Marako 12

Carolok ikom lugwok poto olok

(Mat 21:33-46; Luk 20:9-19)

11

Yecu ocako lok kwedgi i carolok ni, “Yam tye dano mo ma opito olok i potone, ci orumu woko ducu ki cel, ka okwinyo bur me biyo pige, ci ogero iye lubele, oweko i cing lupur, ci ocito woko wa i lobo mukene. 2Ka kare me pwono nyig olok dong oromo, ci ocako cwalo latice bot lupur kaomo nyige ma oceke ki i potone. 3Lupur gumake, ci gupwode, ka guryeme kwede woko, omedo ki dok ki cinge nono. 4En dok ocwalo latice mukene; gin gugoyo en bene, gugoyo wiye lero, gutime ki kit tim me lewic. 5Ka dok omede oro dano mukene, ci guneko dano meno woko. Gubedo kaketo can ikom jo mapol; jo mukene gupwodogi apwoda, ki mukene gunekogi aneka. 6Pud onongo en odong ki dano acel bote, en aye wode acel ma en maro. Lacen en ocwalo wode kikome botgi, kun waco ni, ‘Kibiworo woda.’ 7Lupur gucako lok keken gi ni, ‘Man aye dong lale lim; wubin waneke woko, wek lim aleyane ni obed mewa.’ 8Ci gumake, guneke woko, gubole woko wa inge poto olok. 9Ci won poto olok bitimogi ningning? En bibino, ci neko lupur woko ducu, ci miyo poto olok woko bot jo mukene. 102 Yam pe wukwano lok ma kicoyo i ginacoya ni,

‘Got ma lugedo gukwero ni en aye odoko got madit ma pire tek;

11man Rwot aye ma otiyo,

obedo botwa lok me aura?’”

12Lutela pa Lujudaya gutemo mako Yecu, ento gulworo lwak, pien guniang atir ni obolo carolok meno ikomgi. Ci gua gucito gigi woko.

Culu mucoro bot Cecar

(Mat 22:15-22; Luk 20:20-26)

13Gin gucako oro Luparicayo ki jo pa Kerode bene, wek kimak lok ma a ki idoge. 14Ka gin gubino bote, ci gucako waco ni, “Lapwony, wan wangeyo ni in i dano ma itye ki ada, dok pe ito ikom ngat mo, pien in pe ineno kom dano ki woko, in ipwonyo yo pa Lubanga ki ada. Cikwa ye ni gicul mucoro bot Cecar nyo pe? 15Wacul nyo pe wacul?” Yecu ongeyo raccwinygi, ci owaco botgi ni, “Wun mono wutema pingo kaa? Kong wucikela kom lim ma kiculu kwede wek anen.” 16Gin gucako kelone bote, ci en openyogi ni, “Cal ki coc ma kicoyo ikomeni pa anga?” Ci gugamo ni, “Pa Cecar yo.”

17Ci Yecu ocako waco ki gin ni, “Wudwok jami pa Cecar bot Cecar, ki jami pa Lubanga wudwok bot Lubanga.” Gin gucako urune matek.

Peny ikom cer ki ikin jo ma oto

(Mat 22:23-33; Luk 20:27-40)

183

Lucadukayo gucako bino bot Yecu; gin aye jo ma giwaco ni cer pa jo ma oto pe tye kulu. Gucako penyo peny ni, 194 “Lapwony, Moses yam ocoyo ni, ka laco mo oto woko, ce oweko dakone, ma kun pe obwoto latin mo, ci omyero omine olak dakone, wek onywal kwede lutino ka wi omine. 20Ci yam onongo tye omego abiro. Ngat mukwongo nyomo dako meno oto woko ma pe obwoto latin mo, 21ci me aryo ocako lako dako ni, en bene oto woko ma pe obwoto latin mo; ki dano me adeke bene kitmeno; 22ci gin ducu abiro pe gubwoto latin mo. Lacene en dako bene oto woko. 23Ikare me cer ki ikin jo ma oto, dako ni dong bibedo dako pa anga? Pien gin co abironi ducu gubedo kwede.”

24Yecu ocako wacogi ni, “Wun wurwenyo pi lok man, pien wukwiya ginacoya, wa tek pa Lubanga bene wukwiya. 25Kace dano gibicer woko ki ikin jo ma oto, ci dong pe gibinyome, dong gibibedo macalo lumalaika ma i polo. 265 Ento ikom lok man me cer ki ikin jo ma otoni, wun pe wukwano i buk pa Moses, kama ocoyo lok ikom caka, ki kit ma Lubanga yam oloko kwede ni, ‘An Lubanga pa Abraim, ki Lubanga pa Icaka, ki Lubanga pa Yakobo’? 27En pe Lubanga pa jo ma oto ento en Lubanga pa jo makwo; wun wungak wurwenyo woko marac.”

Cik madit makato ducu

(Mat 22:34-40; Luk 10:25-28)

286

Ka Lapwonycik mo obino cok, ci obedo kawinyo ka gilaro lok. Ka oneno kit ma Yecu dok iye ki gin lok maber ma atir, ocako penyo Yecu ni, “Cik mene madite mukwongo ki ikom lwak cik ducu?” 297 Yecu ogamo ni, “Cik mukwongo en ene, ‘Wuwiny wun jo Icrael, Rwot Lubangawa en Rwot acel. 30Ci mar Rwot Lubangani ki cwinyi ducu, ki tipuni ducu, ki tami ducu ki teki ducu.’ 318 Ki me aryone en ene ni, ‘Mar lawoti macalo imare keni.’ Pe dok tye kit cik mo ma pire tek makato cik magi aryo ni.” 329 Lapwonycik ogamo ni, “Iloko kakare, Lapwony; iloko atir ni, Lubanga tye acel, pe dok tye Lubanga mo mukene, kono en kene. 3310 Dok ni kimare ki cwiny ducu, ki ryeko ducu, ki tek ducu, ki maro lawoti macalo imare keni, cik magi aye pirgi tek makato gitum ma giwango ducu ki bere ki gitum mukene ducu.”

34Ka Yecu oneno ni odok iye maber ki ryeko, ocako dok waco ni, “In pe ibor ki ker pa Lubanga.” Lacen pe dok tye dano mo ma oete ka penye ki lok mo.

Peny ikom lakwar Daudi

(Mat 22:41-46; Luk 20:41-44)

35Ka Yecu onongo tye ka pwony i Ot pa Lubanga, ci openyo ni, “Lupwonycik mono gitwero waco ni Kricito en lakwar Daudi ningning? 3611 Ki tung bot Daudi kikome en oloko i tek pa Cwiny Maleng ni,

‘Rwot owaco bot Rwoda ni,

Bed itung bada ma lacuc,

i kabedo me deyo,

nio ka abiketo lukwori piny ite tyeni.’

37Kace en Daudi aye yam olwonge ni Rwot, ci en dok bedo lakware ningning?” Lwak mapol guwinyo loke ki yomcwiny madwong mada.

Yecu otucu pi can ma bipoto ikom Lupwonycik

(Mat 23:1-36; Luk 20:45-47)

38Ikare ma Yecu tye ka pwonyo dano, owaconi, “Wugwoke ikom Lupwonycik ma gimaro wot ma guruku bongi maboconi, dok gimito dano gubed ka motogi wa i cuk gu, 39dok gimaro bedo iwi kom pa ludito ka gitye i kacoke, dok gimaro bedo i kabedo me deyo i karama. 40Gin gimayo odi pa mon to, dok gibedo kalego lega maboco me buta keken. Kibingologi kop madit makato ducu.”

Mot ma dato omiyo

(Luk 21:1-4)

41Yecu obedo i Ot pa Lubanga kama okeme ki canduk me coko lim, ci obedo kaneno kit ma lwak gibolo ki motgi i canduk lim; lwak lulonyo gubolo iye mapol. 42Ento dato ma lacan obino ci obolo iye cente mola ma nyige gin aryo.12 43Ocako lwongo lupwonyene bote, ci owaco ki gin ni, “Adada awaco botwu ni, dato man ma lacan ni en aye dong obolo lim madwong makato jo ducu; 44pien jo mapol gugito ki i but limgi madwong ni aye gubolo, ento en i cane ni, obolo lime ducu ma en tye kwede ma onongo konyo kwone.”