Yocwa 21

Taun Madito pa Lulevi

(Wel 35:1-8; 1 Tek 6:54-81)

1Ludito wi kaka pa kwaro pa Lulevi gubino bot ajwaka Eleajar ki Yocwa wod pa Nun ki ludito wi kaka pa jo Icrael mukene ducu. 21Gubino botgi i Cilo i lobo Kanaan, ci guwaco botgi ni, “Rwot yam ociko ki i dog Moses ni myero kimii botwa taun madito me bedowa kacel ki lobo ma ingetgi me oletgu pi kwayo leewa makwo.” 3Ci jo Icrael gulubu cik pa Rwot, gumiyo taun madito magi bot Lulevi kacel ki lobo me oletgi kun gikwanyo ki ikom ginaleyagi.

4Kwir okwongo poto ikom jo Kokat ci Lulevi ma likwayo pa ajwaka Aron gulimo taun madito apar wiye adek ki bot jo pa Juda, jo pa Cimeon ki jo pa Benjamin kun onongo kiyerogi ki bolo kwir.

5Jo Kokat mudonge gulimo taun madito apar ki bot jo pa Epraim, jo pa Dan ki nucu kaka pa jo pa Manace ma oporo dogolagi.

6Jo pa Gercon gulimo taun madito apar wiye adek ki bot jo pa Icakar, jo pa Acer, jo pa Naputali ki nucu kaka pa Manace ma i Bacan ma oporo dogolagi.

7Jo pa Merari gulimo taun madito apar wiye aryo ki bot jo pa Reuben, jo pa Gad ki jo pa Jabulon ma oporo dogolagi.

8Taun madito magi ki lobo olet ma ingetgi jo Icrael gumiyo bot jo pa Levi kun kibolo kwir, kit macalo Rwot yam ociko ki i dog Moses.

9Taun madito ma gulimo ki bot kaka pa Juda ki Cimeon, 10ma kimiyo bot likwayo pa Aron, ma gin aye dogola acel ikin jo pa Kokat ma Lulevini nyinggi ene. 11Kwir okwongo poto ikomgi ci kimiyo botgi Kiriat-arba, en aye Kebron, ma i lobo godi me Juda, kacel ki lobo olet ma orume dyere. Arba obedo kwaro pa jo Anak. 12Ento poti ducu ma inget taun madit meno, ki taun matino ma ingete yam onongo kimiyogi woko bot Kaleb wod pa Jepune me bedo mere.

13Kimiyo Kebron ki lobo olet ma ingete bot likwayo pa ajwaka Aron, en aye taun madit me laro lunek dano, Libna ki lobo olete, 14Jatir ki olete, Ectemoa ki olete, 15Kolon ki olete, Debir ki olete, 16Ain ki olete, Juta ki olete, Bet-cemec ki olete, taun madito abongwen ma oa ki bot kaka aryonu. 17Ka dok kimiyo botgi taun madito magi ma oa ki bot jo pa Benjamin:

Gibeon, Geba, 18Anatot ki Almon, taun madito angwen ki olet ma ingetgi. 19Taun madito ducu ma kimiyo bot likwayo pa ajwaka Aron gubedo apar wiye adek, kun taun madit acel acel tye ki lobo me olet ingete.

20Lulevi me dogola mogo pa jo pa Kokat mudong gulimo taun madito magi ma i lobo pa jo pa Epraim: 21Cekem, taun madit me laro lunek dano ma i lobo godi me Epraim, ki olete, Gejer ki olete, 22Kibjaim ki olete, Bet-koron ki olete, taun madito angwen. 23Ki bot kaka pa Dan gulimo Elteke, Gibeton, 24Aijalon ki Gat-rimmon, taun madito angwen ki olet ma ingetgi. 25Ki bot nucu kaka pa Manace gulimo Taanak ki Gat-rimmon ki olet ma ingetgi. 26Kitmeno, taun madito ducu ma kimiyo bot dogola mukene pa jo Kokat gubedo apar, kun taun madit acel acel tye ki lobo olet ingete.

27Jo Gercon ma idogola mukene pa Lulevi gulimo taun madito aryo ki bot nucu kaka pa Manace, gin aye Golan ma i Bacan ma taun madit me laro lunek dano ki olet ma ingete, ki Be-eciterot ki olete. 28Ki bot jo Icakar gulimo Kicion, Daberat, 29Jarmut ki En-ganim, taun madito angwen ki olet ma ingetgi. 30Ki bot jo Acer gulimo Mical, Abdon, 31Kelkat ki Rekob, taun madito angwen ki olet ma ingetgi. 32Ki bot jo Naputali gulimo Kedec i Galilaya, taun madit me laro lunek dano, Kamot-dor ki Kartan, taun madito adek ki olet ma ingetgi. 33Kitmeno, taun madito ducu ma kimiyo bot dogola mapatpat pa jo Gercon obedo apar wiye adek, kun taun madit acel acel tye ki lobo olet ingete.

34Lulevi mukene, ma gin aye dogola pa jo Merari, gulimo ki bot jo Jabulon Jokneam, Karta, 35Dimna ki Nakalal, taun madito angwen ki olet ma ingetgi. 36Ki bot jo pa Reuben gulimo Bejer, Jakaj, 37Kedemot ki Mepat, taun madito angwen ki olet ma ingetgi. 38Ki bot jo pa Gad gulimo Ramot ma i Gilead matye taun madit me laro lunek dano, Makanaim, 39Kecbon ki Jajer, taun madito angwen ki olet ma ingetgi. 40Taun madito ducu ma kimiyo bot dogola mapatpat pa jo pa Merari, en aye bot dogola pa Lulevi mudonge, obedo apar wiye aryo.

41Taun madito ducu pa Lulevi ma gitye i dye lobo pa jo Icrael gubedo pyere angwen wiye aboro, ki oletgi. 42Taun madit acel acel onongo tye ki lobo olet ma orume dyere; gangigi ducu gubedo kitmeno.

Jo Icrael gucamo lobo

43Kitmeno, Rwot omiyo bot jo Icrael lobo ducu mayam okwongo pire ni ebimiyo bot kwarogi; gucamo lobone kitmeno, ci gubedo iye. 44Rwot omiyogi yweyo i kabedogi ducu kit mayam okwongo bot kwarogi; pe lamerokgi acel mo ocung inyimgi, pien Rwot onongo omiyo lumerokgi ducu i cinggi. 45Lok mabeco ducu mayam onongo Rwot ociko ki jo Icrael ocobe kakare, pe onen lok mo ma pe otime.