe bene aniang gin ma itye ka lokone ni.” Ka Petero okato woko i doggang, ci twon gweno otugi kok cut. 69Angeca meno dok onene, ci dok ocako tito bot jo ma gucung kunu ni, “Dano man en bene ngat acel ma ikin gi.” 70Petero dok ocako kwerone woko aye. Kare dok okato manok mo, jo ma onongo gucung kenyo dok guwaco ki Petero ni, “Adada in i ngat acel ma ikin gi, pien in Lagalilaya.” 71En ocako kwonge kun lame kekene ni, “An pe angeyo dano man ma wun wuloko pireni.” 72Ci cutcut twon gweno okok tyen me aryone. Petero ocako po lok ma Yecu owaco bote ni, “Ma nongo twon gweno peya onwoyo koko kiryo, nongo in dong ityeko kwera woko tyen adek kulu.” Ci ocako koko ki cwercwiny madwong.