Marako 11:24

Yecu odonyo i Jerucalem ki kwogo madit

(Mat 21:1-11; Luk 19:28-40; Jon 12:12-19)

1Ikare ma gin cok oo i Jerucalem, madong gin tye i tung Betepage ki Betania, ikor got Jeituni, ci Yecu ocako oro jo aryo ki ikin lupwonyene, 2ocikogi ni, “Wucit i gang matye inyimwu. Kace wudonyo iye, ci wutugi nongo latin kana ma kitweyo, ma ngat mo peya oito iwiye; ci wugony, wek wukel. 3Kace dano mo openyowu ni, ‘Wugonyo woko pingo ka?’ Wudoke iye ni, ‘Rwot aye mito; en bicwalo dwoko cen kany oyotoyot.’” 4Gucako cito, gunongo kitweyo latin kana i dogola woko ki inget yoo, ci gugonyo. 5Jo mogo ma onongo gucung kunu gupenyogi ni, “Wubitimo gin ango, ma wugonyo ki latin kana ni?” 6Gudok iye kit ma Yecu ocikogi kwede, ci guye ni gucit kwede. 7Ci gukelo latin kana bot Yecu, gucako peto bongigi ma meggi ikome, Yecu ocako bedo iwiye. 8Jo mapol gupeto bongigi ma meggi i dye yoo, ki jo mogo gupeto jang yadi ma potgi oluk ma gin ojako ki i poti. 91 Ci jo ma gutelo yoo ki jo ma gilubu kore gudange ni,

“Ojana! Lubanga omii gum ikom dano ma bino inying Rwot!

10Lubanga omii gum ikom ker pa kwarowa Daudi matye kabino ni!

Ojana malo iwi polo!”

11Yecu odonyo i Jerucalem, ci ocito i Ot pa Lubanga ocako, ngiyo kit jami ducu, ka odok i Betania kacel ki jone apar wiye aryo, pien onongo piny dong oyutu woko.

Yecu oceno yat oduru

(Mat 21:18-19)

12Orwone dok gua ki i Betania, ma kun kec neke. 13Ka oneno yat oduru ki cen ma pote oluk, ci ocito ka nenone ni gwok nyo enong iye ma ocek. Ka oo i te yat, ci pe onongo iye gin mo, onongo pote keken, pien onongo peya kare me ceke.

14Lupwonyene guwinyo ka en waco ni, “Ngati mo dong pe ma bicamo nyiggi matwal.”

Yecu olonyo Ot pa Lubanga

(Mat 21:12-17; Luk 19:45-48; Jon 2:13-22)

15Ka gubino i Jerucalem, ci Yecu odonyo i Ot pa Lubanga, ocako ryemo lucatwil ki luwil jami i Ot pa Lubanga. En oryebo meja pa lulok cente, ki kom pa lucat amam; 16pe onongo dok ye ni dano mo ongol i Ot pa Lubanga ki yec mo. 172 Ka dok ocako pwonyogi kun loko ni, “Pe yam kicoyo ni, ‘Oda kibilwongo ni ot me lega pa rok ducu’? Ento wun wuloko odoko boro pa luyak.” 18Ajwaki madito pa Lubanga ki Lupwonycik gubedo kawinyo loke, ci gucako yenyo kit yoo mo me neke woko; pien gin gitye ka lworo en. Pien onongo lwak ducu gitye kauru kit pwonye. 19Ka piny oyutu, ci ocako a woko ki i Jerucalem.

Pwony ma oa ki ikom yat oduru

(Mat 21:20-22)

20Odiko ka gitye kawot i yoo meno, guneno oduru meno otal cake wa i lwite. 21Petero ocako po pire, ci owaco ni, “Lapwony, nen yat oduru ma iceno ni otal woko.” 22Yecu ogamo ni, “Wuye Lubanga. 233 Adada awaco ki wun ni, dano ma biwaco ki got man ni, ‘Muke wek itinge ipot wa i nam,’ ma kun pe kalo akala i cwinye, ento nongo oye ni gin ducu ma elego ni bitime, ci bitime ada. 24Pi lok man mumiyo awaco ki wun ni, gin ducu ma wupenyo ma wulego Lubanga pire, ber wuye ni dong wulimo ci wubinongone ada. 25Kace wutye ka lega inyim Lubanga, ka onongo wutye ki kop mo ikom dano mo, ci wutime kica, ka wek Wonwu matye i polo bene otimwu kica ikom balwu. [ 264 Ento ka pe wutimo ki dano kica, ci Wonwu matye i polo pe bitimowu kica ikom bal mewu.”]

Peny ikom twero pa Yecu

(Mat 21:23-27; Luk 20:1-8)

27Yecu ki lupwonyene dok gudwogo i Jerucalem. Ka onongo en tye kawot i Ot pa Lubanga ci ajwaki madito pa Lubanga ki Lupwonycik ki ludongo gubino bote. 28Gupenye ni, “Twer mene ma omiyo itimo lok macalo man? Dok anga mumiyi twero meno?” 29Yecu ogamo doggi ni, “An kong apenyowu ki peny mo acel; wek wun bene wudoka iye, ci an bene abititowu kit twero ma omiyo atiyo lok man. 30Batija pa Jon twerone oa ki bot Lubanga nyo oa ki bot dano? Wun wudoka iye.” 31Gucako bedo ki pyem ikin gi keken gi, kun gipyem ni, “Ka koni wawaco ni, ‘Twerone oa ki bot Lubanga’, ci en dok bipenyowa ni, ‘Ci pingo pe wuye loke?’ 32Ka dok wawaco ni twerone oa ki bot dano kono?” Ento gin gulworo lwak, pien lwak ducu gingeyo maber ni, Jon aye lanebi atika. 33Guwaco bot Yecu ni, “Wan pe wangeyo.” Yecu bene owaco ki gin ni, “An bene pe abitito botwu kit twero ma omiyo atiyo man.”