Marako 16

Yecu ocer

(Mat 28:1-8; Luk 24:1-12; Jon 20:1-10)

1Ka ceng Cabit dong okato, ci Maliam Lamagdala ki Maliam min Yakobo, ki Calume guwilo moo ma ngwece kur me wot kwede ka wiro kom Yecu. 2Ikom nino mukwongo me Cabit mon magi gupuk odiko con ma ceng otuc, ci gucito iwi lyel. 3Gucako penye keken gi ni, “Anga mono ma bidirowa got woko cen ki i dog lyel?” 4Ka gutingo wanggi ci guneno got meno dong kidiro woko cen; onongo gote dit tutwal. 5Ka gudonyo i lyel, ci guneno latin awobi mo ma oruku bongo matar, obedo tung acuc; gucako urune mada. 6En owaco botgi ni, “Pe wubed kaurune; wun wutye kayenyo Yecu me Najaret ma kiguro ikom yatariya ni. En dong ocer woko, pe dong tye kany. Kong wunen kama kipyelo iye kome. 71 Ento wucit wutit ki lupwonyene, ki bot Petero bene ni, en dong otelo nyimwu me cito wa i Galilaya; wubineno kome kunu, kit mayam en otito botwu ni.” 8Ci mon gukati woko ki i lyel, gucako ngwec ki myelkom pi lworo ma omakogi matek tutwal; lworo ogengogi tito loke ki ngat mo.

Yecu onen bot Maliam Lamagdala

(Mat 28:9-10; Jon 20:11-18)

[9Ka Yecu dong ocer odiko con inino mukwongo me Cabit, okwongo onen bot Maliam Lamagdala, mayam en oryemo cen abiro ki ikome ni. 10En otugi tero lok bot jo mayam gibedo kwede, ikare ma gitye ki cola ki kumu ni. 11Kadi bed guwinyo ni en tye gire makwo, dok bene ni, otyeko nyute bot Maliam, ento pe guye loke.

Yecu onen bot lupwonyene aryo

(Luk 24:13-35)

12Lacen Yecu dok onen bot jo mukene ikit mapate, bot lupwonye ma onongo gicito kawot ikin gang. 13Gin dok gucito gutito bot jo mudong ni, ento gin bene dok pe guye lokgi.

Yecu ociko jo apar wiye aceli

(Mat 28:16-20; Luk 24:36-49; Jon 20:19-23; Tic 1:6-8)

14Ka lacen dong onyute bot lupwonyene apar wiye acel ma onongo gitye i dog cam. Ocako da ikomgi pi kwero ye lok, ki pi tekcwinygi, pien gukwero ye lok pa jo madong guneno kome inge cerne. 152 Ka dong owaco botgi ni, “Wucit i lobo ducu, wucitit iye lok me Kwena Maber bot ginaketa ducu. 16Dano ma oye, ce gibatija en, ci bilare; ento dano ma okwero ye en aye kop biloye. 17Lanyut magi binen ki bot jo ma guye: gibiryemo cen pi lwongo nyinga, gibiloko ki leb manyen, 18gibimako wa twol gu, dok ka gibimato gin ma neko dano, ci pe bitimogi marac; gin bene gibiketo cinggi ikom lutwo ci gibicang.”

Yecu oito i polo

(Luk 24:50-53; Tic 1:9-11)

193

Ka Rwot Yecu dong otyeko lok kwedgi, ci kitinge kitere woko malo i polo, ci ocako bedo piny kanget Lubanga atena i kabedo me deyo tung acuce. 20Ci lupwonye gucito katito lok i kabedo ducu, kun Rwot kikome bene tye katic kwedgi, kun moko lok ma gitito ki lanyute.]