Koko 3:22

Pwod, Ngut, ki bedo ki Gen

1An aye dano ma oneno can tutwal icing Rwot

pien awinyo lit me arem ma ogoya kwede ki akemo.

2En oryema woko ci otera i colpiny kama dero mo peke iye.

3Adada en bedo kapwoda,

pwoda dok pwoda dyeceng jwi.

4En omiyo ringo koma ki del koma obale woko,

dok oturu cogona woko bene.

5En omonya ci ogura woko dyere,

ma cwinye kec ki can ma mito keto ikoma.

6En oketa abedo i colpiny,

calo dano ma oto wayam con.

7En ocweyo cel oruma kwede woko dyere,

wek pe alwi akat woko abwot pi laro kwona;

ci otweyo okol i tyena, ki nyor mapek adada.

8Kadi bed alwong lwongo ma kun akok ni kikonya,

ento en dingo ite woko pe winyo legana.

9En otyeko cego yona woko ki godi ma kipayo,

omiyo yona obedo ma ogomogom.

10En obedo kakura calo nguu ma obutu ma tye kakiyo piny,

ci opoto ikoma calo labwor.

11En oryema woko ki i yona dok okila matinotino,

ci obwota woko.

12En otelo atume, okema kwede,

omiyo adoko ginacela ki aterone.

13Ci ocelo adununa woko

ki atero ma okwanyo ki i jurune.

14Dong adoko ginanyera pa lwak me rok ducu,

nyinga odoko lok aboka dok kiwera ki wer dyeceng jwi.

15Omiya apong ki can malit mada,

omiyo ayeng ki odir yat.

16En omiyo amwodo kweyo ki laka,

kun anywene woko ki buru.

17Kikwanyo kuc woko ki i cwinya,

wiya dong owil woko ikit ma yomcwiny tye kwede.

18Omiyo awaco ni, “Kwona dong otum woko,

ki gin ma ageno ki bot Rwot dong peke.”

19Ka atamo pi can ma atye kwede ki kit ma atye kamal kwede ata ikin piny,

ci rom aroma ki mato kwir makec!

20Cwinya nino ducu tamo pire,

ci ngur woko piny ki iiya.

21Ento abikano loke i iya,

pimeno miyo dok pud abedo ki gen.

22Mar pa Rwot ma pe loke bedo matwal pe gik,

ki kicane bene pe gik.

23Giroc gidoko nyen rupiny ki rupiny;

in aye i gene mada.

24Awaco ki i cwinya ni, “Rwot aye gin ducu ma amito,

pimeno abigeno en.”

25Rwot ber bot jo ma giketo gen gi ikome,

ki bot dano ma yenye ki i cwinye ducu.

26Bedo ber ka dano kuru Rwot mot, kun gikuru lar ma a ki bote.

27Bedo ber ka dano oye juk pa Rwot ma nongo en pud tidi.

28Wek obed kene laling ka en limo can,

kun nongo ngeyo ni Rwot aye ma oketo can man ikome;

29wek omwole piny i apwa,

gwok onyo gen pud bibedo tye.

30Wek olok leme bot ngat ma odonge,

ci wek opong ki lewic madwong.

31Pien Rwot gire lakica dok bene pe bolo dano woko matwal,

32ento kadi bed en kel cwercwiny me can ikom dano, ci pud kica make aye

macalo mar mere ma pe loke tye dwong.

33Pien en pe keto can nyo cwercwiny ikom dano akaka.

34Rwot ngeyo ka kiunu lumabuc ma iwi lobo;

35Rwot ngeyo ka kikwanyo twer ma dano tye kwede woko ma en omiyowa

36dok bene en ngeyo ka kibalo te pido pa dano woko akaka.

37Anga ma ociko lok ci otime bene,

ka pe Rwot aye ma ociko?

38Gin maber ki gin marac mono ducu

pe gia ki i dog Ngat Mamalo Twal?

39Dano makwo kok pingo ka can opoto ikome pi bale?

40Kong watemu neno kitwa dok wangiyu kwowa,

ci waloke wadwog bot Rwot.

41Myero wamii cwinywa kun wailo cingwa

malo i polo bot Lubanga kun wawaco ni,

42“Wan dong wabalo dok wajemo,

ci in bene pe iweko balwa.

43Imiyo kiniga oboyo komi woko kun iryemo korwa,

inekowa woko labongo paro pirwa.

44Imiyo pol me gero oboyi woko

wek lega mo pe otuc oo boti.

45Imiyo wadoko calo bur yugi ma kicayo,

ikin lurok ducu.

46Lukworwa ducu dong gitye kangalowa angala.

47Can ma wanenoni dong omiyo komwa omyel dok lworo bene opoto ikomwa,

dok topiny obino katyekowa woko.

48Pig wanga mol calo pii ma i kulu

pien jona dong kinekogi woko matwal.

49Pig wanga bibedo kamol ma pe cok,

ci bimede mere ameda,

50nio wang ma Rwot oneno piny ki i polo.

51Gin ma aneno miyo cwercwiny bota,

ka aneno gin ma otime ikom anyira ducu ma i taunwa madit.

52Lukwora gibedo kadwara macalo gidwaro winyo,

kun tyen lok mo ma omiyo gidwara peke.

53Gubola makwo i bur,

ci gubolo got woko iwiya.

54Pii ocako mwonyo wiya woko,

omiyo atamoni dong acok ki to!

55Ai Rwot, alwongo nyingi,

ki i bor piny kamatut;

56ci iwinyo kokona ma akok kwede boti ni, ‘Pe i ding iti kawinyo kokona, konya do!’

57Yam ibino cok ikare ma akok boti; dok in iwaco bota ni, ‘Pe ilwor!’

58In dong icung kapido pira, ai Rwot ci ikoko kwona ki i to.

59Ai Rwot, in bene dong i neno gin marac ma kitimo ikoma;

in aye ingol kop ma mera ma nyutu ni bala mo peke.

60In ingeyo lokgi maracu ducu ma gupiro ma gubedo kaporone me culu kwor ikoma.

61Ai Rwot, iwinyo bene lok ma giloko me yet,

ki lok ducu maracu ma gubedo kaporone ikoma.

62Gin giloko lok ikoma iyub ma meggi,

gilwenyo ikoma dyeceng jwi.

63Kadi gubedo piny onyo gua malo;

gicako wer ikoma.

64Ai Rwot, cul kwora ikomgi,

kun lubu kit ma gin gutiyo.

65Cen gi woko pien gin jo ma tokgi tek.

66Ryem korgi ki kiniga,

ci ityekgi woko ki i lobo, ai Rwot.”