Yocwa 22

Yocwa ocwalo kaka ma tung kunyango me Jordan i lobogi

1Lacen Yocwa olwongo jo pa Reuben, jo pa Gad ki nucu kaka pa Manace, 21ci owaco botgi ni, “Wutyeko cobo gin ducu mayam Moses latic pa Rwot ocikowu kwede, dok wubedo ka woro doga bene i lok ducu ma acikowu kwede. 3Pe wubwoto utmegiwu pi lwak kare man ducu nio kwede wa onyo, ento wuketo cwinywu kalubu lok ma Rwot Lubangawu ocikowu kwede. 4Ci kombedi Rwot Lubangawu dong otyeko miyo yweyo bot utmegiwu kit mayam ocikogi kwedeni; pieno wun dong wuloke wudok cen i pacowu kama lobo mayam wucamo odoko mewu tye iye, i lobo mayam Moses latic pa Rwot omiyo botwu loka tung kunyango me Jordan. 5Ber wugwoke kalubu cik ki lok ducu mayam Moses latic pa Rwot ocikowu kwede ni wumar Rwot Lubangawu, kun wulubu yone ducu ki lok ma en ociko. Wumok ikome liking kun wutiyo bote ki cwinywu ducu ki tipu komwu ducu.” 6Kitmeno, Yocwa ocikogi kun lamo gum ikomgi, ka dong ocwalogi kwede tugi, ci gudok i pacogi.

7Onongo Moses yam omiyo dul lobo bot nucu kaka pa Manace i Bacan, ento nucu kakane mukene Yocwa aye omiyo lobo botgi kacel ki utmegigi ma i lobo ma i loka Jordan tung kupotoceng. Ikare ma Yocwa cwalogi i pacogi, en olamo gum ikomgi, 8kun waco botgi ni, “Dong wudok cen i pacowu ki lonyo madwong, ki lwak lim makwo mapol, ki ryal, jabu, mola, nyonyo ki bongigu. Wucit wupok jami ma wuyako ki bot lukworwu ikinwu ki utmegiwu.” 9Kitmeno jo pa Reuben, jo pa Gad ki nucu kaka pa Manace gucako dok i pacogi; gupoke woko ki ikom jo Icrael i Cilo matye i lobo Kanaan, ci gucito i lobo Gilead, en aye lobogi kikome mayam gulimo, kit ma Rwot onongo ociko ki Moses.

Cano Keno Tyer Loka Jordan

10Ka guo i Gelilot inget kulu Jordan, matye i lobo Kanaan, ci jo pa Reuben, jo pa Gad ki nucu kaka pa Manace gucano keno tyer inget Jordan, keno tyer madit mada. 11Ci jo Icrael guwinyo lok ni, “Jo pa Reuben, jo pa Gad ki nucu kaka pa Manace gucano keno tyer iwang lobo me Kanaan, i Gelilot ma inget Jordan ma okemo lobo pa jo Icrael.”

12Ka jo Icrael guwinyo pire, ci lwak jo Icrael ducu gucoke i Cilo kayubu lweny ikomgi.

13Ci jo Icrael gucwalo Finekaci wod pa ajwaka Eleajar bot jo pa Reuben, jo pa Gad ki nucu kaka pa Manace i lobo Gilead, 14kacel ki rwodi apar. Gucwalo latela acel ki i kaka acel acel pa jo Icrael, kun latela acel acel obedo ladit maloyo dogola mo ikin kaka pa jo Icrael. 15Ka dong guo bot jo pa Reuben, jo pa Gad ki nucu kaka pa Manace ma i lobo Gilead, ci guwaco botgi ni, 162“Lwak pa Rwot ducu guwaco botwu kit man ni, ‘Man kit robo dog ango ma wutimo ikom Lubanga pa Icrael, ma omiyo wuloke woko wuweko lubu kor Rwot, wucano keno tyer pirwu kenwu, wucako jemo woko ikom Rwot? 173Bal ma otime i Peor pud pe oromowu ce, mayam omiyo two gemo opoto gire ikom lwak pa Rwot? Pud peya walonye ikom bal meno wa onyo, 18ci dok pud wumede ki weko lubu kor Rwot ikare man? Kace dok wujemo woko ikom Rwot tin, ci diki kiniga bimake ikom lwake jo Icrael ducu. 19Ento koni ka lobowu obedo keni, ci wudok cen i lobo pa Rwot kama kema pa Rwot ocung iye, wek wuyer dul lobo mo ikinwa kunu wek wubed iye; ento pe dok wujem ikom Rwot aye, nyo pe wulokwa wadok lujemo pi cano keno tyer mukene ma dok pat ki keno tyer pa Rwot Lubangawa kikome. 204Akan wod pa Jera yam pe ongayo wang Rwot pi lok ma dok ikom jami ma onongo kidyerogi woko bot Rwot, ci omiyo akemo opoto ikom lwak jo Icrael ducu? Dok en pe oto kene pi balenu.’”

21Ci jo pa Reuben, jo pa Gad ki nucu kaka pa Manace gudok iye bot ludito wi dogola pa jo Icrael ni, 22“Rwot aye Lubanga maloyo lubanga mukene ducu! En aye Lubanga maloyo lubanga mukene ducu! En ngeyo, dok en miyo Icrael bene ngeyo! Kace man otime pi jemo nyo pi ngayo wang Rwot, ci tin pe wubwotwa makwo. 23Kace wacano keno tyer pi weko lubu kor, Rwot, nyo kace wacano pi tyero iye gitum awanga, nyo gityer me moko kwon, nyo gityer me berbedo, ci wek Rwot kikome aye ocul kwor ikomwa. 24Pe kumeno gire, ento wan onongo watimo pi lworo pi kare ma bibino anyim, pien likwayowu gibiwaco bot likwayowa ni, ‘Wun wuwaco ni Rwot Lubanga pa Icrael obedo Lubangawu ningning? 25Rwot dong otyeko keto kulu Jordan obedo wang lobo ikin wan ki wun; pieno wun jo pa Reuben ki jo pa Gad pe wutye ki wang pok mo ikom Rwot.’ Lok macalo meno bimiyo likwayowu gijuku likwayowa, ci miyo giweko woro Rwot woko. 26En aye lok ma omiyo wawaco ni, ‘Wek wacan keno tyer, pe pi gitum awanga nyo pi tumu iye gitum mo, 27ento watim me bedo caden ikin wan ki wun, ki ikin yalwak ma bilubuwa i anyim, ma nyutu ni wan bene waworo Rwot ki gitum awanga ki gitum mukene ki gityer me berbedo ma watyero inyime; wek likwayowu pe guwac bot likwayowa ikare ma bibino anyim ni wun pe wutye ki wang pok mo ikom Rwot. 28Onongo watamo ni, ka gibilok botwa kitmeno, nyo bot likwayowa ikare me anyim, ci wabidok iye ni, nen kit keno tyer mayam kwariwa gucano ma oporo keno tyer pa Rwot kikome. Pe gucano pi gitum awanga nyo pi tyero kit gitum mo, ento me bedo caden ikin wan ki wun.’ 29Wan onongo pe wayube pi jemo ikom Rwot wa ki acel, nyo me weko lubu kor Rwot ikare man pi cano keno tyer me tumu gitum awanga, nyo me tyero gityer me moko kwon nyo kadi kit gitum mo me ameda ikom keno tyer pa Rwot Lubangawa ma inyim kemaneni!”

30Ka ajwaka Finekaci ki lutela ma luwi lwak, ki ludito kaka ma i Icrael ma onongo gitye kacel kwede guwinyo lok pa jo pa Reuben, jo pa Gad ki jo Manace ma gudok iyeni, ci cwinygi obedo yom mada. 31Finekaci wod pa ajwaka Eleajar owaco bot jo pa Reuben, jo pa Gad ki jo pa Manace ni, “Tin dong waniang atir, ni Rwot tye i dyewa, pien wun pe wutimo man pi robo dog Rwot; kombedi dong wutyeko laro jo Icrael woko ki i cing Rwot.”

32Lacen Finekaci wod pa ajwaka Eleajar ki rwodi ducu gua ki bot jo pa Reuben ki jo pa Gad ma i lobo Gilead, gudok i Kanaan bot jo Icrael matye kunu, ci gudwoko lok botgi. 33Lok ma gudwoko botgi oyomo cwiny jo Icrael mada, ci gupwoyo Lubanga, pe dok gumede kiloko lok me cito kalweny ikomgi nyo pi balo lobo ma jo pa Reuben ki jo pa Gad gibedo iyeni woko. 34Jo pa Reuben ki jo pa Gad gucako nying keno tyer ma gucano ni, Caden, pien guwaco ni, “Man aye bedo me caden ikin wan ki wun mamoko ni Rwot en aye Lubanga.”