Koko 2

Pwod ma Rwot oketo ikom Jerucalem

1Rwot oumu Cion woko ki pol macol licuc,

kun onongo tye ki kiniga.

En okwanyo deyo pa Icrael woko ci obolo woko piny odoko gin me lewic i lobo.

Pe dok wiye opo ikom kabedone maleng,

ikare ma dong onongo kiniga omake.

2Rwot ojwero odi pa jo pa Yakobo woko ducu labongo kica mo.

Dok omuku cel gogo pa jo Juda woko ducu pi kinigane,

ci odwoko rwomgi wa piny i ngom ki lewic,

ker kacel ki luloce ducu.

3En oturu tek pa Icrael woko ducu pi kinigane mager atika;

dok bene okwero konyogi woko,

ikare ma lukworgi opoto ikomgi.

Kinigane olyel ikom Yakobo calo mac ma lyel,

ma wango jami ma kangete woko ducu.

4En otelo atume calo lamerok,

kun ojingo bade ma lacuc woko ikomwa calo lakwor;

ci oneko jo mayam wagenoni woko ducu ki i Cion.

En ocoro kinigane mager ikomwa calo mac.

5Rwot dong odoko macalo lakwor pa jo Icrael,

ci otyekogi woko liweng.

En otyeko gang kal madongo mapol woko ducu,

omiyo cel gogo ducu dong gudoko obur;

dong onyayo kumu ki koko odoko dwong bot jo Juda.

6En oturu Ot mere woko piny macalo bolo mo ata ma i poto,

omiyo kabedo me kwero nino madito ma kiciko odong obur.

Rwot dong omiyo kwero nino madito ki ceng me Cabit ogik woko i Cion;

pi akemone mager,

omiyo kicayo rwot ki ajwaka pa Lubanga.

7Rwot dong ocayo keno tyere mada,

okunu bene kabedone malengi woko;

otyeko dong miyo gang kal madongo woko ducu

i cing lukwore;

omiyo guwoo i Ot pa Rwot,

macalo ikare me kwero nino madit.

8Rwot onongo dong oyube woko pi muku cel me Cion

wek kabedone dong obed wi obur;

en opimo woko dong ki tol,

ci ocako tyekone woko dok bene pe ojuku cinge;

ci omiyo gogone ki cele ducu gukok,

kun komgi ducu oloc woko kacel.

9Dog cele ducu gumwony woko piny i ngom,

en omuku dok oturu wa kicikane woko bene liweng;

lukerne ki rwodine gitye i opii,

Cik dong pe kipwonyo matwal.

Wa lunebine bene dong pe gineno ginanyuta ma a ki bot Rwot.

10Ludongo me Jerucalem, gibedo piny laling;

guonyo apwa iwigi, dong guruku bongo cola.

Anyira Jerucalem dong gukulu wigi piny.

11Abedo kakoko ki pig wanga,

ma cwinya dong orube woko;

cwinya opong woko ligwik ki can,

pi lwak jo Cion ma dong kityekogi woko.

Lutino matino ki lutino lukere gutum woko idye yoo ducu ma i taun madit.

12Gin gikok bot megigi pi kec ki orwo ma nekogi;

kun giwile calo jo ma ret omakogi, idye yoo ducu ma i taun madit,

kun kwogi tum woko, ki i kor megigi.

13In Jerucalem atwero loko gin ango piri,

dok atwero pori ki ngo?

Atwero waco gin ango,

ma romo kweyo cwinyi, in Cion ma amaroni?

Pien oburri dong lac calo nam.

Anga dong matwero dwoko cwinyi cen?

14Lunebini yam gutito ginanyuta me goba ki me bwola keken boti,

pe gunyutu bali kamaleng pi dwoko gumi ducu boti;

ento gubedo kaneno lok me goba me teri i can keken.

15Jo ma woto gikato ki i gudo gineni ki wang me cac;

kun gijwat ma giyengo wigi pi Jerucalem ni,

“Man aye taun madit mayam kilwongo ni mwonya tutwali,

ma onongo yomo cwiny lobo ducuni?”

16Lukwori gingali, dok gijwat ma gikayo lakgi.

Gin gidange ni, “Dong watyeko neke woko!

Eyo, man en aye kare mayam wabedo kaparo pireni,

dong oo, dok waneno ki wangwa!”

17Rwot dong otiyo kit macalo en oyubu wacon ca,

dok ocobo gin mayam en omoko.

En omuku taunwu madit oreto woko piny labongo kica mo;

omiyo lukworwa gubedo ki yomcwiny madwong ikomwa,

dok omiyo tek bot oteka lweny pa lumerokwa.

18Kok matek bot Rwot, in Cion!

Wek pig wangi omol ocit piny macalo pii ma i kulu,

ma mol dyeceng ki dyewor benebene.

Pe iwek komi ool ki koko, pe bene iwek pig wangi ocoki!

19A malo, kok matek i dyewor benebene!

Ony can matye i cwinyi woko macalo pii inyim Rwot!

Tang cingi malo bot Rwot,

kun ikok bote pi kwo pa lutinoni,

ma kec miyo giwile woko i yoo ducu matye idye gang.

20Nen, ai Rwot, ci itam!

Pingo ipwodowa i yo macalo man?

Mon gitye kacamo lutino lukere ma gitingo i korgi.

Kitye kaneko ajwaki ki lunebi i kabedoni maleng ai Rwot.

21Lutino ki ludito ma otii guto woko idye yoogu;

anyirana ki lutino awobena kinekogi woko liweng ki pala lucwan.

In inekogi woko ikare ma onongo itye ki kiniga;

ci inekogi labongo kica mo.

22In ilwongo lukwora ci guruma woko dyere kun gimiya lworo madit

macalo ilwongogi kakwero nino me karama.

Ki ikare ma Rwot onongo kiniga omako,

pe tye dano mo ma obwot nyo ma obedo kwo.

Lukwora guneko lutino mayam atingogi dok apitogini.