Yocwa 20

Taun madito me laro lunek dano

(Wel 35:9-34; Nwo 4:41-43; 19:1-13)

11

Rwot dok owaco bot Yocwa ni, 2“Wac bot jo Icrael ni, ‘Wuyer taun madito me laro lunek dano mayam aloko pirgi botwu ki i dog Moses. 3Wek lunek ma pe guneko dano akaka, nyo ma pe gupiro pi nekogi apira, guring gular iye komgi. Taun gi madito magi bibedo me laro lanek dano ki bot lacul kwor remo. 4Lanek biringo laro taun madit mo keken ki ikin gi, ci bicung inyim ludito me dog cel me taun madit meno ma kidonyo kwedeni wek otit loke botgi. Ka gin bitero en wa i taun madit, ci gibimiye kabedo mo, ci en bibedo kwedgi kunu. 5Kace wat macok pa lato ma lacul kwor remoni olubu kore, pe kibimiyo lanek meno i cinge, pien pe oneko lawote ma onongo opiro pi nekone apira, dok onongo en yam peke ki kit mone mo ikome ikare macon ca. 6En bibedo i taun madit meno nio ka bicung inyim kacoke wek kingol kope, ci bikuru nio wa ikare ma ajwaka madit ma onongo tye katic ikare meno otyeko to. Lacen en twero dok i taun ma tuggi kikome, kama yam en oa ki iye ikare ma oringo olaro komeni.’”

7Ci jo Icrael guyero taun madito magi tung kupotoceng me kulu Jordan, ci gukwerogi pi tic man: Kedec ma i Galilaya i lobo godi pa jo pa Naputali, Cekem i lobo godi pa jo pa Epraim, ki Kiriat-arba, en aye Kebron, i lobo godi pa jo pa Juda. 8Ki loka Jordan ma inge Jeriko tung kunyango guyero Bejer ma i tim ma obedo cerecere i lobo pa jo pa Reuben, Ramot ma i Gilead i lobo pa jo pa Gad, ki Golan ma i Bacan i lobo pa jo pa Manace. 9Meno aye taun madito ma kiyerogi pi kaka pa jo Icrael ducu kacel ki welo ma lubedo ikin gi, wek lanek dano ma pe oneko akaka oring olar iye kome, wek pe oto i cing lacul kwor remo nio wang ma opido inyim lwak.