Yocwa 23

Cik pa Yocwa me agiki bot lwak

1Ka kare okato malac ma Rwot dong otyeko miyo yweyo bot jo Icrael ikom lumerokgi ducu mayam orumugi dyereni, ki onongo Yocwa bene dong otii woko, mwaka me dite dong onongo dwong. 2Ci en olwongo jo Icrael ducu bote, ki ludongogi, ludito wigi, lungolkopgi ki ludito ticgi ducu, ci owaco botgi ni, “An kombedi dong atii woko, mwaka me dita dong bene dwong. 3Wun dong wutyeko neno gin ducu ma Rwot Lubangawu otiyo pirwu ikom rok magi ducu, pien Rwot Lubangawu aye obedo kalweny ikomgi pirwu. 4Nen ka dong atyeko poko lobo pa rok mapatpat ma pud gudong ikinwu me bedo lobo pa kakawu, kacel ki rok ducu mayam dong aloyogi woko, cake ki i Jordan nio kwede wa i Nam Mediterranean tung kupotoceng. 5Rwot Lubangawu bidirogi woko cen kun ryemogi woko ki inyimwu, ci wubicamo lobogi kit mayam Rwot Lubangawu ocike kwede botwuni. 6Pimeno wucung matek kun wulubu gin ducu ma kicoyo i buk me Cik pa Moses, pe wubwot mo wa ki acel iye. 7Pe wunyebe me bedo kacel ki lurok ma pud gudong i kinwuni, dok pe wutuc nying lubangagi, nyo pe wukwong kwong mo ki nying lubangagi, nyo pe wuworgi, nyo pe bene wuryebe inyimgi. 8Ento wumok wunu liking ikom Rwot Lubangawu kit ma wubedo katimone o kwede wa onyooni. 9Rwot dong otyeko ryemo rok madito ki matego woko ki inyimwu; kun bene ngat mo peya onen ma obedo ki twero me cung inyimwu. 101Ci dano acel mo ki ikinwu romo ryemo jo alip kulu, pien Rwot Lubangawu aye tye kalweny pirwu kit mayam owaco botwu. 11Dong ba, myero wugwoke matek, wunen ni wumaro Rwot Lubangawu; 12pien ka wudok cen kun wuribe ki lurok ma gudong ikinwu, ki kace wucako nyome kwedgi kun wunyomo anyiragi ki dok gin bene ginyomo anyirawu, 13ci wunge atir ni, Rwot Lubangawu pe dok bimede ki ryemo lumerokwu woko ki inyimwu; ento gin aye gibidoko macalo owic ki layuta me cikowu, ki odoo gayi me jwato pyerwu ki okutu me cobo wangwu, ci bibedo lit adada, nio ka wubito wutum woko ki i lobo man maber ma Rwot Lubangawu dong omiyo botwuni.

14Kombedi an dong acok to. Wun bene wungeyo ki i cwinywu wa ki tipu komwu ducu ni, gin mabeco ducu mayam Rwot Lubangawu ociko pirwu gin ducu gucobe kakare, pe tye acel mo ma pe otime. 15Ento kit mayam Rwot Lubangawu ocobo lok ducu mabeco mayam ociko pirwuni, kitmeno bene Rwot dok bikelo gin ducu maracu ikomwu, nio ka bityekowu woko ki i lobo man maber ma en omiyo botwuni. 16Kace wuturu gicike pa Rwot Lubangawu mayam ocikowu kwede kun wucito ka woro lubanga mogo mukene, ma wuryebe inyimgi, ci kiniga bimako Rwot ikomwu, ci wubito wutum woko oyotoyot ki i lobo man maber ma en omiyo botwu.”