Marako 13

Yecu otito pi muku Ot pa Lubanga woko

(Mat 24:1-2; Luk 21:5-6)

1Ka Yecu okato woko ki i Ot pa Lubanga; ci ngat acel mo ki ikin lupwonyene owaco bote ni, “Lapwony, nen kit ma godi magi dito kwede ki kit ma gedone beco kwede!” 2Yecu ogamo ni, “Wuneno gedo magi madito tutwal ni? Godi ducu kibimukugi kiretogi woko piny, pe kibiweko got acel mo kany ma odode iwi wadi.”

Acaki te can ma bipoto i lobo

(Mat 24:3-14; Luk 21:7-19)

3Yecu ka obedo piny iwi got Jeituni, kun otike ki Ot pa Lubanga, ci Petero ki Yakobo ki Jon ki Anderiya gucako penye i mung ni, 4“Tit botwa, lok man bitime wa awene, dok kit gin ango ma binyutu ni lok meno dong cok cobe kakare?” 5Yecu ocako wacigi ni, “Wugwoke, pe wuwek ngat mo obwolwu. 6Pien jo mapol gibibino inyinga, ma giwaco ni, ‘An aye Kricito!’ Ci gibibwolo jo mapol. 7Dok ka wubiwinyo pi mony, ki lok ma yweko pi mony, pe wuwek cwinywu opoti; myero kong meno otime, ento nongo nino me agik pud peke. 8Pien rok bilweny ki rok wadi, ki ker bene bilweny ki ker wadi, ki oyengyeng biyengo lobo i kabedo mapol, ki kec bene bipoto; meno gin aye acaki me te can ma bipoto i lobo. 91

Ento wun aye myero wugwoke kenwu; pien kibiterowu i Otkot, dok kibigoyowu i kacoke bene. Wubicung inyim luloc ki luker bene pira, wubitito lok me caden botgi. 10Myero kong gikwong tito lok me Kwena Maber bot rok ducu. 11Ento ka kiterowu i Otkot wek kingol kop ikomwu, pe wubed ka tamo kit lok ango ma wubilokone, ento wulok gin ma kibimiyowu i cawa meno; pien pe wun aye wubilok, ento Cwiny Maleng aye bilok. 12Omego en aye bimiyo omine wek kinek woko, ki wego bimiyo latine wek kinek woko, lutino bitube ikom lunyodogi, wek kinek lunyodogi woko. 132Dano ducu gibikwerowu pira ento ngat ma odiyo cwinye nio wa i agik, en aye bilare.”

Can madit atika

(Mat 24:15-28; Luk 21:20-24)

143

“Ka wuneno kikelo gin mo me kwer, malik, kiketo i kabedo ma myero pe giket iye (wek dano ma kwano oniang) ci jo ma i Judaya myero guring woko wa iwi godi. 154 Dano ma nongo tye iwi ot pe dok olor piny, pe bene odony i ot ka kwanyo iye gin mo, 16ki dano matye wa i poto pe odok cen paco kaomo ginarukane. 17Dok mon ma giyac gibineno can ikare meno, ki mon ma gidoto lutino bene! 18Wuleg wek pe obin otime ikare me cwir. 195 Pien ikare meno bibedo iye twon can madit atika mayam peya onen i lobo, nia wa i acaki lobo ma Lubanga oketo ni, nio kwede wa onyo, dok bene pe binen. 20Kono nene Rwot pe ojwiko nino meno obedo manok mo, kono dano mo pe obwot; ento pi jo ma giyero, ma en oyerogi, omiyo en ojwiko wel nino obedo manok.

21Ikare meno kace dano mo biwaco botwu ni, ‘Nen, Kricito ma Lubanga oyero tye kany’, nyo ni, ‘Nen en tye kuca’, pe wuye. 22Kricito ma lugoba kacel ki lunebi gu ma lugoba gibibino, gibinyutuwu lanyut kitiyo jami tango, wek girweny jo mapol ka gitwero, wek girweny wa ki jo ma giyero bene. 23Ento wun aye wugwoke, pien dong atyeko titowu con gin ma bibedo i anyim.

Kit ma Wod pa dano bidwogo kwede

(Mat 24:29-31; Luk 21:25-28)

246

Ento ikare meno ki inge can maditi, bibedo kit macalo yam kicoyo ni,

‘Ceng bicido woko macol licuc,

ki dwe bene pe biryeny; 257

lakalatwe bia ki i polo, gipoto piny

ki twer ducu ma i polo bene biyenge.’ 268

Ka dong kibineno Wod pa dano kabino ki pol, ki twero madwong, ki deyo. 27Ci en bioro lumalaikane ka coko jo ne ma en oyero, kun kicokogi ki i twok piny angwen ducu, nia kwede wa i agiki lobo nio kwede wa i agiki polo.

Pwony ikom yat oduru

(Mat 24:32-35; Luk 21:29-33)

28Wupwonye ikom yat oduru, cutcut ka jange dong olot, ci pote luk, ci dong wungeyo ni oro dong cok. 29Ki wun bene kace wuneno gin magi tye ka time, ci wunge ni en dong cok, tye wa i dogola. 30Adada awaco ki wun ni, yalwak me kare man pe gibitum, nio wang ma lok magi ducu bitime. 31Polo ki lobo gibitum ento loka pe bitum.

Ngat mo pe ma ngeyo nino kadi cawa meno

(Mat 24:36-44)

329

Ento nino meno ki cawa meno pe tye ngat mo ma ngeyo, kadi wa lumalaika ma i polo, kadi wa Wod, ento Lubanga Won kene aye ngeyo gire. 33Wugwoke, wangwu obed twolo manen, pien wun pe wungeyo awene ma nino biromo iye. 3410 Bedo rom ki dano ma ocito welo. Ka yam a weko gange, ci omiyo twero bot lutice, kun miyo ngat acel acel ki tice, kun ociko lagwok dogola ni obed ka kiyo piny. 35Ma omiyo wun wubed ka kiyo piny, pien pe wungeyo awene ma won ot bidwogo kwede; gwok dwog wi otyeno, nyo i cwiny dyewor, nyo okokgweno, nyo odiko. 36Wugwoke, kace obino oyotoyot pe onongwu wunino woko. 37Lok ma awaco botwu ni, awaco bot dano ducu ni: Wukii piny.”